Озық ойлы маман
Бүгінгі күні Ұлттық экономиканың негізгі құрамдас бөлігі саналатын ауыл шаруашылығы саласының жеткен жетістіктері орасан. Жауапты салада ел игілігі үшін тынымсыз еңбек етіп жүрген дала еңбеккерлерінің жұмысы нәтижесінде отандық аграрлық сектор нық дамып келеді. Бүгінде Сыр өңірінің аграрлық саладағы бәсі биік. Еліміздің барлық өңірінде жылдағы дәстүрге сай қараша айының үшінші жексенбісінде ауыл шаруашылығы қызметкерлері күні атаулы мереке ретінде атап өтілуде. Биылғы жылы да өңір диқандары мен шаруалары мерейлі мерекеге зор табыспен жетіп отыр.Сырдария аудандық ауыл шаруашылығы және жер қатынастары бөлімінің білікті бас маманы – Бауыржан Мырзахметов аграрлы саланың дамуы жолында табысты еңбек етуде. Алғашқы еңбек жолын 2011 жылы «Казсушар» ШЖҚ РМК Қызылорда филиалының «Сырдариясушар» ӨУ гидротехник болып бастаған кейіпкеріміз бүгінде ауыл шаруашылығы саласында халық игілігі үшін жасаған тындырымды жұмыстарының нәтижесінде мол тәжірибе жинақтап, білікті маманға айналды. Ол өзіне тапсырылған кез келген жұмысты уақытылы әрі сапалы орындалуына өте жауапты қарайды. Парасаты мен пайымы жарасқан азамат аудандағы шаруашылық құрылымдарынан егілетін дақылдардың жоспарын жинақтап, облыстың келісімімен бекітіп, көктемде егіс және жер жұмыстарының көлемін қадағалау сынды жауапты қызметті атқарады. Бұдан бөлек ауданға қарасты шаруа қожалықтарымен тығыз байланыс орнатып, бірлесе маңызды әрі ауқымды жұмыстар атқаруда.
– Бүгінгі таңда өздеріңізге белгілі ауданымыздың ауыл шаруашылығы саласы қарқынды дамып келеді. Бұл әрине дала диқандарының еселі еңбегі мен маңдай терінің жемісі. Бұған дәлел ретінде биылғы жылдың қорытындысымен ауданымыздың ауыл шаруашылығы саласына инвестиция тарту бойынша «Озат» атануын ерекше атап өтуге болады. Мемлекет тарапынан ауыл шаруашылығы саласына әрдайым қолдау көрсетіліп, баса назар аударып келеді. Мәселен Мемлекет басшысының ауылдық жерлердегі тұрғындардың табысын арттыру тапсырмасы аясында ауқымды «Ауыл аманаты» жобасы іске асырылуда. Бұдан да бөлек ауыл шаруашылығы саласында маңызды жұмыстар атқарылып, жалғасын тауып келеді, – дейді Бауыржан Мырзахметов.
Аудан экономикасы мен әлеуетінің артуына елеулі үлесін қосып жүрген азамат адал еңбегінің лайықты бағасын алып келеді. Атап айтқанда, ауданның әлеуметтік-экономикалық дамуына елеулі үлес қосқаны үшін ауданның 90 жылдық мерекелік медалімен марапатталған. Сонымен қоса ауыл шаруашылығы саласының өсіп-өркендеуіне үлес қосып, жас та болса ел игілігі жолында әр жылдары атқарған адал еңбегі үшін аудан, облыс әкімінің алғыс хаттарымен марапатталған. Кейіпкеріміз білікті маман ғана емес, сондай-ақ отбасының тірегі, балаларына қамқор әке, арқасүйер азамат. Ол бүгінде аяулы жарымен 1 ұл, 2 қыз тәрбиелеп, ата-анасына немере сүйгізіп отырған берекелі шаңырақтың қорғаны.
Жауапты салада абыройлы қызмет етіп келе жатқан азаматқа алдағы қызметіне сәттілік тілейміз!
Алтынай ҚАЙРАТҚЫЗЫ
