Іргесіне құт қонған ел
Аудан орталығы Тереңөзек кентімен ауылы аралас, қойы қоралас жатқан Сәкен Сейфуллин елді мекенінің тарихы өткен ғасырдың 30 жылдарынан басталады. Сол жылдары «Құндызды» және «1 Май» серіктестіктерінің бірігуі арқылы «Каганович» колхозы болып аталған. 1959 жылы «Каганович» пен «Аманкелді» колхоздары бірігіп, Ленин аты берілген. 1963 жылы бірігу одан әрі жалғасып, «Қызылдихан» мен «Ленин» колхозы ХХІ партсъезд атындағы совхозға айналады. Осы атаумен 1975 жылға дейін аудан тарихында жазылған елді мекен қазақтың қайраткер ұлы, ақын Сәкен Сейфуллин ауылы болып қайта құрылады. Міне, бүгінде тура 45 жыл бұрын осы атаумен аталған елді мекеннің іргесі құт қонған елге айналды. Ал С.Сейфуллин атындағы совхоз болып аяққа нық тұруына себепші болған оның алғашқы директоры Жақай Бодықбаевтың есімі ауыл тұрғындарына етене таныс.С.Сейфуллин совхозын басқаруды қолға алған Ж.Бодықбаев жас мамандарды, тәжірибелі кадрларды топтастырып, ауылдың әлеуметтік-экономикалық өсуіне жағдай жасағанын, қажырлы еңбек еткенін бүгінде көзі тірі ақсақалдар жақсы біледі. Солардың бірі еңбек ардагері, ауданның Құрметті азаматы Рақымжан қажы Бәйменов білікті басшы туралы: «Халықтың ерекше ықыласы ауған, есімі ел аузына іліккен азамат болды. Іскер басшы жас мамандарды әркез қолдап отырды. Ж.Бодықбаев совхозды 5-6 жылдай басқарып, облыста бірқатар жауапты қызмет атқарды. Оның халыққа деген адал қызметін ел-жұрт жақсы біледі» дейді.
Қазіргі таңда жаңаша даму жолына түскен ауылдағы 308 отбасында 1645 халық тұрады. Түтіні түзу ұшқан ауылды қолдау бағытында соңғы жылдары мемлекет тарапынан қыруар қаржы бөлініп, мемлекеттік бағдарламалар аясында ауқымды жұмыстар атқарылуда. Елді мекенде 90 орындық балабақша, 150 орындық ауылдық клуб, мектептің акт залы, фельдшерлік-акушерлік бекет, ауыл әкімдігінің ғимараты салынып, пайдалануға берілген. Ұзақ жыл бойы шешімін таппаған ауыз су мәселесі де түбегейлі шешілген. Ауыл көшелері жөнделіп, жарықтандыру жүргізілген. Сонымен қатар «Тағзым алаңы», мәдени-демалыс орыны бой көтерген.
Ауылдың ауызбірлігін сақтауда ардагерлер кеңесінің, қоғамдық кеңесінің жұмысы жолға қойылған. Ауыл әкімі қандай мәселе болмасын алдымен ауылдың аузы дуалы ақсақалдарымен кеңесуді дәстүрге айналдырған.
– Ауыл тұрғындарының әлеуметтік қамсыздандыру мәселесі күн тәртібінен түскен емес. Ең әуелі аз қамтамасыз етілген, көп балалы отбасыларды қолдау ауыл кәсіпкерлерінің, шаруашылық басшыларының демеушілігімен қамқорлыққа алынды. Ауылдағы іргелі шаруашылықтар қатарында «С.Сейфуллин Жер» ЖШС, «Құндызды Жер» ЖШС және «Жандос» шаруа қожалығы бар. Шаруашылық басшылары ауыл тұрғындарының кез келген мәселесін бірлесіп шешуге атсалысып келеді. Елдегі күрделі жағдайдан шығу жолында қайырымдылық шараларын жасап, тұрғындардың жұмыспен қамтылуына жағдай жасап отырған шаруашылық басшыларына ризашылығымызды білдіреміз. Барлық кезде туындаған мәселені, алдағы жоспарларды ауылдың ақсақалдарына, шаруашылық басшыларына айтып, кеңесіп аламыз, – дейді ауыл әкімі Бекзат Қыдырбаев.
Ауылдық округте 80 кәсіпкерлік субъектісі тіркеліп, оның 74-і шаруасын дөңгелетіп отыр. Осы жылдың басынан жаңадан 23 кәсіпкерліктің тіркелуі елдің еңсесі тік екенін аңғартады. Бір ғана «Еңбек» нәтижелі жұмыспен қамтуды және жаппай кәсіпкерлікті дамыту» бағдарламасының екінші бағыты бойынша 11 жоба қаржыландырылып, мемлекеттік грант берілген. Мұнан басқа «Өңірлік инвестиция орталығы» микроқаржылық ұйымынан 5 млн теңге құрайтын 2 жоба ұсынылып, оң шешіммен несиеленген. Ауылдағы шаруа қожалықтары мен екі серіктестік биылғы жылы 1946 гектар жерге күріш егіп, жоғары өнім жинаған. Сонымен қатар тұрғындар бақша дақылдарын егіп, жыл сайын мол өнімге қол жеткізуде.
Биыл С.Сейфуллин ауылының өз алдына шаңырақ көтергеніне 45 жыл. Тарихи кезеңмен ауылдағы №137 орта мектептің 90 жылдық мерейтойы да қатар келді. Білім ордасының ұстаздары өскелең ұрпаққа тағылымды тәрбие мен сапалы білім беріп келеді. Ауыл мектебі жүрегі елім деп соғатын елжанды азаматтардың құтты мекеніне айналды.
Білім ошағы Әбу Қуандықов, Ғабит Тұяқбаев, Айнаш Есекеева, Тәттігүл Қартаева, Рахия Есназарова сынды ғалымдарды шығарды. Есімі елдің әдеби ортасында белгілі ақын-жазушылар Қанапия Дәрібаев, Сейфолла Оспанов, Ахат Жанаев, Келдібай Уәйісұлы, Мұқанбетқали Құлтайбаев, Әлібек Аюпов, Жұмабай Есбатыров, Нұрмат Мансұр, Алпамыс Арыстанов, Бақтөре Айтбаев, Мұхаммеджан Мансұров та осы ауылдан шыққан талантты жандар.Ауыл тұрғындары қашанда осындай дарынды азаматтарын мақтан етеді
.
Сонымен қатар ауылдан түлеп ұшқан бірқатар азамат соңғы жылдары ауыл ахуалын тұрақты назарға алып, қамқорлық қолын созуда. Атап айтқанда, кәсіпкер Мақсұт Әбілдаевтың қамқорлығына ауыл тұрғындары дән риза. Кәсіпкер көптеген қайырымдылық шараларына үн қосумен қатар ауыл мектебіне, жарықтануына қаржы бөліп келеді. Сондай-ақ жақында ауыл жанашыры он екі ардагердің аудандық газеттің оқырманы болуына атсалысқанын хабарлаған болатынбыз.
Осындай бірлігі бекем, тірлігі мығым ауылдың тыныс-тіршілігі күн сайын жанданып келеді.
Бибісара ЖАНӘЛІ
