Шуақты күннің шырайын келтірді

Балалардың жазғы демалысын ұйымдастыруға пандемия уақытында шектеу қойылғаны белгілі. Қиын-қыстау күндер артта қалып, бүгінде балғындар қызықты сәттерге куә болуда. Мәселен, «Жалын» тынығу лагерінде 7 ауысым бойынша оқушылар демалуда. Бұл ретте, әрбір тынығушының уақытын тиімді өткізу мақсатында Сырдария ауданы бойынша білім бөлімінің әдіскерлері «Көңілді бейсенбі» тақырыбында іс-шаралар өткізді.

Бір күнге созылған іс-шаралар барысында баланың ой-қабілетін дамыту, шығарма­шылығын шыңдау, дене қозғалысын арт­тыруға көңіл бөлінді. Ең бірінші кезекте, тынығушылар «Біздің лагерь» тақырыбында сурет салу байқауында бақ сынады. Білікті маман Зәуре Білісбаева бастаған әділ қазы­лар құрамы ерекше сурет салған балаларды анықтады. Олардың қабілетін ашу, сурет салуға деген ынтасын ояту үшін жан-жақты бағыт-бағдар берді. Бұдан кейін әдіскер Сұлтан Үсеновтің жетекшілігімен «Біз жүй­рікпіз, шапшаңбыз!» атты топтар арасында эстафеталық жарыс жалғасын тапты. Бір­неше кезең бойынша жарысқан топтар ұйым­шылдық үлгісін көрсетті.

– Таңертеңгі сессияны балалардың шы­ғар­машылығы мен спорттық қарым-қабіле­тін ашуға арнадық. Ойы ұшқыр балалар тақырыптық сурет салуға бейім. Сонымен бірге жас суретшілер қиялға ерік беріп, керемет туынды жасауға тырысты. Өз кезегінде эстафеталық жарыста жылдамдық маңызды рөл ойнады. Жан ұшыра ойнаған балалар жеңіс үшін барын салды, – дейді әдіскер Зәуре Білісбаева.

Ал «Алтын көмбе» деп аталатын топтық сайыста демалушылар жасырылған сурет қиындыларын тауып, интеллектуалды сұраққа жауап берді. Шапшаңдық пен ақыл­дылық таразыға түскен сайыста сала мамандары Гүлжанат Қасымова, Салтанат Сақтағанова бастаған төрешілер жеңімпаз топты анықтады. Сондай-ақ балалар арасында пікірталас сайысы өткізіліп, бірнеше тақырып бойынша мәселе көтерілді. Айта кету керек, пікірталас жүргізген балалар «Ауыл өмірі» мен «Қаланың тұрмыс-тіршілігі», «Электронды кітап ерекшелігі» мен «Құнды қағаз кітаптың бағасы», «Ата-ананың тәрбиесі» және «Блогердің атқарар қызметі», «Дала ойындары» мен «Компьютерлік ойындар» тақырыбында кеңінен ой қозғады. Әдіс­кер Алуа Нұрабаева мен №131 Талғат Қозыбаев атындағы орта мектептің мұғалімі Ақерке Нұрғалиева жеке дара шыққан топтар арасында «Мен аға тәлімгер болсам...» деген тақырыпта пікірталас жасады.

Қай кезде де лагерь кеші көңілді. Тәулік бойы ұйымдастырылған іс-шаралардың қоры­тындысы ретінде «Жұлдыздар шеруі» пародия орындаушылар сайысы өткізілді. Әрбір топтан қатысушылар ән шырқап, би биледі.

– Қазіргі уақытта «Жалын» тынығу ла­­герінің төртінші ауысымында балалар тыны­ғуда. Ауданға қарасты 17 білім орда­сының оқушылары қызықты күндерін өткізуде. Ал­дағы оқу жылына жақсы көңіл-күйде бару үшін сала мамандары мен ата-аналар бар мүмкіндікті жасауда. Лагерь тынығушылары арасында көптеген жарыс­тар өткізіліп тұрады. Әр ауысымда лагерь тәрбиешілері кезекпен қызмет етеді. Арнайы демеушілердің қолдауы арқасында бағалы сыйлық үлестіріледі, – дейді әдіскер Ерлан Әбілдаев.

Осы күні «Жалын» лагерінің тынығушылар думанға толы күнді қорытындылап, әрбір сайыстан жеңімпаз атан­ған оқушылар марапатталды. Сонымен бірге барлық сайыс бойынша көш ілгері болған «Бейбітшілік» тобына арнайы кубок пен бағалы сыйлық табысталды.

Балтабай ОРДАБЕКОВ