Келеңсіз жағдай қайталанбасын

Бейбіт күннің қадірін біліп, ты­ныш­тықтың мәнін түсіну үшін аса көп ақылдың қажеті жоқ. Халқымызға ке­регі – ел-жұрттың амандығы. Бірақ төтеннен келетін қайғы-қасірет кейде тұтас бір ұлттың басына бұлт үйіретіні өкінішті. Талай сындарлы сәттен өт­кен халқымыздың басынан тағы да ұмы­тылмас сәт өткені мәлім. Мұны тарих өз қойнауына алып кеткенімен, көптеген отбасы өз жақынынан айырылып, қара жамылды.

«Қасіретті қаңтар» оқиғасы болып, тарихтың қатпарына сіңіп бара жатқан елімізде болған дүрбелеңге бір жыл толып тұр. Өткен жылғы айтулы оқиға кезінде біздің жастарымыз арандап қалды. Ол – ақиқат. 

Осы оқиға тұсында біз көптеген нәрсені басқаша ұғындық. Біз, мәңгілік құндылықтар мен өмірлік маңызға ие көптеген дүниені басқа қырынан көрдік. Азанғы ұйқыдан мылтықтың да­уысынан оянбауды үміт еттік. Мем­лекетіміздің жат пиғылдылардың қол­да­рына өтіп кетпеуі үшін Жаратқанға жалбарындық. Жаппай тәртіпсіздіктің салдарына бойламай, дүрбелеңге араласып, өмір сабақтары ерте қиылған боздақтар үшін қайғырдық. Міне, сол қайғылы оқиғаның ақиқатын ашу үшін Мемлекет басшысының тапсырмасына сәйкес қыруар іс тындырылуда. Көптеген жайттың басы ашылуда. Ақпарат көздерінен осы дүрбелеңді ту­дыру үшін талай уақыт әзірлік жүр­гендігі туралы айтылды. Тіпті, сырт мемлекеттерден де қатысушылар тобы болғандығы анықталған. Дегенмен ел бірлігі мен татулығы бәрінен қымбат. Шынайы көзқарас пен биліктің дер кезінде қолға алған шешімінің арқа­сында елде тыныштық орнады. Көптің тілегі қабыл болып, қорқыныш сейілді. Қалыпты өмірге көп ұзамай оралып, бүлінген мүлік қалпына келді.

Алдағы уақыттарда мұндай келең­сіз жағдайлар орын алмай, еліміз да­мудың даңғылына түсіп, өсіп-өркен­дей берсін!

Марат ЕСПЕНБЕТОВ,
аудандық қоғамдық
кеңес төрағасы