Жұмыстардың сапалы орындалуы тұрақты бақылауда

Әні-міне дегенше жыл ортасына да жақындап қалдық. Ауданды көркейтуге қатысты жұмыстар жоспарланып, соларды жүзеге асыру жұмыстары жүргізілуде. Алғашқы жартыжылдық қорытындысымен тиісті нәтижелер де байқала бастайды. Осы тұста халық тұрмысының жақсаруына инфрақұрылымдық жұмыстарды іске асырудың маңызы зор. Өйткені, жол жөнделіп, көше жарықтандырылып, баспана жайы да шешеліп жатса, әлеуметтің әл-ауқаты арта түсетіні анық. Осы орайда ауданда жол салу, көшелердің жөнделуі, үй кезектілігі және газдандыру жұмыстарына аудандық тұрғын үй-коммуналдық шаруашылық, жолаушылар көлігі және автомобиль жолдары бөлімі жауапты. Бүгін бөлім басшысы Ж.Файзуллаевпен сұхбаттасып, атқарылып жатқан жұмыстарды сұрап білдік.

– Жеңісбек Исламұлы, алдымен аудандық тұрғын-үй ком­муналдық шаруашылық, жо­лау­шылар көлігі және автомобиль жолдары бөлімінің тіз­гінін ұс­тап, жаңа қызметке келуіңізбен құттықтаймыз! Жұмысыңызға сәт­­тілік тілейміз! Енді алғашқы са­уалымызды қойсақ. Көпшілік ел­ді мекендердегі көше жолда­рын жөндеуге байланысты ұсы­ныстарын айтып жатады. Со­ған орай биылғы жол жөндеуге қа­тысты жоспарға тоқталып өт­се­ңіз?

– Тілектестіктеріңізге рахмет! Сыр­дария ауданының дамуы жолында еңбек ететін боламыз! Бұл жолда аудандық редакция ұжымымын бір­лесе жұмыс жасап, жетістіктерімізді ақпараттандырады деген сенімдемін!

Енді негізгі жұмысымыздың бір ба­ғыты жол салуға қатысты жоспарға тоқталсам. Жалпы аудан бойынша автомобиль жолдарының жалпы ұзын­дығы 499 шақырымды құрайды. Оның ішінде республикалық маңызы бар жол 44 шақырымды, облыстық маңызы бар жол 115,5 шақырымды және аудандық маңызы бар жол 105,7 шақырымды құрайды. Ал елді мекендердің ішкі көше жолдарының жалпы ұзындығы – 227,4 шақырым. Осы жерде атап өту керек, биыл жергілікті маңызы бар автомобиль жолдарының жақсы және қанағаттанарлық жағдайы 98 пайызды қамтиды. Сонымен бірге ауылдардағы ішкі көше жолдарының 96 пайызы жақсы және қанағаттанарлық жағ­дайды көрсетіп отыр. Осыған қарап аудандағы автомобиль жолдарының өзге өңірлерге қарағанда әлдеқайда жақсы екенін аңғаруға болады. Десе де жол сапасы жыл өткен сайын нашарлай береді. Сондықтан бөлім тарапынан сапасы төмендеген жолдарды жөндеуден өткізуге жұмыстар жүргізілуде. Бұл тұста тұрғындар тарапынан түскен өтініштер назардан тыс қалмайды. Жалпы 2022 жылға аудан бойынша автомобиль жолдарын жөндеуге барлық бюджет көздерінен 1 млрд 163,7 млн теңге қаржы бөлінді. Сол бойынша елді мекендердегі жолдарды қайта жаңғырту және орташа жөндеу жұмыстары атқарылады. Бүгінде бірқатар елді мекенде орташа жөндеу жұмыстары жүргізілуде.

– Өткен жылы ауданда жол жөндеуге байланысты қарқынды жұмыстар толастаған жоқ. Биыл да көптеген көшелер жөндеуден өтетін секілді. «Бірқатар елді мекенде» деп атадыңыз. Тарқатып ай­тып берсеңіз?

