Дара тұлға – дара жол
Салт пен сана, дүниетаным мен руханиятты жандандырушы негізгі күш – ұлттық мәдениетімізді өркендету. Осы ретте қазіргі қоғам көзқарасы қалыптасқан зерделі де зерек тұлға тәрбиелеуі тиіс.Осы орайда, аудандық мәдениет үйінде көлемді іс-шара ұйымдастырылды. Мәдениет үйінің фоесінде аудандық кітапхана қызметкерлері көрме ұйымдастырып, келген қонақтарға кездесудің мәні мен мазмұнынан сыр шертіп тұрды. Аудан әкімдігінің қолдауымен аудандық ішкі саясат және «Сырдария ауданының әйелдері» қоғамдық бірлестігі ұйымдастырған басқосу «Ер балалар – ел қорғаны, қыздар – ұлт болашағы» деген тақырыпты арқау етті. Бағдарламаның ерекшелігі – жастар өкілдері есімі ауданға, Сыр өңіріне ғана емес, республикаға белгілі қайраткер-тұлғалармен кездесті. Рухани әрі тәрбиелік маңызы бар жиынның құрметті қонақтары мемлекет және қоғам қайраткері, «Қызылорда облысының және Сырдария ауданының Құрметті азаматы», «Құрмет белгісі», «Парасат» ордендерінің иегері, облыстық «Ұрпақтан-ұрпаққа» қоғамдық бірлестігінің төрайымы Алмагүл Божанова мен Қазақстанның еңбек сіңірген қайраткері, композитор, «Қызылорда қаласының және Сырдария ауданының Құрметті азаматы», «Құрмет» орденінің, «Шапағат» медалінің иегері Рамазан Тайманов болды. Сондай-ақ, дарабоз тұлғалардың дара жолын кейінгі ұрпаққа насихаттау мақсатында өткізілген іс-шараға аудан әкімі Мұрат Ергешбаев, облыстық әйелдер кеңесінің төрайымы Райкүл Байназарова, бөлім басшылары, қызметкерлер, ұстаздар мен аудан орталығындағы білім ордаларының жоғарғы сынып оқушылары қатысты.
Тағдыр жолы тағылымға, өмір жолы өнегеге толы қос тұлғамен сырлы сұхбатқа негізделген бағдарламаны Қазақстан Жазушылар және Журналистер Одағының мүшесі, аудандық мәслихат депутаты, аудандық газеттің бас редакторы Ақтөре Ибрагимұлы жүргізді. Өнегелі өмір иелерінің сырлы сұхбаты, еркін форматтағы әңгімесі жастарға өнеге болды.
«Ер балалар – ел қорғаны, қыздар – ұлт болашағы» тақырыбын арқау еткен басқосудың шымылдығын ашып берген аудан әкімі М.Ергешбаев ауданнан шыққан біртуар тұлғаларды сөзге тиек етті.– Сырдария ауданы – тамыры терең, тарихы кенен, береке-бірлігі бекем киелі өңір. Қасиетті қарт өзеннің жағасында орналасқан ынтымағы жарасқан Сырдария ауданы бүгінде әлеуметтік-экономикалық әл-ауқаты қарқынды дамып, аймағымызда алдыңғы қатарда жүрген елді мекеннің бірі. «Сырдария» дегенде дария жағасында жайқалған дала мен ол жерде тынымсыз еңбек еткен еңбеккерлеріміз ойымызға келетіні белгілі. Асқар Тоқмағамбетов, Әбділдә Тәжібаев жырлаған дархан далада күріштен тау тұрғызған «Социалисттік Еңбек Ерлері» Дүйсенбай Керейтбаев, Ибадулла Ақниязов, Цой Ги Хва, Қасым Бөдеев, Ахмет Халықов секілді азаматтар, нәзік жанды болса да Күләнда Әбдіраманова, Балдырған Мұстафаевалар еңбектің ерлігін көрсеткен, – деп Сыр елінен шыққан азаматтар мен азаматшаларды тізбектеп өткен Мұрат Нәлхожаұлы басқосудың құрметті қонақтары Алмагүл Божанова мен Рамазан Таймановтың елге сіңірген еңбегіне тоқталды.
