Қазіргі таңда Сырдария ау­дандық қазынашылық бас­қар­масы басшысы орынбасары қыз­метін атқарып жүрген Айгүл Жұма­бекқызының өмір жолына тоқталсақ. 1968 жылы тамыз айының 11-ші жұлдызында Қызылорда қаласында дүниеге келгенімен үлкен өмір жолын Тереңөзек кентінен бастаған. Мектепте жақсы нәтиже көрсетіп, 1989 жылы Ресейдегі Тула қаласында эко­номикалық тех­никумның «Бух­галтерлік есеп» фа­культетін үздік дипломмен тәмәмдаған. 90-жылдары елге оралып, қызмет жолын Тереңөзек Ке­ңес және Теңіз Әскерінің ерік­тілер қоғамында аға есепші лауа­зымымен бастаған. Сол жылы өмірлік серігі Ғабит Хабиевпен шаңырақ көтеріп, 1991 жылы тұңғыш қызын дүниеге әкелген. Келіндік қызмет пен жұмысты қатар алып жүрген Айгүл Хабиева – аяулы ана. Жастық шағының әсем кездерін отбасына да, жұмысына да арнай білген.

Қаржы саласындағы елеулі еңбегімен таныла білген Айгүл Жұмабекқызы бұл қызметін 1992 жылдан бастаған. Отба­сылық міндетімен қатар лауа­зымды міндеттерін де ешқандай қиындықсыз ала жүріп, тіпті білімге де уақыт табады. 1994 жылы Қазақ мемлекеттік басқару Академиясына түсіп, 2005 жылы Қорқыт ата атындағы Қызылорда мем­лекеттік универси­тетінің «Есеп және Аудит» факуль­тетін бітірген.

– Жанұямызда бір қыз, екі ұл тәрбиелеп өсірдік. Қазір қызым тұрмыста. Астана қаласында медицина қызметкері және екі баланың анасы. Екінші ұлым аудандық экономика және қаржы бөлімінде әдіскер болып жұмыс істейді. Кіші ұлым биыл мектеп түлегі, ҰБТ-ға дайындалып жүр. Өмірлік жолым жұмысыммен тығыз байланысты. Осы лауа­зымға дейін біршама қызмет түрін атқарып келдім. Бөлім басшысы да болдым, бас маман да болдым, – дейді үлгілі жан.

Кейіпкеріміздің жүріп өткен жолы тек қаржы саласымен байланысты болғанымен жанұя да тыс қалған емес. Ұрпағына жақсы тәлім-тәрбие беру ата-ананың міндеті екені хақ. Қаржы маманы «жұмыс жұмысымен, отбасыға да уақытылы көңіл бөлу қажет» дейді бір сөзінде. Осы орайда Дулат Бабатайұлының бір сөзі ойға оралып тұр. «Ата-ананың ақылы – қазулы қара жолмен тең» демекші, асыл жар, аяулы ана, білікті басшы бола білген жанның дана тәрбиесі мен ұрпағына берері сарқырап аққан бұлақтай. Міне соның бір көрінісі, өзінің ізінен ерген ұлы қазіргі таңда қаржы саласында қызмет атқарады.

Әр жеке тұлғаның өз қалауы болатыны анық. Бос уақытын құр өткізбей, шетел жазушыларының еңбегімен танысып, сала бойынша жарық көрген еңбектерді де тасадан тыс қалдырмайды.

– Үзбей оқитын шығарма­ларымның авторы француз жазушысы Александр Дюма. Күнде оқуға тырысамын. Бұл жазушының кітаптарын кәдімгідей жақсы көріп, жүрегіммен оқимын. Сонымен қатар, мамандығыма қатысы болғаннан кейін шығар, соңғы кездері қаржы саласындағы түрлі еңбектерді де оқуға тырысып жүрмін, – дейді маман иесі.

Айгүл Хабиева – кітапты да жанына серік етіп, қызметті де абыроймен атқарып, отбасында аяулы жар бола білген жан. Отбасының ұйытқысы, өз саласының майталман маманы кейінгі буынға өнегелі ісімен үлгі.