Ақ жаулықты аналардың алғысы шексіз

Аптаның бейсенбісінде «Күн­дізгі стационар» бөлімшесіне бас сұққанымызда білікті дәрігер Қайрат Ерманов науқастардың жағдайын тексеріп жүр екен. Қа­пе­лім­де біз азаматшаларға ар­нал­ған палатадан табылдық. Емде­лушілерден ем-шараның жай-күйін сұрастырған едік. Бір кезде сырқаты бойынша ем қабылдап жатқан Ақгүл Ибраеваның «Балам-ау, дертіміз жанымызды қысқанда жылына бірнеше рет Қайрат деп келеміз» деген сөзін палатада жат­қан жандар қостай жөнелді.

Расында, бір палатада Ақгүл апамен бірге тереңөзектік Бекза­да Әлжанова, Алмагүл Сақыпбекова, Гүлстан Яссауи, Жанат Досмағанбетқызы, Самал Әбділдаева ем қабылдап жатқан бола­тын. Әрбір науқастың дертіне байланыс­ты дәрігер тағайындаған ем-шараны медбике, жас маман Ақбота Наматулла жүргізуде. Өз кезегінде жүрек аурулары негізінде күнде­лік­ті қатынап ем қабылдап жүрген Бекзада Әлжанова дәрігерлерге өз алғысын жеткізді.

– Менімен бірге ем қабылдап жатқан аудан тұрғындары бөлім­ше мамандарының қызмет көрсету сапасын жоғары бағалай­ды деп ойлаймын. Негізі­нен жас та, жасамыс та дертті болғанын көзіміз көріп жүр. Өзім медицина саласында 40 жыл еңбек еттім. Саланың маманға артар жүгі ауыр. Қарап отырсаңыз, адамның бойынан күнде бір дерт табылып жатады. Жыл сайын жоспарлы ем қабылдап келемін. Ем алатын уақытым жақындағаннан кейін ауырмаудың амалын жасап, Қайрат балама келген жайым бар. Әркез жылы қабақ танытып, қарсы алатын ақ халатты абзал жанға алғыстан басқа айтарымыз жоқ, – дейді Бекзада Әлжанова.

Күнделікті сырқатына байланысты дәрігер нұсқаулығына сүйен­ген Самал Әбділдаева бүй­регінде ақау болғандықтан, күн­делікті бөлімшеге қатынап ем қабылдап жүр. «Күндізгі стацио­нар» бөлімшесіне келген әрбір науқас Қайрат Жоламанұлына дән риза.

Б.ОРДАБЕКОВ