Шіркейлі ауылындағы шығармашыл оқушылар

Шіркейлі ауылындағы №129 Ә.Жәмішев атындағы мек­теп-лицейінің қос оқушысы облыстық Абай оқулары бай­қауынан жүлделі орындар иеленіп, аудан абыройын асыр­ған. Төменгі сыныптан бастап әдебиетке ерекше ынталы болған оқушыларды қазақ тілі мен әдебиеті пәнінің мұға­лімі Әйгерім Райсова түрлі байқауларда сынап, әдебиет әле­мінің қыры мен сырына сусындатып келеді.

11 сынып оқушысы Инабат Төребек байқауға «Өлең – сөздің патшасы, сөз сарасы» номинациясы бойынша қатысып, үшінші орынды қанжығалаған. Бала кезінен әдебиет әлеміне жақын өскен ол көптеген ақын өлеңдерін жатқа, нақышына келтіре оқып, жазушылардың өмір өрнегін зерделеп жүр. Небәрі 5 сыныпта оқып жүрген кезінен Абай Құнанбайұлының өлеңдерін жатқа оқып, ерекшеленген ол бүгінде бас ақынымыздың 100 өлеңін жатқа біледі. Инабат биыл мектеп бітіреді. Оның арманы ұстазы сияқты қазақ тілі мен әдебиеті пәнінің мұғалімі болып, кейінгі буынды ұлттық құндылықтарымызбен сусындатқысы келеді.

Ал мектеп-лицейдің 10 сынып оқушысы Ханшайым Ақылбек облыстық байқауда «Абайдың қара сөздері» номинациясы бойынша бақ сынап, жүлделі екінші орынды иеленген. Болашаққа таңдаған мамандығы биология саласы бол­ғанымен, поэзияға, әдебиетке жаны жақын. Және мәнерлеп өлең оқы­ғанды жаны сүйеді. Өлең-сөзден қара сөзді жатқа айтудың өзіндік қиын­дықтары жетерлік. Қазір Абай Құнанбайұлының он қарасөзін жатқа оқып, тәпсірлеп бере алатын Ханшайым ақын қара сөздерін толық жаттап шығуды мақсат еткен.

– Инабат та, Ханшайым да мек­тептің қоғамдық өміріне белсене атсалысады. Өнерлі, дарынды, талантты әрі жан-жақты оқушылар. Аудандық, облыстық түрлі байқауларға қатысып, жоғары дәрежелі марапаттарға да ие болып жүрген қыздарымыз сабақты да жақсы оқиды, үлгерімдері өте жақсы. Жақында об­лыстық байқаудан топ жарып, аудан намысын қорғады. Талапты оқушыларымның алар асуы әлі алда деп білемін, – дейді мектеп-лицейдің қазақ тілі мен әдебиеті пәнінің мұғалімі Әйгерім Қайратқызы.

Аружан МҰҚАНБЕТҚАЛИ