Қызылордада қыз-келіншектер арасында Құран Кәрімді жатқа оқудан сайыс өтті

ҚМДБ-ның Қызылорда облысы бойынша өкілдігі, қалалық «Нұр» мешітінің «Әйел-қыздар» секторының ұйымдастыруымен қыз-келіншектер арасында Құран Кәрімді жатқа оқу бойынша сайыс өтті, деп хабарлайды Kyzylorda-news.kz. 

Рамазан айының құрметіне өткен жарысқа «Нұр» мешітінің «Әйел -қыздар» бөліміне қарасты діни сауат ашу курсында білім алушы 25 шәкірт қатысты.

Үміткерлер Құранның қысқа сүрелерін жатқа оқу номинациясы бойынша додаға түсті.

Қазылар алқасының бағалауы бойынша 6 қатысушы үздік деп танылып, нәтижесінде І орынды Аружан Бекмырза мен Баян Бахытқызы иеленді. Ал ІІ орын Аружан Раушанбек пен Гүлдана Әбдіраш Гүлданаға бұйырды. Сондай-ақ ІІІ орынды Ханшайым Пазылбек пен Айша Жақсылыққызы өз қанжығаларына байлады. 

Жеңімпаздар қаржылай сыйлықтармен марапатталса, қалған қатысушыларға да ынталандыру сыйлықтары табысталды. 

Айта кетейік, «Әйелдер-қыздар» секторының ұйымдастыруымен облыстағы мешіттердің әйел шәкірттері күнделікті Құран хатым дұғасын жасауда.