Осындай қызығы мен өзіндік ауырт­палығы қатар жүретін салада табан аудармай 43 жыл қыз­мет атқарып, сан мыңдаған оқыр­манның жүрегіне жол таба білген Майра Балмағанбетованың еңбек жолы – тұтас бір дәуірдің айнасы іспетті. Бұл жылдар – тек уақыт өлшемі емес, білім мен мәдениеттің, ізденіс пен ізгіліктің үздіксіз жалғасқан шежі­ресі. Кітапхана тынысымен бірге тіршілік етіп, әрбір оқырманға бағыт-бағдар беріп, рухани бай­лыққа жетелеген жан жас буын кітап­­­ханашыларға әркез үлгі-өне­ге көрсетіп, тәжірибесімен бөлісіп отырады.

Аудандық орта­лық­тан­ды­рыл­­­­ған кітап­ханалар жүйе­сінің библиографы Майра Сражад­дин­қызы жақында зейнет демалысына шықты. Аяулы әріптесті қыз­меттестері салтанатты түрде шығарып салды. «Руханият орта­лы­ғында» өткен жиынға аудандық мәдениет бөлімінің бас­шысы Анар Қалдыбаева, орта­­лық­тан­дырылған кітапхана жүйесінің дирек­торы Рүстем Бай­ділдаев, кітап­ханашылар қатысты. АХАЖ бөлімінің басшысы Салтанат Бекжүнісова зейнет демалысы­на шыққан кітапханашыға куә­лігін салтанатты түрде табыс етті. Өз кезегінде бөлім бас­шысы әріптестері арасында зор беделге ие болған Майра Балмағанбетованы мерейлі жасымен құттықтап, аудан әкімінің құттықтауын табыс етті.

– Сізге кітапхана саласында қырық жылдан астам уақыт бойы адал еңбек етіп, оқырмандарға рухани азық сыйлап, мәдениет пен білімнің дамуына қосқан зор үлесіңіз үшін шынайы ал­ғы­сымды білдіремін. Сіздің көп­жылдық тәжірибеңіз, жоғары кәсі­билігіңіз бен жауапкершілігіңіз өскелең ұр­пақты білім мен кітапқа баулуда. Кітапхана ісін дамытуға, оқырман мәдениетін қалыптастыруға сіңір­ген еңбегіңіз ерекше құрметке лайық. Саналы ғұмырыңызды рухани қазынаны сақтап, ұрпаққа білім мен тәрбие дәнін себуге арнадыңыз. Сіздің еңбегіңіз – өлшеусіз. Сізге зор денсаулық, ұзақ ғұмыр, отбасыңызға амандық пен бақ-береке тілеймін, – деген аудандық мәдениет бөлімінің басшысы кітапханашыға сый-құрмет көрсетті.

Айта кетейік, Майра Балмаған­бетова – жоғары білікті маман, өз ісінің білгірі. Еңбек жолын 1982 жылы №20 филиал кітапханасының кітапханашысы болып бастап, сол кезеңнен бері ру­ханиятқа, білім мен мәдениетке саналы ғұмырын арнап келеді. 1984 жылы Ақтөбе қаласындағы мәдени-ағарту училищесінің «кі­тап­хана ісі» мамандығы бойын­ша білім алса, еңбектен қол үзбей, 1988 жылы Шымкент қала­сындағы институтқа түсіп, 1992 жылы «кітапханашы-биб­лиограф» мамандығы бойынша бітіріп шығады. Өз ісінің маманы атану үшін ең алдымен маман­дығыңа деген махаббат керек десек, кейіпкеріміз өз ісі­нің шебері екенін көрсетіп, үздік тәжірибесін кейінгі буынға үйре­тіп келеді. «Кітапқа қызмет – ғұмыр­лық міндет» деп білетін жан аудандық орталық кітапхананың әдістемелік-библиографиялық бөлімінде библиограф қызметін абыроймен атқарып, зейнет демалысына шықты. Іс-тәжірибесі мен біліктілігінің арқасында оқыр­манға бағыт-бағдар берумен қа­тар баспа шығармалары туралы ақпарат беру, библиографиялық көр­­сеткіш пен құрал шығару, өлке­тану жұмыстары, ұсыныс тізім­­дері, картотекалар мен анық­­­­тамалар дайындау, маман­дарға кәсіби кеңес беру мақ­са­тында семинар-кеңестер, ше­бер-сынып ұйымдастыру – оның негізгі міндетінің бір бөлігі ғана. Ұзақ жылғы еңбегінің нәтижесі лайықты бағаланып аудан, облыс көлемінде Алғыс хаттармен марапатталған кітапханашы осы саланы өмірлік серік еткенін мақ­тан тұтады.

– Кітап – адам баласының ең сенімді серігі, сарқылмас рухани қазынасы. Осы қасиетті дүниеге қызмет ету мен үшін жай ғана жұмыс емес, өмірлік парыз болды. Осы жылдар ішінде талай оқыр­манмен жүздесіп, олардың білімге деген құштарлығын көріп, өз еңбегімнің мәнін тереңірек тү­сіндім. Кітапхана – киелі орын, сол орданың бір бөлшегі бол­­ғанымды әрдайым мақтан тұтамын. Өмі­рімнің ең мәнді де мағыналы кезеңі осы саламен тығыз байланысты өтті. Ең бастысы – кейінгі буын кітапқа жақын болып, рухани байлығын арттыра берсе екен деймін. Себебі, кітап бар жерде – білім бар, білім бар жерде – болашақ бар, – дейді Майра Сражаддинқызы.