Жаңа міндеттер жүктеді
Парламент палаталарының бірлескен отырысында Мемлекет басшысы Қасым-Жомарт Тоқаев Қазақстан халқына кезекті Жолдауын жариялады. Көпшілік асыға күткен құжатта ел дамуына қажетті барлық өзекті тақырыптар кеңінен қамтылды.Жолдауда көтерілген ең өзекті тақырыптың бірі – елдегі сайлау жүйесіне қатысты. Атап айтқанда, Мемлекет басшысы биыл Президент сайлауын, келер жылы Парламент сайлауын өткізуді ұсынды. Жалпы, Президенттің кезекті сайлауы 2024 жылы, ал Парламент сайлауы 2025 жылы өтуге тиіс болатын. Алайда Қ.Тоқаев қазіргі геосаяси жағдайды ескере отырып, мемлекеттігімізді нығайту жолында осындай бастама көтергенін айта кеткен жөн.
Сондай-ақ Президент өкілеттігі мерзімдерінің санын және ұзақтығын қайта қарау қажет екенін мәлімдеді. Осылайша, Президент мандатын ұзақтығы 7 жылдық бір мерзіммен шектеуді ұсынды. Мұндай бастаманың бірқатар артықшылығы бар. Біріншіден, 7 жыл кез келген ауқымды бағдарламаны жүзеге асыруға қажет. Сондықтан мандатты осындай мерзім етіп белгілеу бастаған істі аяғына дейін жеткізіп, жоспарды толық орындауға молынан жетеді.
Осы орайда, кейінгі кезде Парламенттің жұмысына қатысты көптеген өзгерістер болғанын айта кеткен орынды. Ендеше, елімізде саяси жаңғырту үдерісінде парламентаризмді дамыту ісі айрықша жүзеге асып жатқаны анық. Жаңарған Ата Заңымыз әділ әрі ашық ережелері бар саяси жүйенің мүлде жаңа стандарттарын енгізеді. Келесі жылы өткізілетін Парламент және мәслихат сайлауы көпшіліктің мүддесін білдіретін депутаттардың жаңа құрамын жасақтауға жол ашады. Бұл қадам мәслихаттар мен Парламент жұмысының тиімділігін арттырары сөзсіз.
Алдағы бір жылда елімізді үлкен саяси өзгеріс күтіп тұр. Биыл Президент сайлауы, келесі жылы Мәжіліс және мәслихат депутаттарының сайлауы өтеді. Содан кейін Үкімет құрамы жасақталады. Соның нәтижесінде, 2023 жылдың ортасында Президент, Парламент, Үкімет сияқты негізгі саяси институттардың бәрі қайта жаңғырып, жаңарады. Қорыта айтқанда, биылғы Жолдауда ел дамуына, демократияның даңғыл жолына түсуге қажетті бағдар айтылды. Жолдауда айтылған мәселелерді жүзеге асыруға Үкімет пен Парламент те, қоғам да атсалысуға тиіс.
Расул ЕСЕНОВ,
Қызылорда облыстық
мәслихатының депутаты
Қызылорда облыстық
мәслихатының депутаты
