Ең алдымен, мектеп директоры Зәуре Білісбаева ғылыми жоба, сондай-ақ спорт, ән, сурет бай­қауларынан жеңімпаз атанған бір­шама оқушының жетістігін бөлім бас­шысына таныстырды. Ал жас тех­но­логтардың еңбегі жоғары баға­ланды.

– Білім саласының күрделі еке­нін сарапшылар айтып келеді. Құрылымдық жағынан ауқымды бұл саланың өркендеуіне барымызды саламыз. Мектептегі әрбір кадр баланың сапалы білім алуына жағдай жасауы тиіс. Өз басым, оқушының талапты болуымен қатар, тереңнен іздене білуіне аса көңіл бөлемін. Сіздердің жетістіктеріңіз тек мектептің, ауылдың ғана емес, аудан білім саласының мерейін тасытады. Қазіргі уақытта жасанды интеллект күн санап дамып келеді. Жаңашылдыққа бет бұрған әр білім алушыға мүмкіндік жеткілікті. Алдағы уақытта мамандықтан жаңылыспау үшін өз ісінің білгірі болуға мектеп жасынан ұмтылуымыз керек. Дарынды оқушыны тану, қолдау және бағыттау – ұстаз бен ата-ананың ортақ міндеті. Дұрыс бағыт беріліп, еркін ойлауына мүмкіндік жасалған жағдайда, бүгінгі дарынды оқушы – ертеңгі білікті маман, ел тірегі болары сөзсіз, – деді Еркебұлан Төлепбергенұлы.

Кездесу барысында дарынды оқушылар білім алудағы озық технологиялардың мүмкіндіктерін жан-жақты айтып берді. Еркін ойын жеткізген бірнеше оқушыдан білім бөлімінің басшысы осы уақытқа дейін жинақтаған тәжірибелерімен бөлісуді сұрады.

– Қазіргі уақытта жаңа көзқа­распен қарайтын жалынды жастар еліміздің жаңару үде­рістеріне белсене қатысуда. Мектеп оқушылары арасында толағай табысқа жеткен жандар аз емес. Күн­делікті ұстаздар қауымы оқушының қабілетін арттырып, биік шыңдарды бағындыруға тәрбиелеуде. Кез келген пән бойын­ша жаңашылдық енгізіп, дарынды оқушылар қатарын көбейту – басты мақсатымыз. Бүгінгі дарынды оқушылар ғылым мен білім­ге ғана емес, өнерге, спортқа, шығар­машылыққа да бейім. Олар ерте жастан зерттеу жұмыстарына араласып, жобалар жасап, түрлі олимпиада мен байқауларда ел намысын қорғап жүр. Интернет пен цифрлық кеңістікті тиімді пайдаланып, өз қабілетін дамытудың тың жолдарын таба біледі, – деді мектеп директоры.

Еркін форматта жүзеге асқан кездесуде бірнеше оқушы марапат төрінен көрінді.