Ойын алаңдары ашылды
Ұлттық мереке – Республика күнінде сырбойылықтарға айрықша тарту жасалды. Облыс бойынша бір мезетте бірнеше әлеуметтік нысан пайдалануға беріліп, балаларға қуаныш сыйлайтын жаңа спорт ойын алаңдары ашылды.Өңірде облыс әкімінің бастамасымен «Балалар жылына» арналған демеушілердің қолдауымен құны 1,6 млрд теңгені құрайтын қала, аудан ішінде 80 спорт ойын алаңы салынған болатын. Өскелең ұрпақтың саламатты өмір салтын ұстануына септігі тиетін спорт ойын алаңдары өңір бойынша Республика күні қарсаңында тарту етілді.
Жас ұрпақ үшін пайдалануға берілген 80 спорт ойын алаңының 6-ы ауданда салынды. Мереке қарсаңында аудан орталығындағы спорт алаңдарының ашылуы салтанатты түрде өтіп, оған аудан әкімі М.Ергешбаев, аудандық мәслихат хатшысы Е.Әжікенов, зиялы қауым өкілдері мен жастар қатысты.
Ойын алаңдарының ашылуында аудан басшысы балғындардың игіліне жарқын жұмыстар жүргізіліп жатқандығын атап, баршаны халықтық мерекемен құттықтады.
– Ел келешегі – бүгінгі жас ұрпақ. Сондықтан біз олардың талап-тілегімен санасып, сұранысын қанағаттандыруға тиіспіз. Осы орайда, аймақта айтулы жұмыстар атқарылып, аудан бойынша 6 спорт алаңының құрылысы аяқталды. Алдағы уақытта аталмыш спорт алаңдарының игілігін жас балғындар мен жасөспірімдер көре бермек. Осындай спорт алаңдарының көптеп салынуынан болашақ спортшылар мен ел абыройын асқақтататын дарабоздар шығады деп сенемін. Себебі, балаларға құйылған инвестиция – ел болашағының жарқын кепілі. Бүгінгі күнді мерекеге ұластырып, жан-жақты қолдау көрсетіп жатқан демеушілерге шынайы алғысымды білдіремін. Жаңа спорт алаңынан жаңа елдің дамуына ерекше үлес қосатын жастар өсіп шыға берсін, – деді аудан әкімі Мұрат Нәлхожаұлы.
Мұнан соң спорт ойын алаңының салтанатты түрде лентасы қиылып, жас ұрпақ өкілдеріне тыл және еңбек ардагері Рақымжан қажы Бәйменов ақ батасын берді.
Аудан орталығы – Тереңөзек кентінде орталық саябақтың ішінде, А.Алиакбаров пен Қазақ көшесінің қиылысында және Б.Момышұлы көшесінің бойында жаңа спорт ойын алаңдары салынды. Орталық саябақтағы ойын алаңының салынуына «Сырдария ауданының Құрметті азаматы» «Жан-Арай» ЖШС директоры Бағдаулет Махашев мұрындық болды. Ал қос көше қиылысындағы спорт алаңына «Қасиет ЛТД» ЖШС-нің директоры Асылбек Бертілеуов демеушілік жасаған. Сондай-ақ, Б.Момышұлы көшесіндегі ойын алаңының салынуына елге белгілі меценат болған, «Сырдария ауданының Құрметті азаматы» Расул Есенов қолдау көрсеткен. Одан бөлек, Шаған ауылында «Шаған Жер» ЖШС директоры Жеңісбек Сыздықов, С.Сейфуллин ауылында «Құндызды Жер» ЖШС директоры Тұрсынбек Бөлегенұлы, Қалжан ахун елді мекенінде «Сүндетбай» ШҚ төрағасы Дархан Шағыров ойын және футбол алаңдарын салдырып, игілікті іске атсалысқан.
Осындай жомарт жандардың қолдауының нәтижесінде өскелең ұрпақтың спортпен шұғылдануына мүмкіндік жасалды. Тиісінше, аудан тұрғындары жастарға жақсы жағдай жасалғанына шынайы ризашылықтарын білдіруде.
Е.БЕРКІНБАЕВ
