Отбасылық кәсіптің жемісі

Қай кезде де талпыныс табысқа жеткізетіні мәлім. Нарықтық заманда кәсіптің бірнеше түрімен айналысу керек-ақ. Көп­­шілік сұранысына сай бизнесті жан-жақты жандандыруға мүмкіндік мол. Мәселен, шағын кәсіпкерлікті қолға алған Мирамкүл Әкімжанова «Жеңіл бу» қоғамдық моншасын ашып, бизнес бастаған. Ашылғаны­на көп болмаса да, қоғамдық моншаға келу­шілер қатары көп.

Тереңөзек кентінде орналасқан қоғамдық монша заманауи үлгіде салынған. Бүгінде қо­ғамдық монша нәзік жандыларға қызмет көрсетеді. Сонымен бірге отбасылық жұптар да тұрақты тұтынушысы екенін айта кеткен жөн. Жергілікті тұрғындардың көңілінен шық­қан моншаның құрылысы осыдан екі жыл бұрын басталған. Бір мезетте 9 адамды қабыл­дайтын кәсіпкерлік нысанды тұрғызуға 6 миллион теңге қаражат жұмсалған.

– Біз Ғани Мұратбаев көшесінде бірнеше жыл­дан бері тұрамыз. Отбасымызбен жеке кә­­сі­бімізді ашуды көптен бері жоспарлаған едік. Қазіргі уақытта қоғамдық моншаға халық арасында қызығушылық басым. Осылайша, ота­ғасы Ғалымжан мен ұлым Марат екеуі мон­ша­ның іргетасын қалады. Барлық құрылыс жұмы­­сына аса мән бердік. Заманауи үлгідегі ғи­маратты тұрғызуға барлық күш-жігерімізді жұмсаған болатынбыз. Қоғамдық моншада әрбір адам шомылуға арналған арнайы орын белгіленген. Сонымен бірге тұтынушыға жайлы орта қалыптастыру мақсатында бөлек-бө­лек сөре қойылған. Жоғары температудағы ыстық булы бөлмеде көпшілік емін-еркін оты­­­ра алады. Ал кезек күткен немесе шомылып шыққан кісілер үшін демалыс орны бар. Қоғам­дық монша үздіксіз көгілдір отынмен жылытылады, – дейді Мирамкүл Әкімжанова.

Адамның түсінігінде «Тазалық – денсаулық кепілі» деген ұғым қалыптасқан. Жаңа жыл мерекесінде пайдалануға берілген қоғамдық монша адамдардың жеке гигиенасын сақта­уына айрықша қызмет етеді. Кәсіп иелері са­ни­тарлық талаптың орындалуына аса көңіл бөледі. Жаз мезгілінде сенбі-жексенбі күндері жұмыс жасайтын қоғамдық моншаға аптаның сейсен­бісінде санитарлық тазалық жүргізіледі. Қоғам­дық моншаға шомылу үшін әрбір адам 700 теңгесін жұмсайды.

Өз кезегінде кент тұрғыны Ғ.Мырхиева қо­ғамдық монша жөнінде өз пікірін білдірді.

– Тереңөзек кентінде жергілікті тұрғындар­ға жоғары деңгейде қызмет көрсететін бірнеше қоғамдық монша бар екенін жақсы білеміз. Оның ішінде, «Жеңіл бу» қоғамдық моншасы кө­ңілімізден шықты. Тек азаматшаларға қыз­мет ететін моншаның тазалығына ерекше мән беріледі. Ғалымжан аға мен Мирамкүл апайдың отбасы жақсы іске бастамашы болды. Тұтынушылар үшін бар жағдайды жасаған кәсіп иелеріне дән ризамыз, – дейді кент тұр­ғыны.

Кәсіпкерлік саласы экономиканың дамуына серпін беретіні рас. Осылайша, Бакировтар отбасы алдағы уақытта аудан экономикасының өрістеуіне өз үлестерін қоса бермек. Берекелі кәсіп иелерінің жұмысына табыс тілейміз.

Балтабай ОРДАБЕКОВ