Баспаналы болған әрбір қазақ қоныстойын тойлап, жылдар бойы арман еткен үйіне қол жеткізеді. Мемлекеттік деңгейде құрылыс сапасына аса мән беріліп келеді. Бұрындары тозы­ғы жеткен инфрақұрылымды жаңғырту – күн тәртібінен түспейді. Мәселен, Қызылорда облысында соңғы үш жылда қаржыландырудың барлық көзінен 2 млн 500 мың шаршы метр тұрғын үй пайдалануға берілді. Кезекте тұрған халықтың әлеуметтік осал топтарына, жалғыз баспанасы апатты деп танылған азаматтарға 5 мыңнан астам пәтер сатып алынып, 25 мыңға жуық тұрғын қоныстойын тойлағаны мәлім. Өңіріміздегі аудандарда жаңадан салынған 1500-ге жуық пәтер табысталғанын айта кетейік. Оның ішінде, Сырдария ауданының да үлес салмағы бар.

Ел Президентінің пәрмені бойынша алдағы уақытта барлық облысқа «Ақылды қала» құ­ру тұжырымдамасы енгізіледі. Тұжырым бір­неше бағытқа бөлінген. Инфрақұрылым сала­сында смарт технологияға иек артылады. Цифрлық басқару жүйесін енгізу арқылы көптеген қызметті автоматтандыру, мемлекеттік қыз­меттерді онлайн көрсету, ашық деректердің пл атформасын қалыптастырудың маңызы зор. Қазіргі уақытта дамыған мемлекеттерде қалдықтарды сұрыптау және қайта өңдеу, жа­сыл аймақ пен саябақты көбейту, ауа сапасын, шуды, тем­ператураны бақылайтын датчик ор­нату «Ақылды қала» тұжырымдамасына жат­қызылады.

Бүгінде шаруалардың бас ауруына ай­нал­ған су тапшылығы мәселесі ешқашан тиісті мемлекеттік органның назарынан шық­пағаны дұрыс.

«Су мәселесін шешу – әлеуметтік тұрақтылықты сақтап, экономиканы дамы­тудың кепілі. Бұл – ұлттық қауіпсіздікті қамтамасыз ететін басты фактордың бірі. Біз соңғы екі жылда осы саланың инс­титуционалдық негізін қалыптастырдық. Атап айтқанда, Су кодексі қабылданды, арнайы министрлік құрылды. Бұл мекеменің алдында ауқымды міндеттер тұр. Оған үстіртін қара­мау керек. Осы жұмыспен жүйелі түрде және жан-жақты айналысу қажет. Осыған орай кәсіби кадрларды дайындау керек, су дип­ломатиясымен айналысатын мамандарды әзірлеу қажет. Қазір құзырлы органдарда еліміздегі су ресурстарының қолжетімді көлемі туралы нақты мәлімет жоқ. Кейбір каналдағы судың 50-60 пайызы далаға кетуде. Суды есепке алу технологиясы әбден ескірген. Суды бөліп тарататын орындарда қазіргі заманға сай құрылғылар жоқ. Шын мәнінде, су – стратегиялық маңызы бар ресурс, сусыз өмір жоқ. Сондықтан бұл сала ұлттық цифрлық жаңғыру жұмысындағы бас­ты бағыттың бірі болуға тиіс» деген Мемлекет басшысы су ресурстарының цифрлық плат­формасын әзірлеу керектігін тілге тиек етті.

Расында, аяқсу мәселесін шешу бо­йынша жауапты министрлік тарапынан нақты шешімдер қабылдану керектігі рас. Солтүстік Арал мен Каспий теңізінің тартылуына байланысты да көптеген дүние бар. Осындай сәтте судың тапшылығын жоюға қатысты нақты шешімдер қабылданып келеді.

«Таза Қазақстан» жалпыұлттық жобасы жыл бойына барлық өңірде жүзеге асырылып келеді. Бұл ретте қоршаған ортаның тазалығына аса мән беретін ел тұрғындары тазалықты табалдырықтан бастағаны жөн. Әр апта сайын сенбілікке шығатын көп­шілік айналаны күл-қоқыстан арылтып, эколо­гиялық акцияның мән-маңызын арттыруда.