Еңбегімен ел алғысын арқалап жүр­ген Роза Бодыққызы 1966 жылы тарихы терең, аудан орталығынан шалғайда орналасқан Іңкәрдария ауылында дүние есігін ашқан. Саналы ғұмырын еңбекке арнаған ол 1983 жылы мектепті тәмамдап, алғашқы еңбек жолын ауылда мал шаруашылығындағы қырқымда ас­паз болып бастап, екі жыл қызмет атқарған. Кейіннен 1987 жылы Қызылорда қаласында кітапхана ісі мамандығы бойынша 1 жылдық оқу оқып, бітіріп шығады. Оқуын аяқтаған соң, көшпелі кітапханашы болып орналасып, жеті жыл шамасында қызмет атқарады. Ардақты жан осы уақыт аралығында ауқымды жұмыстар атқарып, кітапхана ісін­де өзіндік орнын қалыптастыра білді. Жеті жылдан соң кітапхана жұмысының қысқартылуына байланысты ауылдық клуб үйіне ауысып, күні бүгінге дейін мәдени ошақтың тазалық жұмыстарына жауапты маман болып қызмет етіп келеді. Өз ісіне тиянақты әрі жауапкершілікпен қарайтын Роза Бисенбаева өзінің адамгершілік қасиетімен, жайдары мінезімен ортасына сыйлы, абыройлы. Адал еңбекті жанына ту етіп, жыл­дар бойы елеулі еңбек етіп келе жатқан Роза Бодыққызының еңбегін іңкәрдариялықтар жоғары бағалайды, құрметтейді.

– Ширек ғасырға жуық осы салада аянбай қызмет етіп келемін. Өзімнің кіндік қаным тамған ауылда абыройлы әрі адал еңбек етіп, ел алғы­сына бөлену мен үшін үлкен бақыт. Қандайда бір іс-шара болсын, концерт немесе байқаулар бол­сын жас ерекшелігіне қарамай қаты­сып, белсенділік танытқанды жөн санаймын. Бүгінде ауылдық клуб үйінде ән үйірмесі және драма үйірмесінің мүшесімін. Бір орын­­да тоқтап қалмау керектігін үнемі айтып жүремін. Іргелі ұжым әркез құрметтеп, үлкен деп сыйлап төрден орын беріп, еңбегімді баға­лап келеді. Жұмыстың жаманы болмайды. Қандай жұмыс болса да адал қызмет ету керек, – дейді Роза Бисенбаева.

Роза Бисенбаева өнерден алыс емес, өте өнерлі жан. Ол үнемі бел­сенділік танытып, түрлі іс-шараларға, байқауларға қатысып, дип­ломдар мен және алғыс хаттармен марапатталып, жетістіктерге жетіп, еңбегі еленіп келеді. Мәселен 2018 жылы «Сағындырған әндер-ай» атты ән байқауына қатысып, бас жүлде иегері атанған. 2022 жылы аудан әкімінің алғыс хатымен, «Ән қанатында» атты ауылдық әнші­лер байқауында алғыс хатпен марапатталған. Одан бөлек «Шебердің қолы ортақ» атты ау­дан­дық қолөнер шеберлерінің көр­­месіне қатысып, жүлделі орын ие­ленген. «Айттым сәлем Қалам­қас» атты облыстық ардагер әншілер байқауында «Үздік әнші» номина­­циясын жеңіп алған. Роза Бисенбаеваның аталған жетіс­тік­теріне қарап-ақ қандай белсенді әрі өнерлі екенін аңғаруға болады. Еңбегін еліне арнаған ардақты жан­ның еңбегі өлшеусіз, әркез бағалы.