Мұрат Бақтиярұлы: Демократиялық үдерісті үдетеді

Қазақстан Республикасы Парламенті Сена­тының депутаты, «AMANAT» партиясының жанынан құрылған республикалық штаб мүшесі Мұрат Бақтиярұлы Іңкәрдария ауылының тұр­ғындарымен кездесу өткізді. Сенатормен бірге аудандық мәслихат хатшысы Е.Әжікенов, об­лыстық мәслихат депутаты Р.Есенов, пар­тияның аудандық филиалы жанындағы штаб төрағасы Е.Жақып жалпыұлттық референдум өткізу іс-шараларына дейінгі халықты ақ­параттандыру жұмыстарына қатысты.

Сенат депутаты Мұрат Бақтиярұлы халықпен кездесу барысында Мемлекет басшысы Қасым-Жомарт Кемелұлы Тоқаевтың бас­та­масымен еліміздің Конституциясына енгізілетін өзгерістер мен то­лық­тыруларға кеңінен тоқталды.

– Ата заңның 33 бабына өзгерістер енгізілетін болады. Басты мақ­сат – саяси бәсекелестік үшін жағдай жасау, жеке тұлғаның емес халық мүддесіне бағыттау, халықтың елді басқаруына жағдай жасау, халықтың конституциялық құқықтарын қорғау тетіктерін күшейту. Мемлекет басшысы біз Қазақстан азаматтары ретінде қатыса алатындай өз ұсынысын білдірді. Біз қол жеткізуге тиіс болашақтың бейнесін ұсынды және билік институттары арасында жаңа конс­ти­туциялық тепе-теңдікті қалыптастыру және басқару нысандарын өзгерту міндетін алға қойды. Менің ойымша, бұл өте маңызды және өзекті, – деді сенатор.

Жалпыұлттық референдум өткізу бастамасын қолдау жөнінде ақпараттық-түсіндіру жұмыстары бойынша ҚР Сенатының депутаты М.Бақтиярұлы Н.Ілиясов ауылындағы «Мағжан және К» ЖШС қыз­меткерлерімен де кездесті.

Президент ұсынған Жаңа Қазақстан идеясында қоғамды одан әрі демократияландыруға бағытталған бірқатар маңызды бастамалар қамтылады. Бұл жаңашылдық елімізде жаңа саяси мәдениеттің қалыптасуына, қоғамдағы өзара жауапкершілік пен сенімнің артуына жол ашады.

Сенат депутаты еңбеккерлерге референдумды қолдаудағы ақпа­рат­тық-насихаттық жұмыстармен таныстырды.

– Мемлекетті басқарудың жаңа үлгісі пайда болып, елдегі сая­­си ахуалға жаңа леп болатын конституциялық референдум жалпы­халықтық деңгейде алғаш өткізілмек. Бұл Мемлекет басшысы айтқан «Халық үніне құлақ асатын мемлекет» тұжырымдамасының жүзеге асыуының бірден-бір дәлелі. Жаңартылған Заң аясында Президенттің барлық саяси күштер мен партиялардың дербестігін бекітуі – елдегі саяси партиялардың тең дәрежеде бәсекеге түсіп, демократиялық үдерісті үдете түсетіні сөзсіз, – деді ҚР Парламенті Сенатының депутаты Мұрат Бақтиярұлы.

Шаруашылықтағы кездесуге қоғам қайраткері, журналист, дип­ло­­мат Е.Уәйіс, «Қазақстанның Еңбек Ері» А.Ералиев, аудандық мәс­лихат депутаты Д.Ералиев қатысты.

«ТТ» ақпарат