Жаңа кітап жарық көрді
Жақында А.Тоқмағамбетов ауылындағы №135 орта мектепте ұстаздық қызмет атқарған Бану Ахметтің жаңа кітабының тұсаукесері өтті. Іс-шараға мектеп ұжымы, ардагер-ұстаздар, өнерпаз оқушылар мен ата-аналар қатысты.Кітап авторы Б.Ахмет бұл кітабын әкесі, қарапайым жүргізуші болып еңбек еткен Бекберген Ахметұлының 90 жылдығына арнап жазған. «Шаңырақ» деп аталатын кітап ғұмырбаяндық болғанымен, туындының тарихи-тағылымдық, тәрбиелік мәні зор.
Кітаптың тұсаукесер рәсімі «Әкеме» әнімен басталды. Мұнан соң мектеп директоры Н.Құрманалиев сөз сөйлеп, өмір жолы кітапқа арқау болған тұлғаның еңбегіне тоқталды. Сондай-ақ қырық жылға жуық жүргізуші болған Б.Ахметұлы жайлы әңгімелеген ауыл тұрғындары Ж.Маханбет, З,Сыздықова, Н.Досымов, К.Қосжанова, Т.Қалдаш, А.Дәрменова өз естеліктерімен бөлісті. Олар адал еңбек етіп, ауыл экономикасына үлес қосқан азаматтың ерен еңбегіне куә болғанын айтты. Ал орта мектептің география пәнінің мұғалімі Әділ Ахмет Б.Ахметұлының өмірбаянымен таныстырды.
– Бекберген Ахметұлы 1932 жылы ақпан айында дүниеге келген. Жеті жасынан еңбекке араласып, Ұлы Отан соғысы кезінде тылда жұмыс істеген. Мұғалімдік білім алып, 2 жылдай ұстаздық қызмет атқарған. Әскери борышын атқара жүріп, әскердегі сарбаздарға саяси сабақтар өткізген. 1956 жылы әскерден елге оралып, отбасын құрған. Туып-өскен жерінде жүргізушілік қызмет еткен. Көпбалалы әке атанып, ұл-қыздарын адал еңбекпен нан табуға баулып өсірген. Ол кісі тірі болғанда биыл 90 жасқа толатын еді. Атамыздың өмір жолы біз үшін дастанға бергісіз. Отбасында берген тәлім-тәрбиені, адамгершілік қасиеттерін еске сақтап келеміз. Атамыз қоғамшыл еді. Ауылымызда еңбек озаты, еңбек ардагері болғанын мақтанышпен еске аламыз. Еңбегі бағаланып, республикалық көлемде марапаттарды, медальдарды иеленді, – деді география пәнінің мұғалімі.
Іс-шарада ауыл мен мектеп кітапханасына және меймандарға кітаптың бірнеше данасы берілді. Мектепте өткен бұл жүздесу ауыл тұрғындары мен мектеп оқушыларына рухани әсер сыйлады. Жақында А.Тоқмағамбетов ауылындағы №135 орта мектепте ұстаздық қызмет атқарған Бану Ахметтің жаңа кітабының тұсаукесері өтті. Іс-шараға мектеп ұжымы, ардагер-ұстаздар, өнерпаз оқушылар мен ата-аналар қатысты.
А.СЕЙІЛОВ
