Аудан басшысы атқарылып жатқан жұмыстарға тоқталып, әрбір мүгедектігі бар азаматтың қоғам өміріне толыққанды қатысуы үшін барлық қажетті жағдайлар жасалуы тиіс екенін жеткізді.

– Инклюзивті саясат – бұл тек әлеуметтік қолдау ғана емес, қоғамның әрбір мүшесіне тең мүмкіндік беру қағидаты. Қазіргі таңда ауданда мүгедектігі бар 1454 адам тіркелген, оның 60-ы — 18 жасқа дейінгі балалар. Оларды әлеуметтік оңалтумен қатар, инклюзивті біліммен қамту, тұрғын үй жағдайын жақсарту, мәдени-спорттық шараларға қатысуына жағдай жасау және кедергісіз орта қалыптастыру бағыттарына ерекше назар аударылуда. Биыл ауданымызда 7 нысанды бейімдеу жоспарланса, бүгінгі күні 5 нысан толық дайын болып, қолжетімділіктің интерактивті картасына енгізілді. Қалған 2 нысанның жұмыстары екінші тоқсанда аяқталады. Сонымен қатар, мүгедектігі бар 95 баланы үйде оқыту шығындарын өтеуге 9 млн 407 мың теңге қаралып, бірінші тоқсанда 71 баланың ата-анасына тиісті төлемдер тағайындалды. Жеке оңалту бағдарламасы бойынша түскен 820 өтініштің 629-ы орындалды. Бұл бағыттағы жұмыстар тұрақты бақылауда, — деді Берік Әбдіғаппарұлы.

Жиын қорытындысы бойынша сала басшыларына инклюзивті ортаны дамытуға бағытталған бірқатар нақты тапсырмалар жүктелді.