Отан деген ордам бар: рух пен өнер тоғысқан байқау

Ұлттық рухты дәріптеп, жас таланттарды қолдау, патриоттық ән­дер­ді насихаттау мақсатында жүзеге асқан өнер додасы Қызылорда қа­ласы мен облыстың барлық ауданынан келген талантты жастардың басын қосты. Байқауға 10 талапкер қатысты.

Іс-шарада сөз алған Сырдария аудандық мәдениет және тілдерді дамыту бөлімінің маманы Жеңісбек Төрәлиев қатысушыларға сәттілік тіледі.

– Бүгінгі байқау – халқымыздың ұлы тұлғасы, ел бірлігі мен азаттығы жолында ерен еңбек еткен Абылай ханның рухына тағзым етудің жарқын көрінісі. Ұлттық өнерді дәріптеу, жастардың бойына отансүйгіштік қасиетті сіңіру – баршамыздың ортақ міндетіміз. «Отан деген ордам бар» атты байқау талантты жастардың шы­ғар­машылық әлеуетін шыңдап қана қоймай, туған жерге, елге деген сүйіспеншілікті арттыра түседі деп сенемін. Барлық қатысушыға сәттілік, шабыт пен жеңіс тілеймін, – деді Жеңісбек Үсенұлы.

Өнер байқауы басталмас бұрын қатысушылар ауданның ардақты азаматы, Ұлы Отан соғысының ардагері Яхия Тасыровтың шаңырағына арнайы барып, сәлем беріп, батасын алды. Ардагердің өнегелі өмір жолы мен елге қызмет ету жолындағы ерлігі жас­тарға үлкен әсер қалдырды. Сонымен қатар өнерпаздар «Руханият орталығында» болып, музей көрмесін аралап, аудан тарихымен, ұлттық құндылық пен тарихи жәдігермен танысты. Бұл тағылымды кездесу жас буынның туған жер тарихына деген құрметін арттырып, рухани танымын кеңейтті.

Байқаудың әділ өтуіне арнайы құрылған қазылар алқасы төрелік етті. Олардың қатарында қазылар алқа­сының төрағасы, композитор, мәдениет саласының үздігі төсбелгісінің және «Ерен еңбегі үшін» медалінің иегері Сәбит Ұлықпанұлы, халықаралық конкурстардың лауреа­ты, әнші Мағжан Аманжолов және ақын, Қазақстан Жазушылар және Журналистер одағының мүшесі Ақтөре Ибрагимұлы бар.

Байқау екі кезеңнен тұрды. Бірінші кезеңде әрбір талапкер патриот­тық ән орындап, туған жерге, елге деген сүйіспеншілігін үздік туындысы арқылы жеткізсе, екінші кезеңде қазақ композиторларының еркін тақырыптағы шығармасын орындап, вокалдық шеберлігі мен сахна мәдениетін көрсетті.Қазы­лар алқасының төрағасы Сәбит Ұлықпанұлы қатысушылардың өне­рі­не жоғары баға беріп, мұндай байқаудың ұлттық өнердің дамуына, жастардың шығармашылық қабілетін шыңдауға зор ықпал ететінін айтты.

– Бүгінгі байқаудан талантты, өнерге шынайы берілген жас­тарды көрдік. Ән – ұлттың рухын көте­ретін, тарихы мен тағдырын танытатын асыл мұра. Абылай ханның 315 жылдығына арналған бұл өнер додасы жастардың бойындағы отан­сүйгіштік сезімді арттырып, ұлттық өнерге деген құрметін нығай­та түседі деп сенемін. Барлық қатысушы жоғары дайындықпен келген. Алдағы уақытта да шығарма­шылықтарыңыз шыңдалып, қазақ өнерінің көкжиегін кеңейте беріңіздер, – деді қазылар алқа­сының төрағасы Сәбит Ұлық­панұлы.

Тартысқа толы өнер бәйгесінің қорытындысы бойынша бас жүлдені Шиелі ауданынан келген Қаршыға Базархан иеленді. І орын Сырдария аудандық кент мәдениет үйінің өнерпазы Сұлтанханым Қолдасбайға бұйырды. ІІ орынды Жалағаш ауданынан Данияр Есқали жеңіп алса, ІІІ орынды Шиелі ауданынан Мейіржан Қуандық иеленді. Барлық белсенді қатысқан өнерпаздар алғыс хатпен марапатталды.

«Отан деген ордам бар» атты облыстық ән байқауы ұлттық өнерді ұлықтап, жас таланттардың талабын ұштаған, елдік пен бірлікті дәріптеген тағылымды іс-шара ретінде көп­шіліктің көңілінен шықты. Абылай ханның 315 жылдығына арналған бұл өнер мерекесі жастардың бойындағы отансүйгіштік сезімді нығайтып, ұлт­тық рухты асқақтата түсті.