Жұптар жарасымдығы
Қыркүйек айының екінші жексенбісінде елімізде халықаралық отбасы күні аталып өтіледі. Маңызы мен мағынасы мол атаулы күн аясында аудан көлемінде сан түрлі іс-шара өткізу дәстүрге айналған. Бұл ретте аудандық АХАТ бөлімінің ұйымдастыруымен салтанатты жиын болды.Отбасы құндылықтары кеңінен дәріптелген іс-шара Тереңөзек кенті мәдениет үйі ұжымымен бірлесіп ұйымдастырылды. Талай жыл қажырлы еңбегімен танылып, отбасында салиқалы ата-анаға, жастарға жол сілтер қартқа айналған Серікбай Кенжебаев пен Балтөре Мамаеваның отасқандарына 50 жыл толып, алтын той иесі атанып отыр. Ал Қанат Мирамбеков пен Жақсыгүл Омарова күміс тойға жетіп, 25 жылдық белесті бағындыра білді. Қос отбасының мүшелеріне құрмет көрсетіліп, аудан әкімі Берік Сәрменбаевтың Алғыс хаты табысталды. Жақында шаңырақ көтерген Әбибулла Жалғасбаев пен Ләззәт Қайратқызына неке куәлігі берілді.
– Некелі жарымен 25, 50 жыл ғұмыр кешкен ел ағалары отбасының тірегіне айналатыны сөзсіз. Аналарымыз болса, ер мен баланың бабын тауып, отбасының жағдайына бей-жай қарамайтыны рас. Шаңырақтың берекесін келтіріп, саналы ұрпақ тәрбиелеген үлкендеріміз жастарға үлгі-өнеге көрсете бермек. Қазіргі уақытта отбасы құрмастан бұрын жастарға ескеретін тәрбиелік дүние көп. Қиындықты еңсеріп, ауыртпалықты артқа тастаған кештің кейіпкерлері некесін жаңа қидырған жас жұбайға өмірден түйгенін, ақылын айтты, – дейді аудандық АХАТ бөлімінің директоры Салтанат Бекжүнісова.
Тереңөзек кенті мәдениет үйінің әншісі Ақтолқын Баймұратова «Түрлі арман», «Жүрегімде жүрсің сен» әндерін шырқап, жиналған көпшілікке шат-шадыман көңіл-күй сыйлады.
Б.ҚАРАМАНТЕГІ
