Ерекше өткен ертеңгілік
Тереңөзек кентіндегі «Айгөлек» бөбекжай балабақшасының тәрбиеленушілері Жаңа жылды жарқын көңілмен қарсы алды. Мектепке дейінгі білім беретін мекемеде топтар бойынша Жаңа жылдық іс-шаралар, ертеңгіліктер өткізіліп, бүлдіршіндер қуанышқа кенелді.Балабақшаның кіші «Балапан» тобында «Қош келдің, Жаңа жыл» атты ертеңгілік өтті. Іс-шараны топ тәрбиешісі Күлзихан Сәтбай ұйымдастырып, балалар өздерінің өнерлерін көрсетті. Ертеңгілікке «Айгөлек» бөбекжай балабақшасының меңгерушісі Күлжамал Жолдасова қатысып, кіші топ бүлдіршіндерін Жаңа жыл мерекесімен құттықтап, балғындарға жарқын болашақ тіледі.
Көңілді ертеңгілікте түрлі кейіпкерлер балаларға ерекше көңіл-күй сыйлады. Әуен ырғағымен ортаға келген сиқыршы шыршаның түрлі ойыншықтармен безендірілгенін атап, оны жағуға Аяз ата мен Ақшақардың керектігін айтты. Бүлдіршіндер ортаға Аяз ата мен Ақшақарды шақырып, шырша шамы жағылды. Осы мезетте топ тәрбиеленушілері Нұрәлі, Айғаным, Нұржұма мерекелік тақпақтарын оқыды. Сондай-ақ балғындар «Жаңа жыл» әнін хормен шырқады.
Топ тәрбиешісі Күлзихан Сәтбай Жаңа жылдың мән-маңызын бүлдіршіндерге түсіндіріп, жаңа жылға ену арқылы жаңа бастамалар жүзеге асырылатынын жеткізді. Ертеңгілік барысында көңілді әндер шырқалып, би биленді. Балалар қуанышқа кенеліп, Жаңа жылдық сыйлықтар алды.
«ТТ» ақпарат
