Тіршілік тынысы Tirshilik-tynysy.kz ақпараттық агенттігі
» » Күн тәртібінде – жасөспірімдер мәселесі

Күн тәртібінде – жасөспірімдер мәселесі

«Бала тәрбиесіне қоғам жауапты. Ал қоғамға мектеп те, ата-ана да, үлкен де, кіші де кіреді». Бұл – аудандық білім бөлімінің басшысы Берік Жәнібековтің бала тәрбиесінің бүгіні мен ертеңі туралы кеңейтілген мәжілісте айтқан сөзі. Расында да бұл нәзік әрі терең және жан-жақты зерделеуді қажет ететін күрделі мәселені мектептікі, ата-ананікі деп бөлуге болмайды. Тереңіне үңілер болсақ, баланың бүгіні мен болашағына қоғамның барлық мүшесі тікелей жауапты.

№36 Ә.Тәжібаев атындағы мектеп-лицейде аудан­дық білім бөлімінің ұйымдастыруымен кеңей­тілген жиын өтті. Жиынға аудандық прокуратура, полиция бөлімінің өкілдері, ардагерлер кеңесінің мүшелері, мек­теп директорлары мен орынбасарлары, ата-аналар комитетінің төрағалары, психологтар қатысты. Жиында кәмелетке толмағандардың ісі кеңінен талқыланып, баяндамалар тыңдалып, ұсыныс-пікірлер айтылды.

Ең алдымен, аудандық прокуратура прокуроры Дәуірбек Ұзақбаев заңдағы өзгерістерге, құқық­бұзу­шылық профилактикасына тоқталды. Ол әр баламен жеке жұмыс істеу қажеттігін айтып, мектеп оқу­шысының теріс іс-әрекеті оның болашағына кері әсер ететінінен мысалдар келтірді. Мұнан соң аудандық полиция бөлімінің ювеналды полиция тобының инс­пекторы Ақдәулет Созақбаев кәмелеттік жасқа тол­мағандардың қатысуымен орын алған оқиғалар туралы баяндады. Мәжілісте аудандық білім бөлімінің әдіскері Ерлан Әбілдаев жасөспірімдер арасында жүргізілген құқық бұзушылық профилактикасы жөнінде хабарлама жасады.

Жиын барысында еңбек ардагері, №35 И.Тоқты­баев атындағы мектеп-лицейінің «Шаңырақ» әке­лер ұйымының төрағасы Мектепхан Елеусінов пен арда­гер-ұстаз, «Сырдария ауданының әйелдері» қоғамдық бірлестігінің төрайымы Ұлмекен Жанәлиева бала тәр­биесіндегі ата-ананың, ұлттық құндылықтардың рөлі тақырыбында пікірлерімен бөлісті. Сондай-ақ №35 И.Тоқтыбаев атындағы мектеп-лицейі директорының тәрбие ісі жөніндегі орынбасары Ләйла Сағымбаева «Ұр­пақ тәрбиесі – ұлт болашағы» тақырыбында кең көлемді баяндама жасады.

Мәжілісте мектеп директорлары мен орынбасар­ларының, ата-аналар комитеті төрағаларының, сынып жетекшілерінің де пікірі тыңдалды. Олар бала тәрбиесі, оқушылардың білім деңгейі мен тәртібі туралы өз ойларын ортаға салды. Жиынға қатысу­шы­лар оқушылардың саналы тәрбие, сапалы білім алуы үшін бірлесе еңбек етуге уағдаласты. Мәжілісті қорытындылаған аудандық білім бөлімінің басшысы Б.Жәнібеков күн тәртібіндегі мәселенің маңызды еке­ніне ерекше назар аударды.

– Оқушылар арасында тәртіп орнату, ата-ана­лар­дың жауапкершілігін арттыру, қылмысты болдырмау жолдарын дамытып, жандандыру – мектеп пен ата-ана бірге жұмыс жасағанда ғана жүзеге аспақ. Сонда ғана жасөспірімдер арасындағы құқық бұзушылық азайып, балаларымыз бақытты ортада өмір сүреді. Сондықтан бәріміз бірдей жауапты екенімізді назарда ұстап, бірлесе еңбек етейік, – деді бөлім басшысы.

А.ҚҰРМАНАЙТЕГІ
10 қаңтар 2023 ж. 238 0