Ақын шығармашылығы кеңінен насихатталды

Cырдария ауданына қарасты Аманкелді ауылындағы №42 мектеп-лицейдің 100 жылдығы мен жерлес ақын Қуаныш Баймағанбетовтың 128 жылдығына орай «Тереңнің гауһарын терген ақын» атты апталық өткізілген болатын. Апталықтың ашылу салтанатында ақынның өмір баянына шолу жасалып, апталықтың жоспары көпшілікке таныстырылды.

«Мерейлі мектебіме 100 жыл» тақырыбында мектеп оқушыларының қолөнер бұйымдарынан көрме ұйымдастырылса, әр жылдары қызмет еткен ардагер ұстаздармен «Өмірі – өнеге, сөзі – ғибрат» тақырыбында кездесу жүзеге асты. Сонымен қатар 1-11 сыныптардағы «Сырдың сұлу сүлейі» атты тәрбие сағаттары, 9-10 сынып оқушылары арасында «Brain rain» (Ми жаңбыры) интелектуалды ойыны ұстаздар қауымының көңілінен шықты. Тартысты ойынға 5 команда қатысып, 9 «ә» сыныбының «Лидер» тобы жеңіс тұғырынан көрінді. Өз кезегінде Қуаныш Баймағанбетов шығармаларынан арнайы көрме қойылды. «Сырды жырлаған ақын» атты 5-7 сыныптар арасында жас ақындар айтысы жүзеге асып, үздіктер марапатталды.

Ақын атындағы мектеп тарихын зерттеу барысында жоба қорғалды. Апталық қорытындысында мектеп оқушылары ақынның балалық шағынан бастап кезең-кезеңмен театрландырылған қойылым көрсетті. Апталықтың іс-шара жоспарына сәйкес барлық шаралар жоғары деңгейде ұйымдастырылып, көрермен көңілінен шықты. Ақын мұрасын ұрпақтар жадында жаңғырту бағытындағы жүйелі жұмыстар жыл көлемінде жалғасын табатын болады.