Сыр-сұхбаттың алғашқы сұрағы Алмагүл апайға қойылды. «Сізді аудан, облыс, тіпті республика жұртшылығы жақсы біледі. Қайраткерлік болмысыңызбен ел мүддесі жолында абыройлы еңбек еттіңіз» деп атап өткен модератор жастар жағына қайраткер тұлғаның балалық шағы туралы естеліктердің қызықты екенін жеткізді.
– Алғашқы тәрбиеміз отбасынан, ата-анамыздан, бауырларымыздан басталды. Менің ата-анам еңбекті пір тұтқан ақпейіл, адал жандар еді. Бізді адал еңбек етуге, кісінің ала жібін аттамауға, бардың қадірін білуге, қарапайым болуға үйретті. Осы қағидаларды біз бүгінгі күнге дейін берік ұстанып келеміз. Мен Тереңөзек ауданы, Қызылөзек елді мекеніндегі №132 орталау мектебінде білім алдым. Отбасынан кейінгі тәрбиені осы мектептің ұстаздары берді. Ата-анамыз бен сол мектептің, одан кейінгі өмір мектебінің берген тәлімі мен тәрбиесі күні бүгінге дейін бізге азық болып келеді, – деді қоғам қайраткері Алмагүл Божанова.Алмагүл Божанова – Тереңөзектің тумасы, балалық шағы, мектептегі жылдары осы елді мекенде өткен. Одан кейін училище, институт бітірген соң алғашқы еңбек жолын да туған жерден бастаған апамыз алғашқыда Шаған ауылында балалар бақшасының меңгерушісі, кейін Н.Ілиясов ауылындағы өзі білім алған білім ордасында орыс тілі мен әдебиеті пәнінен сабақ берген. Одан кейінгі уақыттарда Тереңөзек аудандық комсомол комитетінің бірінші хатшысы, А.Тоқмағамбетов ауылындағы №135 орта мектептің директоры, Тереңөзек аудандық партия комитетінің хатшысы, Тереңөзек аудандық Кеңестің атқару комитетінің орынбасары және төрағасы, Тереңөзек ауданының әкімі, облыстық мәслихат хатшысы, сол кездегі «Нұр Отан» партиясының облыстық филиалының төрағасы сияқты абыройлы әрі жауапкершілігі мол қызметтерді атқарған. Осы ретте айта кетейік, Алмагүл Божанова – республика бойынша аудан басқарған алғашқы нәзік жанды. Еліміз Тәуелсіздік алғаннан кейінгі уақыттағы қиын-қыстау кезеңдерде елдің, ауданның дамуы мен өркендеуі жолында аянбай еңбек еткен қайраткер тұлғаның есімі де, игілікті ісі де бүгінгі ұрпақтың жадында.
Келесі сұрақ Рамазан Таймановқа қойылды. «Қазақстанның еңбек сіңірген қайраткері», «Қызылорда қаласының және Сырдария ауданының Құрметті азаматы», белгілі композитор бүгінде Сыр елінің атын республика көлемінде танытып үлгерген. Алматы қаласындағы П.И.Чайковский атындағы музыкалық училищені, одан кейін Қорқыт ата атындағы Қызылорда университетін бітірген сазгер алғашқы еңбек жолын Сырдария аудандық мәдениет бөлімінде автоклуб меңгерушісі болып бастаған. Тереңөзек кентіндегі кәсіптік-техникалық училищеде «Гүлдерайым» ансамблін құрып, аудандық, облыстық деңгейдегі байқауларда топ жарған композитор өнерін кейінгі ұрпаққа үлгі етіп, шәкірт тәрбиелеу ісімен айналысып келеді. «Қазақ қыздарының гимніне айналған» «Қазақ қызы», Сыр елінің даңқын асқақтатқан «Қорқыт – қобыз» сияқты әндердің әуенін жазып, тыңдарманның жүрегінен орын алған композитор сырлы сұхбатта келер ұрпаққа өнеге болар көп әңгіменің тиегін ағытты.
