Тәрбие мен оқытуды ұштастырған орталық
«Балалар жылы» аясында аудандағы балабақшалар мен шағын орталықтардың жұмысын ақпараттандыруды жыл басында бастағанбыз. Бүгін №129 Ә.Жәмішев атындағы мектеп-лицейі жанындағы «Күншуағы» шағын орталығының жұмысы туралы айтатын боламыз.2010 жылы наурыз айында ашылған шағын орталық мектеп-лицей ғимаратында орналасқан. Онда екі топ жұмыс істейді. «Балақай», «Балапан» тобында 40 бүлдіршін тәрбиеленуде. Бүлдіршіндердің жас ерекшеліктеріне қарай көрнекі құралдармен жабдықталған. Кең әрі таза бөлмелерде балалар күнұзағына оқу-тәрбие жұмысымен қамтылады. Орталықта 5 тәрбиеші, 1 музыка жетекшісі қызмет атқарады.
– Оқыту мен тәрбиелеу үрдісі Қазақстан Республикасының Мемлекеттік жалпыға міндетті білім беру стандарты негізінде «Мектепке дейінгі тәрбие мен оқытудың» негізгі ережелеріне сүйеніп жүргізіледі. Оқу жылының басында мақсат-міндеттер айқындалады. Мұнда орта топ, ересек тобы болғандықтан үлгілік оқу бағдарламасы басшылыққа алынады. Оқу жоспарында білім саласының мазмұнын меңгеруге бөлінген ұйымдастырылған оқу іс-әрекетінің жоспары базалық оқу жоспарында белгіленген ұйымдастырылған оқу іс-әрекетінің санымен сәйкестендіріледі, – дейді орталық әдіскері Салтанат Ермекова.
Шағын орталықта күн тәртібіне сәйкес іс-әрекеттің ұйымдастырылуы қадағаланып, бақылау жүргізіліп, оған талдау жасалады.
«Балапан» тобының тәрбиешілері Күләш Майлыхожаева, Гүлмира Әли және Ақбота Үббіхожаевалар балалардың әрбір күнін қуанышқа толтыру мақсатында қызықты іс-шаралар өткізеді. Тәрбиешілер балаларды балабақшаға бейімдеу, мәдени-гигиеналық дағдыларды меңгеру, қалыптастыру, ойын арқылы балалардың дұрыс сөйлеуіне ықпал етуге дағдыланған. Жыл бойы өтетін іс-шаралар ойын түрінде өтуге негізделген.
– Үстел үсті, қуыршақ театры, шағын сахналау ұйымдастырылады. Балғындардың халық ауыз әдебиеті мен көркем шығармаларға деген қызығушылығын арттыру мақсатында фланеграфта «Шалқан», «Бауырсақ», «Үйшік» ертегілерін қойдық. Балаларға жыл мезгілдерді ажырату, табиғатқа деген сүйіспеншіліктерін арттыру бағытында «Күзгі орманға қонаққа бару», «Гүлдерді күтіп баптау» секілді ашық байқаулар өткіздік. «Менің әжемнің ертегісі», «Жаңа жыл кешінде», «Аналар күні» атты ертеңгілік бүлдіршіндердің ой-өрісін дамытуға септігін тигізді, – дейді тәрбиеші Күләш Майлыхожаева.
«Балақай» тобына биыл 20 бала қабылданған. 4-4,5 жас аралығындағы балаларға Индира Қосжанова мен Фарида Нәбиева тәрбие береді.
– Шағын орталыққа баламды әкелдім. Мұнда ұлым тәрбиешілердің қарауында болады. Күнделікті жүргізілетін оқу-тәрбие жұмыстарының арқасында балам анық сөйлеп, тақпақ айтуды үйренді. Мектепке дайындықтың алғашқы сатысын қалыптастырып жатқан шағын орталық тәрбиешілеріне алғыс білдіремін, – дейді ата-ана Меңтай Тәжіхожаева.
Мектепке дейінгі тәрбие беру мекемесі бүлдіршіндері жыл бойы мәдени-гигиеналық дағдыларын қалыптастырып, тілін жетілдіреді. Достыққа, патриоттық сезімге тәрбиеленеді. «Білім күні», «Менің атам», «Қарттарым – асыл қазынам», «Күз сыйы», «Жасыл шырша жанында», «Күннің шуағы жылы, ананың құшағы жылы», «Наурыз – жыл басы», басқа да іс-шаралар өткізу жоспарға енген. Әрбір іс-шара барысында әуез жетекшісі Айжамал Ташауова балаларды ән айтуға баулып отырады.
Шағын орталықтың педагог-психологы Салтанат Мейрамқызы балаларды экологиялық тәрбие беру, табиғатты сүюге, аялауға тәрбиелеп, жиі-жиі маусымдық серуендер ұйымдастырады. Балалармен құстарға үйшік жасап, орталықтың ауласындағы ағашқа балғындармен бірге ілуі үлкен қуанышқа ұласты.
Тәрбиешілер ата-аналармен де әртүрлі тәрбие жұмыстарын, мәдени іс-шаралар өткізуді назардан тыс қалдырған емес. Ата-аналар барлық ашық байқауларға, ертеңгіліктерге қатысады. Жылдың басында және жыл соңында ата-аналардан сауалнамалар алынып, нәтижесі бойынша жұмыс жоспарына ұсыныс-пікірлері енгізіледі.
Осылайша, бүгінде Шіркейлі ауылындағы мектеп-лицей жанындағы «Күншуағы» шағын орталығында мектепке дейінгі тәрбиенің негізі қалануда.
Бибісара ЖАНӘЛІ
