Адамгершілікті дәріптеген ақын
Өткен жылдың қарашасында қазақтың көрнекті ақыны журналист, аудармашы, ҚР Мемлекеттік сыйлығының лауреаты, «Парасат» және «Құрмет» орденінің иегері Күләш Ахметова дүниеден өтті. Ақын, Сырдария ауданының құрметті азаматы Қайырбек Асанов ауданға арнайы келіп, зайыбының рухына Құран бағыштау мақсатында ас берді. Оған аудан әкімі Берік Сәрменбаев, Сырдария ауданының құрметті азаматы Ибрагим Әбибуллаев, Қазақстанның Еңбек сіңірген қайраткері Көсемәлі Сәттібайұлы, ақын Қатира Жәленова және ауданның зиялы қауым өкілдері қатысты.ң алдымен, Сыр өңіріне келген Қайырбек Асанов пен Көсемәлі Сәттібайұлы іргелес жатқан Қармақшы ауданына барып, Қорқыт атаға тәу ету жоспары жөнінде айтқан болатын. Осыған орай аудан әкімі Берік Әбдіғаппарұлының тапсырмасымен «AMANAT» партиясы Сырдария аудандық филиалының атқарушы хатшысы Ақтөре Ибрагимұлы ардақты азаматтарды Қармақшыға алып барып, олар Қорқыт ата кешенімен және мемориалды музейімен танысты. Қайырбек Асанов пен Көсемәлі Сәттібайұлы Қорқыт бабаға тәу етіп, рухына құран бағыштады. Тарихи орын туралы сұрақтарын қойып, маманмен пікірлесіп, жауап алып, естелік суретке түсті.
Кеше Тереңөзек кентіндегі «Руханият орталығының» жұмысымен танысқан құрметті меймандар аудандық тарихи-өлкетану музейіндегі жәдігерлердің тарихына қанықты. Өз кезегінде аудандық орталық кітапханада ақын Күләш Ахметоваға арналған бұрыш көпшілікке таныстырылды. Ақынның өмірі мен шығармашылығына арналған бұрышта ардақты жанның еңбектері мен рухани мұрасы кеңінен насихатталып, кітаптары қойылған. Аудандық орталық кітапхананың кітапханашылары аяулы ақынның өлеңдерін жатқа оқыды.
– Күләш Ахметова – қазақ поэзиясының биік тұлғасы, сыршыл да шыншыл өлеңдерімен ел жадында қалған көрнекті ақын. Ол өз шығармалары арқылы ұлттық рухты, ана тіліне деген құрметті, адамгершілік пен тазалықты дәріптеді. Ақынның әдеби мұрасы – бүгінгі және келер ұрпақ үшін баға жетпес рухани қазына, – деді аудан әкімі.
Бұл ретте, Күләш Ахметованың рухына құран бағышталып, ас беріліп, жиналған қауым тарапынан көптеген естелік әңгіме айтылды. Сырлы да нәзік жырларымен оқырман жүрегінен жол тапқан ақын шығармашылығы – ойлы оқырманның мәңгі жадында.
Айта кетейік, қазақтың Күләштай аяулы ақыны өмірден өткенде аудан басшысының тікелей тапсырмасы бойынша зиялы қауым өкілдері Тараз қаласына барып, Сырдария жұртшылығы атынан көңіл айтқан еді. Сонымен қатар аяулы ақынның өмірден өткеніне қырық күн толуына байланысты өткен аста сырдариялық жұртшылық арнайы барып қатысты.
Күләш Ахметоваға арналған іс-шараға қолдау көрсеткен аудан басшысына Қайырбек Асанов өз ризашылығын білдірді.
Балтабай ОРДАБЕКОВ
