Біз Шыңғысты бала күнінен білетінбіз. Мектептің белсенді оқушысы болды. Кейін спортқа құштарлығы оянып, өмірінің ең қымбат кезеңін стадионда, жаттығу залында өткізуді әдетке айналдырды. Сонау 2008 жылдан бастап көгалдағы хоккей спортымен айналысуды бастады. Білікті бапкер Сұлтанбек Қобландиннің көзіне түсіп, оң бағасын алды. Сөйтіп ауылдың қарадомалақ баласы 2013 жылы облыс құрама командасына қабылданды. Бұл оның үлкен спорттағы ең алғашқы белесі болатын. Араға бір жыл салып спортшы көгалдағы хоккейден Қазақстан Республикасы чемпионатының жеңімпазы атанып, Қазақстан Республикасының көгалдағы хоккейден спорт шебері атағын алды. Осылайша небәрі 16 жасында-ақ спорт саласында өзіндік орнын қалыптастырды.

Шыңғыс Сейтқалиев республикалық жарыстардан бөлек, халықаралық жарыстарда да топ жарды. Мәселен, 2015 жылы Индия мемлекетінің Гвалиор қаласында өткен көгалдағы хоккейден «Шеберлер Кубогі» халықаралық жарысында жүлделі III орын иеленді. Осы жылы Өзбекстан Республикасының Бұхара қаласында өткен «Өзбекстан Респуб­лика­сының Кубогі» халық­аралық жа­ры­сының же­ңім­пазы атанды. Сондай-ақ 2016 жылы Қа­зақстан Рес­пуб­­­ликасының ұлт­­­тық құрама са­пында Сингапур мем­­лекетіндегі «Әл­ем­­­дік Ли­га» жары­сы­­ның I ке­зеңінің қаты­сушысы болды. 2017-2018 жы­лы Казань қаласында өткен Ре­сей Фе­де­ра­ция­сының Жоғарғы Лигасының жеңімпазы ретінде жеңіс тұғырынан көрінді. Ал 2018-2019 жылы көгалдағы хоккейден Электросталь қаласында өткен Ресей Федерациясының Жоғарғы Лигасының күміс жүлдегері атанып, аудан абыройын асқақтатты. Осы ретте 2019 жылы көгалдағы хоккейден Талдықорған қаласында өткен Орталық Азия Кубогі иегері атанған кезінде аудандық газет редакция­сына хабарласып, сүйінші жаңалықты жет­кіз­ген спортшының жерлестеріне деген сүйіс­­пеншілігіне тәнті болғанымызды айтып өткеніміз орынды.

Спортшы Тәжікстан мемлекетінің Душанбе қаласында өткен халық­аралық турнирдің де жеңімпазы атанды. Мұнан бөлек Дубай қаласында ұйым­дастырылғанын «Friendship Cup» халықаралық турнирінің де жеңімпазы болды. Ш.Сейтқалиев Қазақстан Рес­пуб­ликасының ұлттық құрама сапында Индонезия мемлекетінің Джакарта қаласында өткен «AHF CUP» жарысының қатысушысы ретінде үздік­тер көшін бастады. Былтыр Оман мем­лекетіндегі Азия Кубогінің қатысу­шысы ретінде де жақсы қырынан танылды. Шыңғыс Сәбитұлы көгалдағы хоккей спортының облысымыздағы белді ойыншысы болды.

– Біз Шыңғысты мақтан тұта­тынбыз. Оның спортқа деген құштар­лығы, жеңіске деген ұмтылысы ерекше болатын. Ойын алаңындағы қимыл-қозғалысы, іс-әрекеті де шапшаң, тез үйлесім тауып, команда спортшыларына серпіліс сыйлайтын. Көгалдағы және индор хоккейден ҚР спорт шебері атанғанда ерекше қуандық. Ол сондай-ақ көгалдағы хоккейден Қазақстан Республикасының 8 дүркін, индорхоккейден 5 дүркін жеңімпазы ретінде де аудан тарихында қалды. Шыңғыс Сейтқалиев қол жеткізген жетістіктері үшін облыс, аудан әкімдерінің, облыстық дене шынықтыру және спорт басқармасы басшы­сының Алғыс хаттарын иеленді. Облыстың «Жылдың үздік спортшысы» номинициясымен марапатталған болатын, – дейді «Қайсар» ерлер коман­асының аға жаттықтырушысы Ғалымжан Әлиев.

Біз мақала жазу барысында саңлақ спортшының әкесі Сәбит Үсеновпен пікірлестік. Бауыр еті баласынан қапыда айырылып қалған азамат әлі де ештеңеге сене алмай жүргенін, ұлының қысқа өмірде көп жетістікке жеткеніне шүкір ететінін айтты.

– Халқымыз «Аталатсаң, аталат, боталатпа» деп бекер айтпаған екен. Ұлымның қазасы отбасымыз үшін ауыр соққы болды. Алланың ісіне шара бар ма?! Қиналамыз, төземіз, шүкір етеміз. Баламыз кішкентайынан спортқа құштар еді. Сұлтанбек Қобландин ағасынан тәлім алып, талай жарыстарға қатысты. Әр жеңісі мен жетістігіне қуанатынбыз. Енді оның бәрі өткен шақта айтылатыны өкінішті. Баламның спорттағы дос­тарына рақмет, еске алып, сіздерге ұсыныс айтып, туған күніне орай мақала да жаздыруда. Аудан спортын өрге сүйреп жүрген спортшыларымыз аман болсын, – дейді Сәбит аға.

Иә, жасындай жарқырап, жас­тай қаза болған спортшы Шыңғыс Сейтқалиев аудан тұрғындарының, спорт­тағы достарының есінде мәңгі сақталары анық. «Тас түскен жеріне ауыр» демекші, бұл қаза ең алдымен марқұмның отбасы, ағайын-туыстары үшін өте ауыр екені сөзсіз. Десек те ол артына өшпес із қалдырды. Шыңғыстың бағындырған шыңы, спорт­тағы жетістіктері жастарға үлгі болып қалды.