Шығармашылық әрі сырлы сұхбатқа негізделген бағдарлама барысында қос тұлғаның бүгінгі қоғам, саясатқа қатысты пікірлері де назардан тыс қалмады. Бүгінде зейнет демалысында болса да қоғамнан алыс кетпей, елдегі ахуалды бүге-шүгесіне дейін қаныға біліп, ұдайы пікір білдіріп отыратын қайраткер тұлғалардың Жаңа Қазақстанға деген көзқарас-пікірлері тыңдарманға ой салды. Одан бөлек қос тұлғаның қызметіне, қайраткерлік болмысына, өнегелі өміріне, шығармашылығына қатысты, сондай-ақ ел көлеміндегі маңызды саяси және әлеуметтік мәселелерге байланысты сұрақтар қойылып, ұтымды жауап алынды. Елге дана болған дара тұлғалардың өнегелі өмірін насихаттауға бағытталған іс-шара еркін әңгімеге негізделді. Сондықтан қонақтар да, қатысушылар да еркін форматта ашық әңгіме мен ой бөлісіп, жиынның ұзаққа созылғанын аңғармай қалды.
Рухани басқосу соңында көрерменнің де көкейіндегі сұрақтарын тыңдауға мүмкіндік болды. Ұстаздар мен оқушылар залға қойылған микрофон арқылы өнегелі өмір иелеріне сұрақтарын жолдады. Алмагүл Божанқызына қойылған сұрақтардың негізгі тақырыбы ел басқару ісіне қатысты болса, Рамазан Сағындықұлына шығармашылық бағыттағы, әндерінің тарихына қатысты сұрақтар көп қойылды.
Руханиятымызды жандандырып, ұлттық мәдениетімізді дамыту және келешек ұрпаққа үлгі ету мақсатында ұйымдастырылған кеш, әрине, әсем әнсіз өтуі мүмкін емес. Осы ретте, жас әнші Ақбота Талғатқызы «Қазақстан Республикасы білім беру ісінің үздігі», «Құрмет» орденінің иегері Ділдахан Торғаеваның әні мен сөзіне жазылған «Алмагүл» әнін нақышына келтіріп орындаса, Динара Жакешова ақын Исраил Сапарбайдың сөзі мен Рамазан Таймановтың әніне жазылған «Қазақ қызы» әнін орындап, көрермен көзайымына айналды.
Рухани басқосуды қорытындылаған аудан әкімінің орынбасары Димаш Байдушев пен «Сырдария ауданының әйелдері» қоғамдық бірлестігінің төрайымы Ұлмекен Жанәлиева сөз алып, еңбегімен елеулі болған қос тұлғаға арнайы уақыт бөліп, жас ұрпақпен кездесіп, тәлім мен тәрбие көзі болар әңгіме өрбіткендері үшін алғысын білдірді. Сондай-ақ, дара жолы кейінгіге үлгі-өнеге болған қос тұлғаға қазақы танымға сай сый-сияпат табыстап, құрмет көрсетті. Мемлекет және қоғам қайраткері, «Қызылорда облысының және Сырдария ауданының Құрметті азаматы», «Құрмет белгісі», «Парасат» ордендерінің иегері А.Божанова кездесуге құр қол келмегенін айтып, «Ұрпақтан-ұрпаққа» деп аталатын туындысын кітап мазмұнына арқау болған тұлғалардың ұрпақтары мен кітапхана қызметкерлеріне тарту етті.
Аружан МҰХАНБЕТҚАЛИ
