«Толағайдағы» тағылым
Негізінен, балалармен жұмыс жасайтын мамандардың тұжырымына сүйенсек, балабақшаға балғындарды 2-4 жас аралығында беру керек екен. Себебі, осы жастағы балалар өз-өзіне бас-көз болуды, көпшілікпен араласуды меңгереді. Шындығында, бала тәрбиесімен айналысып келе жатқан мектепке дейінгі білім беру ұйымдарының қызметі сан тарапқа бөлінеді. Бұл ретте, аудан орталығынан шалғайда орналасқан Айдарлы ауылындағы №139 орта мектебінің жанынан ашылған «Толағай» шағын орталығы әрбір бүлдіршінге сапалы білім беруді көздейді.Осыдан 11 жыл бұрын республикалық бюджет есебінен ашылған «Толағай» шағын орталығында бүгінгі таңда 1 топ жұмыс жасайды. Қазіргі уақытта шағын орталықта 20 бүлдіршін білім нәрімен сусындауда. Осыған дейін бірнеше топ балғындарын үлкен өмірге қанаттандырған 4 педагогтың еңбегі зор. «Балбөбек» тобына жауапты тәрбиешілер әр баланың қалыпты дамуына, дұрыс өсуіне айрықша көңіл бөледі. Балаларды ынталандыру, өнерге баулу, сөйлеу дағдысын жетілдіру, ой-өрісін кеңейту, жүріс-тұрысын дұрыстау секілді көптеген әдіс-тәсіл сабақ барысында қолдануға машықтанған.
– Қай кезде де «Өнегелі болса – бала көрікті» екені мәлім. Қашанда баланың тәрбиесімен айналысу – күн тәртібінен түспейтін маңызды мәселе. Әрбір үйдің үкілеген үмітіне тағылымды жол көрсете білу маңызды рөл ойнайды. Бұл ретте, «Толағай» шағын орталығы айқын бағыт-бағдарынан еш айныған емес. Заман талабына сай, бүлдіршінге білім беруге біз мүдделіміз. Шағын орталықта жергілікті бюджет есебінен үшінші топ ашылғанымен, бала санының толмауына байланысты 2017 жылы жабылып қалды. Ал өткен жылы тағы бір тобымыз қысқарды. Білім беру ережесіне сай, шағын орталықтың күн тәртібі бекітілген. Таңертең әр топтағы баланың жас айырмашылығына байланысты жаттығу жасалады. Ал күннің бірінші жартысында тәрбиешілер балаларға оқу-әдістемелік жоспар бойынша сабақ береді. Қалған уақытта педагог мамандар вариативтік сабақ және дидактикалық ойын ұйымдастырады. Айта кетейік, осыдан бірнеше жыл бұрын аудандық «Үздік – тәрбиеші» байқауынан ұжым мақтанышы Гүлмира Алиева І орынды жеңіп алды. Өнерлі балғындарымыз да республикалық, облыстық, аудандық түрлі байқауларда топ жарып жүр, – дейді «Толағай» шағын орталығының директоры Гүлбану Жақсылыққызы.Бүгінде жаңашылдыққа бет бұрған кез келген тәрбиеші балаға тағылымды тәрбие беріп қана қоймай, кәсіби біліктілігін жүйелі түрде жетілдіріп отыруы тиіс. Педагогикалық құрамға әдіскер А.Исмайлова жан-жақты қызмет көрсетуге көмектеседі. «Зерек бала», «Біз мектепке барамыз» бағдарламасы шеңберінде шағын орталықтың балғындарды өнерге баулуы жолға қойылған. Ұстаз бен шәкірт үздіктер қатарынан көріне білген шағын орталықта ата-анамен байланыс берік орнаған. «Толағай» шағын орталығында тәрбиеленетін бүлдіршіндердің мектепке дейінгі біліммен қамтылуына айдарлылық ата-аналардың көңілі толады және ұжымға алғысын білдіруде.
Қашанда жетістік жолында ұстаздар қауымы қажыр-қайратымен еңбек ете бермек. Әрине, кәсіби біліктілігі жоғары мамандар баланың болашағына бейжай қарамайтыны анық.
Балтабай ОРДАБЕКОВ
