Меценат мерейі
Жерлестер мақтанышына айналған кәсіпкер Мақсұт Әбілдаев – туған өлкенің шын жанашыры. Сәкен Сейфуллин ауылынан түлеп ұшқан азамат соңғы жылдары ауыл ахуалын тұрақты назарға алып, қамқорлық қолын созуда. Меценат Мақсұт Әбілдаев көптеген қайырымдылық шараларына үн қосумен қатар ауыл мектебіне, жарықтануына қаржы бөліп келеді. Жақында Елордадан ақжолтай хабар жетті. Сырдария ауданының Құрметті азаматы, «Жел-Кен-Вент» ЖШС директоры Мақсұт Әбдіғаппарұлы елімізде қайырымдылық пен ізгі істерді насихаттаудағы еңбегі үшін «Қайырымдылық саласындағы құрметті атақ» иегері атанды.
Мақсұт Әбдіғаппарұлына аталған марапат жақында Астана қаласында Қазақстан Республикасы Мәдениет және ақпарат министрлігінің ұйымдастыруымен өткен ХІІ Республикалық Азаматтық форум аясында арнайы табысталды.
Бұл атақ кәсіпкерге көп жылдар бойы туған жердің әлеуметтік, мәдени және рухани дамуына қосқан зор үлесінің, ел игілігі жолындағы игі істерінің нәтижесінде берілді, еңбегі лайықты бағаланды.
Меценаттық қызметі мен азаматтық ұстанымы арқылы аудан жастарына өнеге болып жүрген Мақсұт Әбдіғаппарұлының бұл жетістігі – Сырдария ауданы жұртшылығы үшін де зор мақтаныш.
Айту керек, жерлестер мақтанышына айналған кәсіпкер Мақсұт Әбілдаев – аудандық газеттің тұрақты қолдаушысы. Қолдауының жарқын көрінісі ретінде кәсіпкер жыл сайын сырдариялық бірқатар ардагерге аудандық «Тіршілік тынысы» газетін тегін жаздыртып береді. Сонымен қатар жас журналист Балтабай Ордабековтің жарық көрген алғашқы кітабы «Әке – қорғаным» жинағының жарыққа шығуына демеуші болды.
«Тт» ақпарат
