Білім мен тәрбиенің тірегі

Аудандық басылым жыл басынан бері барлық балабақша жұмысы туралы жазып келеді. Бұл – «Балалар жылы» аясында қолға алынған жоспарлы міндет. Бүгін оқырмандар назарына «Айгөлек» балабақшасының тыныс-тіршілі­гі туралы мақаланы ұсынамыз.

Тереңөзек кентіне қарасты «Айгөлек» балабақшасының тарихы 1967 жылдан басталады. Сол жылдары О.Мәлі­баев ауы­лы атанған елді мекендегі ба­лабақшаны Б.Сәдуова басқарған. Содан соң Ж.Оспанова, Ш.Ибрашова балабақ­ша жұмысына жетекшілік еткен. 1985 жылы балабақша ғимараты совхоздың кеңсесіне көшіріледі. Басшылық тізгінді Қ.Байжанова алып, тәрбиешілер М.Жү­нісова, З.Ермашова, Д.Байжүнісова, Б.Сә­дуова қызмет атқарады. Нарықтық эко­но­микаға төтеп бере алмаған балабақша 1999 жылы жабылады. Арада 3 жыл өткен соң 2002-2005 жылдары №131 орта мектеп жанынан «Айгөлек» мектеп­алды тобы болып қайта құрылымданады. 2005 жылы мектептің жаңа ғимаратқа көшуіне орай, балабақша өз алдына мекеме болып қалыптасады. Елді мекен бүлдіршіндерін мектепке дейінгі тәрбиемен қамтамасыз етіп келе жатқан балабақ­шаны ұзақ жыл А.Шоқанова басқарса, соң­ғы 4 жылдан бері тәжірибелі педагог К.Жолдасова ба­лабақшаға басшылық жасауда.

«Айгөлек» бөбекжай балабақшасы 2005 жылдан бастап жобалық қуат­ты­лыққа сәйкес жұмыс жасайды. Балабақ­шадағы 21 қызметкер балақай­ларға жақ­сы жағдай жасап, денсаулығын жақ­сар­тып, тәрбие мен білім беруде.

– Балабақшада екі топ бар. «Ботақан» және «Балапан» тобы. 50 бүлдіршінге 8 педагог, оның 1-сарапшы, 4-модератор мамандары мен 13 кіші буын қызметкері тәрбие мен білім береді. Қазақстан Республикасының Оқу-ағарту министрлігі 2022 жылы 14 қазанда «Мектепке де­йінгі тәрбие мен оқытудың үлгілік оқу бағдарламасын» бекітті. Қа­зіргі таңда барлық мектепке дейінгі тәрбие мен білім беру ұйымдары осы бағдарлама не­гізінде өз жұмыстарын іске асыруда. Бағдарламаның мақсаты – әр баланың қызығушылығын, ерекшеліктері мен қа­жет­тіліктерін ескере отырып, жалпы адами және ұлттық құндылықтар негі­зінде оларды толыққанды дамыту мен әлеуетін ашу. Сонымен қатар ба­ла­ларды қазақ халқының ұлттық құнды­лығына, отаншылдыққа, Отанға деген сүйіспеншілікке, мәдени-әлеуметтік нор­маларға баулиды. Балаларды дамыту мен тәрбиелеу үшін отбасы мен мектепке дейінгі ұйымның күш-жігерін біріктіру – негізгі міндеттің бірі. «Айгөлек» бөбекжай балабақшасының педагогтері осы бағыт­та жұмыс жасап, тәрбиеленушілердің ой-өрісін дамытып, жасына сәйкес дағ­дыларын меңгертіп, жеке тұлға етіп тәр­биелеуде, – дейді балабақша меңгерушісі К.Жолдасова.

Балабақша жұмысы ондағы тәжі­ри­белі мамандардың ізденісіне, шығар­ма­шылықпен жұмыс жасау дағдысына бай­ланысты. Бүлдіршін күн сайын тәр­бие­шісінен айналаны танып-білуді, өнерді т.б. үйренеді. Осындай өз ісінің нағыз маманы, 35 жыл үздіксіз педагогикалық стажы бар музыка жетекшісі Айымкүл Жолжанова әріптестерінің арасында құрметке ие. Бүгінде құрметті еңбек демалысына шықса да бала бақшамен тығыз байланыста. Сондай-ақ көп жылдан бері еңбек етіп келе жатқан әдіскер Р.Көшербаева, педагог-психолог А.Жарылқасынова, тәр­­­биешілер К.Сәтбай, М.Шоханова, Ш.Нияз­бай, А.Құрақбаева, музыка же­тек­­шісі А.Әлімбетованың еңбегін ерекше атап өту керек.

