Іс-шара барысында қатысушылар конди­терлік өнімдерді дайындаудың қыр-сырымен танысып, түрлі тәтті тағамдарды әзірлеудің әдіс-тәсілдерін үйренді. Шеберлік сағатын білікті кондитер, жеке кәсіпкер Зіннәт Маткаримова жүргізіп, өзінің тәжірибесімен бөлісті. Негізгі мамандығы медицина саласы болғанымен, кон­дитерлік бағытта да үлкен жетістіктерге жеткен маман жастарға еңбекқорлық пен ізденістің ма­ңызын атап өтті.

Зіннәт Жеңісқызы – аудан мақтанышына айналған жас кәсіпкерлердің бірі. Ол Қорқыт ата атындағы Қызылорда университеті мен «Атамекен» Ұлттық кәсіпкерлер палатасы ұйым­дастырған байқауда Сырдария ауданы бойынша І орын иеленіп, 50 мың теңге көлеміндегі сыйақыны жеңіп алды және облыстық кезеңге жолдама алды. Облыстық байқауда 88 жоба ара­сынан үздік танылып, ІІ орын иеленіп, 100 мың теңге сыйақымен марапатталды. Сонымен қатар Сырдария ауданының атынан қатысып, жүлделі орындарға ие болып, финалға өтті.

Жас кәсіпкердің жетістіктері бұқаралық ақ­па­рат құралдарында да кеңінен насихатталуда. Атап айтқанда, Қызылорда телеарнасына шақырту алып, арнайы сұхбат берді. Сондай-ақ «Сыр бойы», «Кәсіпкер келбеті», «Тіршілік тынысы» газеттерінде мақалалары жарияланып, еңбегі көпшілікке таныстырылды.

Зіннәт Жеңісқызы қоғамдық жұмыстарға да белсенді қатысып келеді. Аудандық Жастар ресурстық орталығының ұйымдастыруымен өткен «Қолыңнан келсе, қолғабыс ет!» қайырым­дылық акциясы аясында көше тазалықшылары­на ыстық ас үлестіріп, қайырымдылық шарасына өз үлесін қосты. «Қыз еркем – бұрымымен көркем» байқауына демеушілік танытып, жас­тар бастамаларын қолдауға атсалысты. Еңбегі еленіп, 2025 жылы Сырдария ауданы әкімінің «Өрлеу» сыйлығының иегері атанды. Осындай жетістіктері арқылы ол жастарға үлгі болып, кәсіпкерлік пен шығармашылықты қатар алып жүруге болатынын дәлелдеп келеді.

Кездесу барысында қыз-келіншектер тек жаңа дағдыларды меңгеріп қана қоймай, өзара пікір алмасып, шабыт алып, шығармашылық қабілеттерін дамытты. Қатысушылар прак­тикалық жұмыстарға белсенді араласып, тәтті өнімдерді әзірлеу процесіне ерекше қызы­ғушылық танытты. Жылы атмосферада өткен іс-шара әрбір қатысушыға көтеріңкі көңіл күй сыйлап, жаңа идеялардың туындауына ықпал етті. Жастар ресурстық орталығының кеңесшісі, «ErkeZHAN» қыздар клубының жетекшісі Жансая Байтәжиева өз сөзінде мұндай іс-шаралардың қыз-келіншектердің жан-жақты дамуына үлкен әсер ететінін атап өтті.

– Бүгінгі шеберлік сағаты тек тәтті тағам әзірлеуді үйретумен ғана шектелмейді. Бұл – қыз­дардың кәсіпке деген қызығушылығын оятып, өз қабілеттерін шыңдауға бағытталған маңызды алаң. Зіннәт Жеңісқызының жетіс­тіктері көптеген жасқа мотивация болары анық. Алдағы уақытта да қыздардың шығармашылығы мен кәсіпкерлігін қолдауға бағытталған жобалар жалғасын табады, – деді клуб жетекшісі Жансая Нұрланқызы.

Іс-шара соңында белсенділік танытып, тәжі­ри­бесімен бөліскен Зіннәт Маткаримоваға аудандық жастар ресурстық орталығының арнайы Алғыс хаты табысталып, сый-сияпат табыс­талды.