Жауапкершілікті сезініп жүрміз бе?

Сырдария ауда­нында бірнеше жылдан бері инфра­құ­рылымды дамыту жұмыстары тұрақты түрде жүргізіліп ке­леді. Бұл ретте, даму көрсеткіші жоғарғы деңгейге шыққан ауданда «Балалар жылы» аясында бір­неше ойын алаңы салынған болатын.

Қазіргі уақытта Тереңөзек кен­тін­­дегі ойын және футбол алаң­да­рын­да бос уақытын тиімді өткі­­зетін балалар қарасы мол. Терең­­өзек кентіндегі ойын алаң­дары жас жеткіншек үшін таптыр­мас орынға айналды. Мәсе­лен, «Қазақ», Аманкелді Иманов, Азат­бақыт Әлиакбаров көшеле­рі­­нің бо­йында орна­ласқан футбол алаңдарында доп қуалаған аудан жастары жетерлік. Сонымен бір­ге жекелеген ойын алаңдары бүл­дір­шіндердің демалыс орнына айналған. Бұдан бөлек, кенттегі бір­­неше көшенің тұрғындары ойын алаң­­дарын қажет ететіндіктерін ал­ға тартады. Алдағы уақытта атал­ған мәселе кезең-кезеңімен шеші­леді деп сенеміз.

Аудан көлемінде пайдалануға берілген ойын алаңдарын арнайы тақырып ретінде қозғауымыздың өзін­дік себебі бар. Қазіргі уақытта са­палы жасалған дүниені күтіп ұс­тау мәселесі көпті ойлантады. Бүгінде ойын алаңдарын бүл­діріп, жарамсыз күйге айналдыру тұрғындар арасында сан мәр­те қайталанған. Жақында Иса Тоқтыбаев көшесінің бо­йын­да орналасқан ойын алаңына Тереңөзек кенті әкімдігінің қолда­уы­мен орташа жөндеу жұмыстары жүргізілген болатын. Ойын алаңы негізінен бірнеше жыл бұрын балалар үшін арнайы салынған. Тозығы жеткен ойын алаңды қалыпқа келтіру үшін кент әкімдігінің мамандары тартылды. Бұл ретте, Те­рең­өзек кентінің әкімі Е.Бахтияров жергілікті халықтың ойын ала­ңын күтіп ұстау керектігін айтады.

– Құрметті кент тұрғындары балалар үшін салынған және жа­ңартылған ойын алаңдарын күтіп ұстау – маңызды рөл ойнайды. Осы, спорт және ойын алаң­дарына әрбіріміз жанашырлық танытып, ұқыпты қарауды сұраймыз. Алдағы уақытта балалар ойын алаң­дарын салу ойда бар. Демалыс уа­қы­тында балалар көбіне ойын алаңдарынан табылады. Әри­­не, балалардың қауіпсіз әрі сапалы алаңдарда ойнауына ата-аналар жауапкершілікпен қара­ғаны жөн. Қашанда балаларға мемлекет меншігіндегі мүлікті күтіп ұстау керектігін ескертсе дейміз. Шындығында, бірнеше жөндеуден өткен ойын алаңы ұзақ мерзімде балалар игілігіне жараса деген ті­легіміз бар, – деді Тереңөзек кен­тінің әкімі Ержан Бахтияров.

Асылында, қоғам өмірінде бала­лардың алар орны ерекше. Олар­дың дені сау ұрпақ ретінде қа­лыптасып, кедергісіз ортада же­тіл­гені жақсы. Үнемі ата-ана баласы­на дастархан басында отырып, мем­лекет мүлкіне жанашырлықпен қа­рау керектігін, ойын алаңдарын салу барысында едәуір қаражат жұм­салғандығы жөнінде мұқият ай­ту керек секілді.

– Мен балаларымды күн са­йын «Қазақ» көшесінде орналасқан спорт алаңына әкелемін. Кем де­ген­де 40-қа жуық бала күні бойы доп тебеді. Бірнеше топқа бөлінген ба­лалар футболдың қызығына кі­ріп, бос уақытын тиімді пайдала­нады. Бұл ретте, балалардың ойын алаңдарын бүлдіруге әуес­тігін жиі байқаймыз. Тор қоршауға өрмелеп шығып, ойын алаңының темірлерін бір-бірінен ажыра­туда. Сонымен қатар ойын ала­ңына қоқыс тастамау керектігін ескертеміз. Кейде бөтелке шынысы кездесіп жатады. Талай бала­ның шыны қалдықтарынан ая­ғы жараланғанын көзіміз көрді. Немқұрайлылық танытпау үшін ата-аналалар балаларына сапалы әрі қолайлы етіп салынған мүлікті бүл­дірмеу керектігі жайында жө­нінде ақыл айтқаны жөн, – дейді кент тұрғын Асылбек Абдыханов.

Балтабай ОРДАБЕКОВ