Қауіпсіздік талаптары түсіндірілді

Жазғы лагерь – өте ерекше әрі қызық­ты демалыс орны. Онда балалар өз уақытын тиімді әрі пайдалы өткізе ­алады. Күнделікті түрлі сайыстар мен ойын жаттығулары жүргізіледі. Әр баланың таланты мен қабілетін ашу мақ­сатында ұйым­дас­тырылатын са­йыс­тар балалар үшін өте қызықты. Осыған орай, біз «Жалын» тынығу лаге­ріне арнайы барып, іс-шараларға қатыстық.

Жалын» лагерінде қазіргі таңдағы өзекті мәселелердің бірі «Наша­қор­лыққа жол жоқ» тақырыбында театр­ландырылған қойылым және сурет көр­месі сайыс түрінде өтті. Оған қонақ ретінде қатысқан сала мамандары саламатты өмір салтын насихаттап, адам баласының басты байлығы денсаулықты сақтаудың негізгі қағидаларын атап өтті. Іс-шарада денсаулықтың қадірін тү­сіну, нашақорлық ауруынан сақтану, имандылық қасиеттерді қалыптастыру, сақтай білуге тәрбиелеу насихатталды. Бұл сайыста балалар өзара бөлініп, ерекше қабілеттерін көрсетіп таң қалдырды.

Содан кейін өрт қауіпсіздігін сақтау, төтенше жағдай орын алған жағдайда не істеу қажеттігін Сырдария ауданының төтенше жағдайлар бөлімі және №12 өрт сөндіру бөлімінің қызметкерлері де­малушыларға түсіндіріп өтті. Өрттің қаншалықты адам өміріне қауіпті екен­дігін, балаларға отпен ойнамау керек­тігін түсіндіре отырып, өрт сөндіруші­лердің құрал-жабдықтарымен таныстырды. Өрт сөндірушілер ер балалардың қы­зы­ғушылығын арттырып, болашақта өрт сөндіруші қызметкері болуға шақырды.

Жасөспірімдер арасында саламатты өмір ­салтын қалыптастыру бағытында «Жалын» сауықтыру лагерінің тыны­ғушылары арасында футболдан жол­дастық кездесу ұйымдастырылды. Жеңіске жету үшін ойнайтын балалар достықты дәріптей отыра доп тепті. Қатысушылар жақсы ойын өрне­гін көрсете білді. Командалық топ ауызбіршілікті де, достықты да жолдас­тық кездесуде қатар насихаттады. Бола­шақта балалардың арасында ел мерейін үстем ететін мықты спортшылар шығарына сенеміз.

Осылайша, біздің болашақ журналист ретінде лагерь жұмысымен та­нысуға бағытталған жұмысымыз сәтті әрі қызықты өтті. Өзіміз де көңілді балалармен жақсы уақыт өткіздік. Бір күндік лагерь өмірінде небір қызықтар болғанымен, негізгі іс-шараларды қағаз бетіне түсіріп, оқырманға ұсынуды жөн санадық.

Назым ӘБІЛХАЙ,
Қорқыт ата атындағы
Қызылорда университеті
журналистика факультетінің
1-курс студенті