Ол 1930 жылы бұрынғы Шаған ауы­лында шебер ұстаның отбасында дүниеге келген. Үлкен әкелері Жакен, өз әкесі Шаден де он саусағынан өнер тамған, ағаштан түйін түйіп, ұсталықпен, зергерлікпен көпке танылған. Сол кездері ел ішінде ұста бол­мағандықтан, ауыл ақсақалдары, әкесі бала Шаденді Шаған ауылынан қазіргі С.Сейфуллин ауылына көшіріп әкеледі. Шаден ұсталық кәсіппен айналысып, құрал-сайман жасап, темір соғады. Сондай-ақ, әкесі Шаден ұсталықпен қатар барлық салада сауатты кісі болған. Халықтың егін егу науқанында бұзылып қалған барлық техникаларды өзі жөндеп, жұмысқа қосқан.

Бекен Шаденов алғашында жеті сыныптық мектептен білім алады. 12-13 жасынан бастап ағартушылыққа ден қойып, мектепте мұғалім болып қызмет атқарған. Ұлы Отан соғысы жылдарында ауыл балаларына дәріс берген. Кәмелет жас­қа толғаннан кейін сол кездегі Қызылорда қала­сындағы М.Мәметова атын­дағы педа­гогикалық училищені тәмам­дайды. Одан кейін Н.В.Гоголь атындағы Қызылорда педагогикалық институтының физика-математика факультетін үздік аяқтайды. №137 1-май атындағы сегізжылдық мек­теп­тің негізін қалаушылардың бірі болып, сол кезеңдегі көзі ашық қатар­ластарымен өздерінің қол еңбек­терімен осы мектептің кірпішін қалаған. 1967-1970 жылдары осы мектепте директордың оқу ісі жөніндегі орынбасары болып қыз­мет атқарады. 1970-1972 жылдары Қалжан ахун ауылындағы №126 мектептің директоры болып қызметін жалғастырады. Қанға сіңген ата кәсіп оның да бойына дарып, ұсталықты да кәсіп етеді. Шәкірттеріне тек білім берумен ғана шектелмей, еңбек­­ке, қолөнермен айналысуға баули­ды. 1980-1990 жылдар аралы­ғында мектептегі ағаш шебер­­хана­сының меңгерушісі болған. Мектеп оқушыларының уақытын тиімді пайдалану мақсатында орталық кинотеатрлардан түрлі фильмдердің лента­ла­­рын әкеліп, мәдениет үйінде ауыл жастарының басын қосатын бол­­­ған. Еңбегі де мемлекет тарапынан еленіп, түрлі марапат биігінен көрінді.

Шәкірті Алтын Нұртаева ұстазы жайлы өз толғанысын былайша баян­­дайды: «Біз 1962-1963 оқу жылында мектептің табалдырығын аттадық. Көптеген ұстаздар өздерінің білім­ділігімен есте қалды. Бекен Шаденов ағай геометрия, алгебра пән­дерінен сабақ берді. Өте білімді еді. Сол кездегі айтқан әңгімелерін еске алсам, тура осы кезеңді бейнелегендей болады. «Адамдар келе­шекте жаңбыр мен қарды қолдан жасап, бұлтты қуа алатын болады. Таби­ғат тепе-теңдігін жойса, апат көп болады, мал шығыны артады. Ауаны ластанудан сақтау үшін әрбірің есік ал­дына ағаш егумен айналысыңдар» деген сөзінің мән-мағынасы зор екен».

Өмірлік жары Саракүлмен 1955 жылы бас қосып, 5 ұл, 7 қыз тәрбиелеп, ұлды ұяға, қызды қияға қондырды. Ұлағатты ұстаз, халқының қалаулысы бола білген азамат 2002 жылы 72 жасында дүние салды. Қазіргі уақытта ұл-қыздары бірі ішкі істер саласында, бірі «Рисмаш» зауытында жатка құрастырушы болып зейнетке шықса, бірі аурухана қызметкері, енді бірі ауыл шаруашылық саласынан өз еңбектерінің жемісін көруде.