Орысша жазады, қазақша айтады

Депутаттық қызметтің редак­тор­лық жұмыспен ұқсастығы өте көп. Екі қызметте де халық­пен тығыз байланыс орнатып, қоғам мү­шелерімен бірге түр­лі салада ел игілігі үшін жұ­мыс іс­тей­­­­сің. Осыны ескерген жер­гі­лікті ат­қа­рушы билік жаңа биз­­­­нес-идея­ларды іске асы­руға ар­­­нал­­­­­ған гранттар беру бойынша ау­дан­­­­дық комиссияға мүше болу­ға ұсы­­ныс айтып, келісім берген болатынбыз.

Аптаның сәрсенбісінде жаңа бизнес-идеяларды іске асыруға арналған гранттар беру бойынша аудандық комиссия отырысы өтті. Комиссия құра­мындағы аудандық мәслихаттың жалғыз депутаты ретінде кәсіпкерлікпен айналысуға ынталы аза­маттардың бизнес жоспарларын атқарушы билік және үкіметтік емес ұйым өкілдерімен бірге мұқият зерделеп, лайықты жобаларға қолдау білдіруге тырыстық. Грант алуға Тереңөзек кентінен бөлек Аманкелді, Бесарық, Шаған, Нағи Ілиясов ауылдарынан ең көп үміткер құжат тапсырыпты. Қалған ауыл­дардан шамамен 7-10 азаматтан келіп, өздерінің қолға алған жұмыстарын баяндап, сұрақтарға жауап берді. Сондықтан комиссия отырысы таңғы са­ғат 09.00-ден өте басталып, түскі үзіліссіз кеш қа­райғанша және келесі күні де жалғасты.

Айтайын дегенім, қазақ мектебінде оқыған, қа­зақы ортада өскен кейбір азаматтар, оның ішінде Тәуелсіздік жылдарында туған өрімдей жас­тар өздерінің бизнес жоспарларын орыс тілінде әзір­лепті. «Бизнес жоспарды қай тілде әзірледіңіз, сол тілде қорғаңыз» десек, «Орысша білмеймін, тү­сінбеймін, өз ойымды жеткізе алмаймын» дейді. Бұдан не ұғуға болады. Әрине, ол азаматтар бизнес жоспарды өзі жазбаған, біреуге ақы төлеп жазғызып алған болып тұрғаны ғой. Қалай ойласақ та, бұл ұят. Осындайда санамызға әншейінде мемлекеттік тілдің мәртебесіне мән бермейді деп Үкіметке сын айтып, мін тағуға бейім азаматтар неге өзгерісті өзінен бас­тамайды деген ой келеді.

Өз бизнес жобасын арқалап, кәсіптен нәсіп те­ремін деп Шаған ауылдық округінен Ольга Николаевна есімді азаматша келді. Ол ұлты орыс болса да жобасын қазақ тілінде әзірлеп, қазақша өте сауатты қорғап шықты. «Бизнес жоспарды неге орысша жазбадыңыз?» деп сұрасақ, «Болашақ тұты­нушыларымның бәрі қазақтар, өзім де қазақпын ғой» дейді жылы жымиып кәсіпкерлікке ынтасы зор Ольга. Еріксіз риза болып, біз кәсіпкерлікке ден қой­ған ауыл тұрғынына қолдау білдірдік.

Қорыта айтқанда, орысша жазып, қазақша айтып, өз білім деңгейі мен пайым-парасатын көрсетіп жүргендер мемлекеттік тілдің мерей-мәртебесін кө­теру барша азаматқа байланысты екенін ұғуы керек. Өз ана тілімізді өзіміз құрметтеп, төрге шығар­масақ, мемлекеттік тіл саясатының дамуына ешкім көмектесіп, қолдау білдірмейтіні анық. Бұл жаңа бизнес-идеяларды іске асыруға арналған грантты иеленуге үміткерлерге ой салады деп сенеміз.

Ақтөре ИБРАГИМҰЛЫ