Жедел жәрдем: заңдық тұрғыдан мамандар құқығы қорғалады
Жақында Астана қаласында орын алған оқыс оқиға жұртшылықты елең еткізді. Тұрғын үй кешенінің қасбетіндегі кірпіш қаптамасы мен кондиционер қондырғысының бір бөлігі опырылып құлап, салдарынан бес адам жарақат алып, жедел түрде ауруханаға жеткізілген еді. Оқиға орнына көмек көрсетуге келген фельдшер Ұлдана Мырзуан да ауыр жарақат алып, дәрігерлердің барлық әрекетіне қарамастан, ауруханада қайтыс болды.23 жастағы жас маманның ерлігі ел есінде қалды. Мемлекет басшысы Қасым-Жомарт Тоқаев марқұмның туыстарына оның жанқиярлығы мен батылдығын жоғары бағалап, «Ерлігі үшін» медалін табыстады. Бұл жағдай – соңғы уақытта медицина қызметкерлерінің қызмет бабында зардап шегу фактілерінің жиілеп кеткенін айқын көрсетті. Бірі зілзаладан қаза тапса, енді бірі науқастар тарапынан болатын шабуылдарға ұшырап жатады.
Осы мәселелерді ескере отырып, осы аптада ҚР Парламенті Мәжілісінің жалпы отырысында Қылмыстық кодекс пен Қылмыстық-процестік кодекске өзгерістер енгізу туралы заң жобасы бірінші оқылымда мақұлданды. Жоба медицина қызметкері мен жедел жәрдем жүргізушісінің құқығын күшейту мақсатында Қылмыстық кодекске жаңа 380-3-бапты енгізуді көздейді. Мәжіліс депутаттары аталған бастаманы қолдап, заң жобасын Сенатқа жолдады. Бұл – хирургтар мен жедел жәрдем бригадалары жоғары қауіп-қатер жағдайында жұмыс істейтінін ескеріп, олардың құқығын күшейтуге бағытталған маңызды қадам.
Күндіз-түні адам өмірі үшін күресіп жүрген жедел жәрдем қызметкерлері тұрғындар тарапынан түрлі қақтығыстарға жиі тап болады. Мәселен, өткен жылы бір бригадаға пышақпен шабуыл жасау фактісі тіркелсе, Алматыда шақыртуға барған жедел жәрдем мамандарын екі мас азамат пәтерден шығармай, ұрып-соққан. Соңғы үш жылда жедел жәрдем бригадаларына жасалған бұзақылық, қарақшылық және өзге де қылмыс саны 66 оқиғаға жеткен.
Осындай келеңсіз жағдайлардан кейін елімізде жедел жәрдем дәрігерлері мен жүргізушілерін «бейнежетондармен» қамтамасыз ету жұмыстары жүргізіліп жатыр. Бұл құрылғылар шақырту кезінде болған оқиғаны жазып, агрессия жағдайында жауапкершілікті арттыруға бағытталған.
– Бүгінде «Жедел жәрдем» қызметіне жүгінетін тұрғындар саны өте көп. Әсіресе, түнгі уақытта бригадалардың әртүрлі оқыс жағдайға тап болуы ықтимал. Сондықтан сала мамандарын бейнежетонмен қамтамасыз ету бастамасын толық қолдаймыз. Әрбір маманның қауіпсіздігі бірінші орында болуы тиіс. Өйткені олардың да артында отбасы, аман-есен оралуын күтетін жақындары бар. Астанада қайғылы оқиға салдарынан қаза тапқан әріптесіміз Ұлдана Мырзуанның отбасына қайғырып көңіл айтамыз. Ұжымда оны бір минут үнсіздікпен еске алып, ерлігін көпшілікке дәріптедік, – дейді облыстық «Жедел медициналық стансасының» Сырдария аудандық бөлімшесінің меңгерушісі Әлия Іскендірова.
Балтабай ОРДАБЕКОВ
