Әбсадықовтар әулеті республикаға жолдама алды

«Мерейлі отбасы» байқауы берекесі ұйысқан шаңырақтарды насихаттауға бағытталған. Биыл 11-ші рет өткізілген байқаудың тамыры тереңде. Апта ағымында ұлттық байқаудың облыстық кезең жеңімпаздары анықталды. Жиынға облыс әкімінің орынбасары Мейрамбек Шермағанбет қатысып, республикалық кезеңге жолдама алған отбасыларды марапаттады.

– Отбасы – ұрпақтар сабақтас­тығы мен адам бойындағы рухани-адамгершіліктің бастауы. Тек берік отбасылық дәстүрге орныққан ел ғана мызғымас мемлекет бола ала­ды. Елдің бірлігі мен ынтымағы ең ал­дымен отбасыдан бастау алады. Әке – шаңырақ иесі, ана – отбасының жүрегі, бала – ертеңгі болашағымыз. Осы үштаған бірлікте болса, мем­лекетіміз қуатты, қоғамымыз тұрақ­ты болады. Ұлт қайраткері Мағжан Жұмабаевтың «Ата-аналар баланы тәрбиелегенде дәл өзіндей етіп тәрбиелеуге тырыспау керек, олар баланы өзінен күшті етіп тәрбие­леуі тиіс. Өйткені олардың заманы ата-аналарының өмір сүріп отырған заманына қарағанда ана­ғұр­лым күр­делі, талабы жоғары болатынын ұмыт­паған жөн» деген тағылымды сөзі бар. Сіздер өнегелі ұрпақ тәрбиелеу арқылы еліміздің дамуы мен өркендеуіне өлшеусіз үлес қосып келесіздер. Барлығыңыз да шынайы құрмет пен мәртебелі мадаққа лайықтысыздар, – деді Мейрамбек Зинабдинұлы.

Өңірлік комиссияның шешімімен республикалық конкурста Сырдария ауданына қарасты Шіркейлі ауы­лының тұрғындары Жақсылық Дүйсенбайұлы Әбсадықовтың отба­сы облысымыздың мерейін үстем етеді.

Конкурс қорытындысымен «Ме­рей­лі отбасы» ұлттық конкурсы облыстық кезеңінің жеңімпазы бо­лып сырдариялық Әбсадықовтар отбасы танылып, бас жүлде иеленді. Аралдық Жақыповтар отбасына І орын, қармақшылық Әбілтаевтар әу­летіне ІІ орын, қызылордалық Арысбаевтар отбасына ІІІ орын берілді.

Айта кетейік, ұлттық байқаудың облыстық кезеңінде Сырдария ауда­ны, Аманкелді ауылынан қатысқан Жансейтовтер отбасы «Үлгілі отба­сы» номинациясын жеңіп алды.

3 ұл және 3 қыздан 29 немере 47 шөбере тәрбиелеп, шаңырағында шаттық шалқыған, ата-бабаның сал­тын сақтаған, ұрпаққа үлгі, ел­ге өнеге бола білген нағыз ұлт­тық құндылықтың айнасына ай­нал­­ған Әбсадықовтар әулетіне рес­­­­­­­публикалық кезеңде сәттілік ті­лей­міз!

«Тт» ақпарат