Біздің де «метіркемізді» Әсия апай өз қолымен жазған. Сиясы сол күйі сақталған құжат әдемі етіп ерекше жазылған екен. Анық әрі көркем жазылған жазу – Әсия Масилованың қол­таңбасы. Осы қолтаңба иесі бүгінде сексеннің сең­гіріне шығып, ба­қуатты қалпымен әлі күні ауданның қо­ғам­дық өміріне атсалысып келетіні қуан­тады.

Байырғы ма­ман­­ның айтуынша адам­ның дүниеге кел­ген күннен бас­тап, дүниеден өт­кенге дейінгі өмі­рімен байланысты жағдайды тіркеп оты­ратын АХАЖ-дың 100 жылдан астам тарихы бар. АХАЖ органы алғаш 1921 жылы Қаз КСР кеңес халықтары комитетінің дек­реті негізінде азаматтардың хал актілерін жазу органы ретінде құрыл­ған. Ауданда осы қызметті іске асырған алғашқы қызметкердің бірі – Әсия Масилова.

Дүниеге 1946 жылы Тереңөзекте келген Әсия Нұрылдәқызы – от­басының тұңғышы. Ата-анасының мә­пелеп өсірген қызы өзінен кейінгі інісі Серікбай мен сіңлісі Әсимаға қамқор болып бой жетеді. Оқуда озат, мектепті Күміс медальмен бітірген қазақтың алғыр қызы бір сыныпта елімізге танымал ақын-жазушылар Қайырбек Асанов, Келдібай Уайсов, Асқар Кіребаев, Серік Әлімбетовпен бірге оқығанын мақтанышпен айтады.

– Аудандағы №35 мектепте бізге көбіне ер мұғалімдер сабақ берді. Арасында бір-екі әйел мұға­лімдер болды. Қазақ тілі мен әдебие­тінен сабақ берген Зерхан Сақтағанова, тарихшы Қасымхан Смайлов, орыс тілінің мұғалімі Осахан Мақтымқұлов, химия пәнінен Мырқайдар Мәмбетов, физикадан Нұрділдә Әбдірасилов, математикадан Берікбол Ермаханов, географиядан Кәдір Бердәлиев, директорымыз Әділбек Маханбетов мықты педагогтер еді. Арасында география сабағынан Дәнеш Мамытбаева сабақ беретін. Әлі есімде Дәнеш апайымыз бізге «Әлем картасын біліңдер, қай мемлекет қай жерде орналасқанын, олардың астанасын біліңдер, сонда сендер мықты боласыңдар» дейтін. Мұғалімдердің сабағына бар ынта-ықыласымызбен қатысатынбыз. Тіл маманының ұмытылмас сабақтарын әлі күнге еске аламын. Зерхан апайы­мыздың арқасында қазақ әдебиетін сүйіп оқыдық. Арамыздан ақын-жазу­шы­лардың көптеп шығуы осы ұстазымыздың арқасы деп ойлаймын. Мектепте жақсы оқуға тырыстық. Қоғамдық жұмыстарға белсенді араласып, комсомол коми­тетінің жетекшісі болдым. Қазір ойла­сам мектепте алған білімімнің арқасында маған жауапты қызмет сеніп тапсырылған екен, – дейді өткен күндерді еске алған Әсия Нұрылдәқызы.

Белсенді жас мектеп қабыр­ғасынан үздік білім алған соң, жүрек қалауымен Қызылорда педа­гогикалық институтына оқуға түседі. Институттың екінші курсында тұрмысқа шығып, әрі қарай оқуын жалғас­тыруға мүмкіндігі болмайды. Жиырма жасында ауданның бірінші басшысы Қ.Қазантаевтың қабыл­дауында болып, секретарь-маши­нисткаға үміткер 3 қыздың арасынан өзінің сауаттылығымен ерекшеленіп, қызметке қабыл­данады. Атқарған жұмысына тия­нақты, құжат толтыруда қате жібер­мейтіндігімен ерекшеленіп, жазуы мақтаулы маман 3 жыл бойы аудандық партия комитетінде тәжірибе жинайды. 1968 жылы Қ.Қазантаевтың бұйрығымен ау­дан­дық АХАЖ бөліміне меңгеруші болып тағайындалады. Осы салада табан аудармастан 17 жыл қызмет атқарған жылдары туралы Әсия Масилова:

