Алғашқы құттықтау сөзін «Әжелер» мектебінің төрайымы, ауданымыздың «Құр­метті азаматы» Ұлмекен Жаналиева сөй­леп, елімізде 6 қазан күні өтетін АЭС салу мәселесіне қатысты жалпыұлттық рефе­рендумға қатысты маңызды ақпараттармен бөлісіп, ақпараттандырып өтті.

– Баршаңызды отбасы күнімен шын жүректен құттықтай отыра, отбасыларыңызға бақыт, бақ-береке тілеймін. «Отан – отбасынан басталады» демекші, еліміздің жарқын болашағы үшін дұрыс шешім қабылдау мына біз бен сізден бас­талады. Қазақстан халқы қазір мүлде жаңа саяси жағдайда өмір сүруде. Соңғы 5 жылда ауқымды реформалар жасалды. Еліміздің саяси жүйесі түбегейлі өзгеріп, жұрт­тың сана-сезімінде бетбұрыс болып жатыр. Халықтың құқықтық мәдениеті артып келеді. Бір сөзбен айтсақ, Әділетті Қазақстан құрылып жатыр. Мұның бәрі, ең алдымен, халықтың қалауымен жасалуда. Жолдаудағы бір ерекшелік халықтың қалауынан салынған дүниелер мен реформалар, заңдарға өзгерістер халықтық талқыға түсіп барып қабылдануы бұл Әділетті Қазақстанның бір көрінісі. Жолдау­да айтылып, қазіргі қоғамның басты назарын аударып отырған тақырып бұл Атом энергетикасын дамыту болып отыр. Президент өз Жолдауында «Атом электр станция­сын салуға келісесіз бе?» тақырыбында 6 қазан жалпыхалықтық референдум жариялады. Бұл қоғам үшін өте маңызды әрі өзекті тақырып. Сондықтан 6 қазан күні ел ертеңі үшін референдумға қатысуға баршаңызды шақырамын, – деді Ұ.Жаналиева.

Тағылымы мол іс-шара барысында қо­ғам­дық іс-шараларға белсене қатысатын өзге ұлт өкілдері отбасы құндылығы жөнін­де мәнді де мағыналы әңгіме айтып, мерекемен құттықтады. Одан бөлек аудандық этнос өкілдерінің ішіндегі белсенді Мясцовтар отбасы ән айтып, қонақтарға керемет көңіл-күй сыйлады.

– Отбасы – тұлға тәрбиелеудің және оны қоғамның сан қырлы жақтарын игеруіне мүмкіндік туғызатын ең алғашқы әлеуметтік орта. Отбасы – шағын мемлекет. Оның тірегі – әке мен ана. Үлгілі жанұя үлкен қазына. Қазақ халқында «Ұяда не көрсең, ұшқанда соны ілесің» деген даналық сөз бар. Ұлы мен қызына тәрбие беретін ата-ананың парызы мен қарызы үлкен. Халық айтса, қалт айтпайды, «Отан – отбасынан басталады», «Балалы үй базар, баласыз үй қу мазар» деген даналық сөзінде үлкен ғылыми тұжырымдаманы көрсетеді. Бүгінде жергілікті этнос өкілдері және отбасылары аудан экономикасының өркендеуі мен әлеуметтік ахуалының жақ­саруы­на атсалысып келеді. Ауданымызда өзге ұлттардың басын біріктірген «Достық» үйінің белсенділері бүгінде облыстық, аудандық іс-шараларда сахна төрінен көрі­ніп жүр, – деді Балшекер Өтегенова.

Кездесу соңында, қоғамдық іс-шара­ларға белсене қатысып, атсалысып жүрген өзге ұлт өкілдері отбасыларына Алғыс хат және естелік сыйлық табысталды.