Өзінің кәсібін 2018 жылы нәзік жанды қыз-келіншектердің шашын қысқартудан бастаған. Алғашқы ұстазы Қызылорда қаласының кәсіпкері Динара Алмұсаева болған. Сол шеберден алған білімін уақыт өте келе жетілдіріп, қосымша ерлер шаштаразын үйренген. 2020 жылдан бері мемлекеттік бағдарламаға қатысып, бағын сынап көрген. Бірнеше жыл қатарынан жолы болмаса да, сағын сындырмай сұлулық салонын ашуға бел буады.

– Бұл салада жүргеніме 7 жыл болыпты. Алғашында тек шаш қысқартумен ғана айналысқан болатынмын. Кейін бірте-бірте ерлердің, балалардың да шашын қысқартуды үйреніп алдым. Бір сарында еңбек ету менің табиғатыма жат нәрсе. Арада көп уақыт өтпей бет әрлеу мен тырнақ бояу қызметін қостым. Шашты қысқартудан бөлек шашқа байланысты барлық қызметтерді жасаймын. Бір жағынан сұлулық салонын ашуға қатты қызықтым. Ол арманыма да жеттім. 2021 жылы қасыма бет әрлеу жұмысын жасайтын қыздарды алдым. 3 адам болып ауылдың қыз-келіншектеріне қызмет көрсетіп келе жатқанымызға 4 жылдай болды, – дейді жас кәсіпкер.

«Нұр-Керім» атты сұлулық сало­нының жаңа серпіні 2024 жылы мемлекеттік бағдарламаға қатыс­қан­нан бастау алған. Қайтарымсыз грант бағдарламасына қатысып, 1 276 000 теңгеге қол жеткізген. Кәсіпкерлікті қолдау мақсатында жүзеге асқан бұл бағдарлама жас­тар үшін тиімді әрі пайдалы. Жеңіп алған қаржыға сұлулық салонына керекті құрал-жабдықтар алған. Атап айтқанда, арнайы затты қоюға арналған сөре мен тұтынушы отыратын орын­дық, қажетті техникалық құрыл­ғы мен шаш жуатын орын­ға арналған жабдық та ойластырып алынған.

Ал енді бір қызығы бұл мемле­кет­тік бағдарламаға жолдасы Нұржан Жүнүсов те қатысқан. Биыл 1 572 800 теңге қайтарымсыз грант ал­ған. Оған 5 бас тай алып, бордақы бағытында ісін жүргізіп отыр. Сонымен қатар жем-шөбін де алып, кәсібін дөңгелетуде.

– Арқасүйер жолдасым да мем­лекеттік қолдауға қатысты. Шағын кәсіпкерлігімізді осы бағдарлама арқылы жүзеге асырып отырмыз. Қазіргі таңда ол мал шаруашылығы бағытында, мен сұлулық салонының шағын кәсіпкерлігінде қызметімізді жүргізудеміз. Алдағы уақытта «Нұр-Керім» атты шағын кәсібімді үлкейтіп, жаныма тағы да түрлі саланың шеберлерін жинап, бірлесіп жұмыс істеуге ниеттімін. Сонымен қатар «Ауыл аманаты» бағдарламасына қатысу ойда бар, – дейді Айгерім Отанқызы.

Үйден басталған қызығушылық, қазіргі таңда сұлулық салонының шеберлері жиналған кәсіпкерлікке айналып отыр. Бұл 7 жылдан бері үзбей еңбек етіп, табандылықпен жеткен жетістік. Қазіргі таңда бала­лардың, ер-азаматтардың шашын қысқарту жұмыстарын тастамаған. Оған қоса тырнақ бояу қызметін де жасайды. Қыз-келіншектердің шаш бояу, қию сынды мәселесін реттеп береді. Айгерімнің шеберлігінен болса керек, көрші ауылдардан да келіп, шаш қысқартатындар қатары көбейген. Сапалы қызмет көрсетілсе, тұтынушы міндетті түрде қайта келетіні анық. Алдағы уақытта кәсібі үлкейіп, жандана беруі осы бастаманың айқын көрінісі.