– Аудандық АХАЖ бөлімі құжаттарды тіркеумен айналысады. Ол кезде бар­лығы қолмен жазылатын. Құжатты сауатты, әрі әдемі етіп жазуға дағ­ды­ландым. Қате жазылса, ол құжатта өмір бойы өш­пестей таңба болып қалады. Сон­­дықтан жа­уапкер­ші­лікпен ат­қару, уақытпен санас­пау мін­детін мінсіз атқару керек. Адам тағдыры құжатқа байланысты, – деді.

Қызметте жүріп Тал­дықорғанда заңгерлік оқу оқып, өз қызметін жауап­­кер­шілікпен ұзақ жыл бойы атқарған Ә.Масилова 24 жасында «Еңбектегі ерлігі үшін» медалімен марапатталады. Ал 50 жасында «Еңбек ардагері» медалін алды. «Сыр­дария ауданының 90 жылдығы» мерекелік медалі ауданның дамуына қосқан зор үлесі үшін берілген марапат деп біледі қарт маман.

Адал еңбегінің зейнетіне шық­қан Әсия апай бір зейнет­ақыға қарап, қол қусырып отыруды жаны қаламады. Узтоп елді-мекенінен жеке қожалық ашып, мал ұстап, бала-шағасының қамын жасады. Өмір­лік серігі Төлен Әлиевпен бірге 3 ұл, 1 қыз тәрбиелеп өсірді. Қазір де еңбектен қол үзгенді жаны қаламайды. Рүстем, Жәнібек, Дәурен, Алмадан өрбіген ұрпаққа бас-көз болып, бақытқа кенелуде. Әсия апай күнделікті дағдысымен аудан өмірінен, жақсы жаңалығынан хабардар болып отыруды жөн көреді. Аудандық газеттің тұрақты оқырманы. Жазылу науқанынан қа­лыс қал­ған емес. Кент ардагерлері ұйы­мы төрағасының орынбасары, ардагерлер ұйымының алқа мүшесі.

– Бұрыннан қалыптасқан әдетім­мен ең алдымен аудандық газетті оқимын. Газеттің келетін уақытын күтіп отырамын. Сәл кешіксе, дереу редакцияға хабарласып, мән-жайды білемін. Ауданның айнасы – қатталып жатқан тарих. Жақсы жаңалықтар мен елдегі жағдайдан хабардар етіп отырады. Қолым қалт етсе, аудандық кітапханаға бара­мын. Іс-шараларға шақырады. Немерелерімді де кітап оқуға үйретімін. Ақылдың кені – кітапта. 7 немерем мен 5 шөберемнің қызы­ғына тоймай жүрген жайым бар, – дейді өмірде де, қоғамдық қызметте де белсенді Әсия апа.

Үнемі қозғалыста жүретін Әсия апаның қимылы шалт, өмір сүру дағдысын саламатты өмірге, дұрыс тамақтануға бағыттаған. Жасы үлкейген сайын адамға қажетті қозғалыс пен дұрыс тамақ екенін жақсы біледі және осындай салтқа дағдыланған. Жаяу жүруді әдетке айналдырып, ауырмаудың жолын іздейді.

Жақсы ұстаздан тәлім-тәрбие алып, ата-ана жолын жалғаған Әсия Масилова адал еңбек етіп, халықтан алғыс алды. Өзінен кейінгі жылдарда Зинахан Әбілдаева, Алтын Есболғанова, Жұлдызай Дүзімбетова, Салтанат Бекжүнісова­ның қызметіне қам­қорлық көрсетіп, ақыл-кеңесін беруде аянып қал­мады. Сала ардагері ретінде әріп­тестері де құрмет көрсетіп, төрден орын береді.

Өнегелі өмір сүріп, АХАЖ сала­сының ардагері атанып, үлкендіктің жолында келе жатқан Әсия апайға ұзақ өмір тілейміз.