Бөбекжай балабақша тәрбиешілері өткен оқу жылында жақсы жетістіктерге қол жеткізді. Атап айтсақ, тәрбиеші М.Шоханова «Мектепке дейінгі ұйымның үздік педагогы» атты аудандық байқауда ІІ орынды иеленді. Ал тәрбиеші Ш.Нияз­бай қашық­­­­­тан өткізілген «Ең үздік тәр­биеші – 2021» байқауының І орын иегері атанды.

«Үйренер нәрсең – білім мен мейірім­ділік», – деп Жүсіп Баласағұн айтқандай, балабақша ұжымы әрбір күнін ізденіспен өткізеді. Оның нәтижесі бүлдіршіндердің түрлі сайыстарда жүлделі орындарға ие болып жүргені.

Мәселен, республикалық деңгейдегі қашық­тан сурет салу байқауында тәр­бие­ленуші Расул Жүніс «Ұрпақтар ұмыт­пайтын Ұлы Жеңіс» атты сурет салу номинациясы бойынша І орын иеленді. Аянұр Заммадин, Әдемі Ерлан, Алдияр Тобағабыл, Мақсат Нұрашов, Рабил Жүніс «Жазғы көңіл күй» атты сурет салу байқауында жүлделі орынмен марапатталды. Айжан Әлімбетова ұйымдастырған «Шашу» би тобы аудандық «Балалық шағымның шуақты биі» атты сайыстың І орын иегерлері атанды. «Тіл болашағы бала бақшадан» атты аудандық байқаудан Жанель Нұрхан, Рамазан Берікболов марапатталды. Жанельдің республикалық қашықтан ұйымдастырылған «Достық бекеті» бейнеролик байқауында, «Біз жеңістің ізбасарларымыз» сайысында, «Алаш стар» өнер байқауында жүлдегер атанып, жетістікке жеткені бала бақша мәртебесін асырды. Раяна Олжасқызы рес­публикалық қашықтан өткізілген «Кел балалар оқылық!» атты байқаудан І орын, «Бала тілі – бал» бейнеролик байқауынан «Алғыс хатпен» марапатталуы жетістікті еселей түскен. Сондай-ақ Мұхит Ерболұлы «Қысқы ертегі» сурет байқауынан І орын, «Ұрпақтар ұмытпайтын Ұлы Жеңіс» атты байқаудан ІІ орынды иеленді. Ернұр Әлібек пен Нұрайым Мұстафа «Көк тудың желбірегені» атты байқаудан ІІ орынды жеңіп алып, тәрбиешілердің мерейін үстем етті.

– Балабақшаның материалдық-техни­калық базасына келер болсақ, балабақша ғимараты 1972 жылы салын­ған көне болғанымен жылумен жақсы қамтылды. Биыл көгілдір отынға қосы­лып, үздіксіз жылумен қамтамасыз еті­луде. Балаларға қажетті құрал-жаб­дықтар мен ойыншықтар жеткілікті. Әр топ балаларына арналған жеке-жеке оқу, ұйық­тау, ойын бөлмелері мен асхана, медициналық кабинет бар. Ерекше білім беруді қажет ететін балаларға арнайы кабинет жасақталып, толық құрал-жабдықтарымен жабдықталды. 2020 жылы бөбекжай балабақша ғимаратына ағымдағы жөндеу жұмыстары жүргізіліп, ғимараттың қабырғалары жаңадан сыланды. Кәріз жүйесі іске қосылып, бала­лардың әжетханасы ішке орналастырылды. Бөбекжайға «Қызылдихан» шаруа қожалығы демеушілік жасап, қажетті құрал-жабдықтарға қаржы бергенін айта кету керек. Қаржыға интерактивті тақта, педагогтер пайдаланатын ноутбук, балаларға арналған төсеніш, кір жуатын машина, мұздатқыш т.б құрал-жабдықтар алынды. Жыл сайын шаруа қожалық төрағасы мен «Жарбол» шаруа қожалығы балаларға мерекелік сыйлық үлестіруді дәстүрге айналдырды. Сондықтан шаруашылық басшыларына зор алғысымызды білдіреміз, – дейді тәжірибелі басшы.

«Балалар жылында» зор жетістіктерге жетіп, бала тәрбиесінде үздіктер қатарын­да келе жатқан балабақша ұжымына шығармашылық табыс тілейміз.

Бибісара ЖАНӘЛІ