Осы аптаның басында редакцияға оқушы ба­ла ерткен шағандық ұстаз Гүлнұр Досбай келді. Жа­нындағы оқу­шысын таныс­тырған ұс­таз: «Менің оқушым – Нұрислам Ай­бекұлы – өте да­рынды бала. Оқушының жетістігін ай­тып тауысу мүмкін емес. Нұрислам бір миллион ұтқан бала» деп қуанышты көңіл-күйін байқатты. Шын мәнінде, Нұр­ислам туралы бізде естіп, газет бетінде оның жетістігі туралы жаз­ған­быз. Дегенмен талантты баламен бет-бет жүз­десіп, әңгімелесудің сә­ті түскеніне біз де қуандық.

Жанымызға жайғасқан 12 жастағы баланың тұла бойынан тектіліктің иісі аң­қығандай болды. Сұрай келе, Нұрислам ұстаздар әулетінің ұрпағы екенін білдік. Жеткіншек ауыл балаларына ұзақ жыл білім мен тәрбие берген, туған жері Шаған ауылындағы білім ошағында басшы болған Нұрлан Алдабергенов пен ардақты ұстаз Баян Жәлімбетованың не­мересі екен. Отбасында бес ұлдың ортаншысы болып өсіп келе жатқан дарынды баланың да ата-анасы – ауылға белгілі азаматтар. Әкесі Айбек Нұрланұлы – мұғалім, анасы Ләйла Жукеева – дәрігер. Балаларының дамуына, қызығушылығына кішкентайынан ден қойып, барынша жағдайын жа­сауға ұмтылатын ата-ана Айбек пен Ләйла Нұрисламның да бойы­нан ерекше қабілетін бай­­қап, баласының талантын шыңдауға аянып қалмайды. Қажетті тех­ника мен құрал жаб­дықтарын алып беріп, қызы­­ғу­­­шылығын дамытуға жағ­дайын жасайды.

Қазақта «Талант деп өнері мен ақылын іс­ке асыра алатындарды айта аламыз» деген тәмсіл бар. Бұл сөз шын мәнінде Нұрисламға қара­та айтыл­ғандай. Ауыл мекте­бін­де оқып, ұстаз­дарынан білім мен тәрбие алған оқушы бастауыш сынып­та оқығанда-ақ өнерге жақын болады. Оның әдемі дауысы, тамылжыта ән салуы талай байқауларда топ жаруына септігін тигі­зеді. Алдымен аудандық деңгейде танылып, кейін облыстық, республикалық байқауларға жолдама алып, шет тілінде ән шыр­­қаған өнерпаз сахнада шарықтай түседі. Өнердегі жолын кино әлемімен ұштастыруды мақ­сат етіп, қиялына қа­нат бітіреді. Киноиндуст­­рия саласын бағындыру үшін ізденеді. Өткен жылы «KAZ PFODUCTION» киностудиясында «Актерлік оқу-әдістемесі, актерлік ше­­берлік» және «Сахна мә­дениеті» тақырыбында арнайы білім алды. Бұл талантты баланың өнерді ба­ғындырудағы тың ізде­нісі болды. Нәтижесі де көп күттірмеді. Бір емес, бірден екі киноға түсіп, өнердің тағы бір саласында өзін байқатты.

Қазіргі уақытта өнер мен шығармашылығын шың­­­­дап, ІТ саласына ден қой­­ған талапты оқушы жаңа бағдарлама ойлап тауып, осы оқу жылында Қызылордада өткен «Inno Fest Qyzylorda» инно­­вациялық IT жобалар сайы­сында «Software Dev» бағытында топ жарып, 1 миллион теңге сыйақыға ие болады. Аудан абы­ройын асқақтатқан Нұр­ислам жобасын сәтті қорғап, қазылар алқа­сы­ның жоғары ба­ғасын алды.

– Нұрислам – өте дарынды оқушы. Ол информатика, ағылшын және физика пәндерін ерекше ұнады. Өнерден де құр алақан емес. Ағылшын, француз тілінде ән айтқаны керемет. Болашағынан зор үміт күттіретін оқушы біздің мақтанышымыз, – дейді дарынды баланың ұстазы Гүлнұр Дос­бай.

Қолынан ұялы телефоны мен ноут­бугы түспейтін жасөспірім шақ­тағы өнертапқыш өз сөзінде ұялы телефонға арналған қауіпсіз опера­ция жүйесін шығарғанын айтты. Бұл жобаға 7 ай уақытын жұмсап, «Android» пен iOS-қа қарағанда мықты әрі қауіпсіз жүйе деп танылған. Арнайы бағдарлама телефонды хакерлік шабуылдардан қорғап, байланыс құра­лының жұмысын жылдамдатуға мүмкіндік береді. Жас өнертапқыш ұялы телефонға арналған жүйені «Extrnos» деп атаған. Бұл идеясын жетекшісі, №37 мектеп-лицейдің информатика пәнінің мұғалімі Гүлзат Ыбыраймен бірге жүзеге асырған. Оқушы­сының талабын ұштаған мұғалімі оның ынтасын арттырып, пән олимпиадалары мен түрлі бай­қауларға қатысуына ықпал етеді. Кейіннен Қызылорда стартаптар мен ІТ өңірлік хабының жетекшісі Жанарыс Түбекбаевтан сабақ алып, жаңа технологияның қыр-сырына қаны­ғады.

– Мен алдымен ағылшын про­граммисі Терри Дэвистің 64-биттік операциялық жүйесін зерттеп, қада­ғаладым. Соған ұқсас жүйе ойлап тапқым келді. Нәтижесінде, «Extrnos» атты жоба дүниеге келді, оған 7 ай уақыт жұмсадым. Бұл – ұялы телефонға арналған, Android пен iOS-қа қарағанда мықты әрі қауіпсіз жүйе. Телефонды хакерлік шабуылдардан қорғауға, байланыс құралының жылдам қозғалуына, яғни қатып қалмауына мүмкіндік береді, – деді Нұрислам Айбекұлы өзі қатысқан ауқымды жоба туралы.

Небәрі 12 жасында шығармашылық ізденістен талмай, шаршамай одан әрі дамытуды мақсат еткен жас талант иесі бос уақытын өнер мектебінде өткізеді. Аудан орталығындағы өнер мектебіне келіп, ұстазы Гүлжан Дос­баевадан дәріс алады. Ауылдағы музыка жетекшісі Гүлшат Боранбаева ашқан талантын кәсіби тұрғыда меңгеруге шындап кіріскен. Осы күні қоржынында талай байқаудың жүлдесі бар талантты оқушы алдағы уақытта да шығармашылықтан қол үзбей ІТ саласында биік белесті бағындыруға бел буған. Оның әрбір қадамы мен қолға алған жобасы сәтті болуына тілектеспіз. Ағылшын тілін еркін меңгерген шағандық оқушы болашақта мықты бағдарламашы болу­ды армандайды.