– Биыл «Қызылорда-Қоғалыкөл-Шіркейлі» автомобиль жолын, Бес­­арық ауылындағы 6 көше, ұзын­дығы 8,4 шақырым, Ақжарма елді ме­кенінде 5 көше, ұзындығы 6,2 шақырым, Қоғалыкөл ауылында 2 көше, ұзындығы 1,1 шақырым жол ор­таша жөнделеді. Ал Н.Ілиясов елді мекеніндегі 11 көше, жалпы ұзындығы 3,6 шақырым, қайта жаң­ғыртылатын болады. Яғни көше жолдары жөнделіп, аяқ су жүретін лоток, жарықтандыру, жаяу жүргіншілер жо­лы салынып, ауыл халқына жақсы жағдай жасалады. Бүгінде Бесарық және Ақжарма ауылдарында орташа жөндеу жұмыстары жүргізіліп жатыр. Бөлім тарапынан олардың сапалы салынуы тұрақты бақылауда. Оған қоса, «Қызылорда-Қоғалыкөл-Шіркейлі» автомобиль жолының 11 шақырымына жөндеу жүргізу жоспарланса, бүгінгі таңда 6 шақырымының құрылыс жұ­мыстары жүруде. Ал қалған 5 ша­қырым жол 2023 жылы жөнделеді. Алдағы уақытта Қоғалыкөл мен Н.Ілия­сов ауылдарында жол жөндеу жұ­мыстары бастау алады. Одан бө­лек аудан орталығы – Тереңөзек кен­тіндегі Б.Момышұлы көшесін орташа жөндеуге 38 млн теңге қаржы қа­ралды. Аталған көшені жөндеу де осы жылы жүзеге асырылады деп жоспарлап отырмыз.

– Ауданға қарасты басқа да елді мекендердің көше жолдарын жөн­­деуге қатысты қандай жұ­­мыс­­­­тар атқарылуда?

– Біз барлық елді мекен кө­ше­лерінің сапасын қадағалап отырамыз. Бұл жерде ауыл халқының ұсы­ныстарын да ескереміз. Биылға Те­реңөзек кенті, Айдарлы, Аманкелді, Шір­кейлі, Шаған, А.Тоқмағамбетов, Қо­ғалыкөл ауылдарының ішкі жолда­рын жөндеуге «Ауыл – ел бесігі» бағдарламасы бойынша тиісті қара­жат бөлуге облыстық жолаушылар көлігі және автомобиль жолдары бас­қармасына бюджеттік өтінім жолданды. Сонымен қатар облыстық бюджеттен қаржыландырылатын Бесарық елді мекеніндегі 6 көшенің автомобиль жолынан үнемделетін 58,2 млн теңге қаржыны басқа да жобаларды іске асы­ру үшін кері бағыттау сұралады.

– Халықты баспанамен қамту – күн тәртібінен түспейтін өзекті мәселенің бірі. Бұл жұмыстарға да бөлім тарапынан арнайы мем­лекеттік қызмет көр­сеті­леді. Бү­гінгі таңда тұрғын үй кезек­тілі­гінде қанша адам бар?

– Бізде аудан халқына «Мемлекет­тік тұрғын үй қорынан тұрғын үйге мұқтаж азаматтардың есебін жүргізу және мемлекеттік тұрғын үй қорынан тұрғын үй беру» мемлекеттік қызметі көрсетіледі. Соның негізінде қазіргі таңда аудан бойынша барлығы 559 азамат тұрғын үй кезектілігіне алын­ған. Олардың ішінде «Халықтың әлеу­меттік жағынан осал топтары» санаты бойынша 221, «Көпбалалы отбасылар» санаты бойынша 152, «Жетім, ата-анасының қамқорлығынсыз қал­ған балалар» санаты бойынша 41, «Мемлекеттік қызметшілер, бюджеттік ұйым қызметкерлері» санаты бойынша 100 және «Жалғыз тұрғын үйі ҚР заңнамасында белгіленген тәртіппен апатты жағдайда деп танылған аза­маттар» санаты бойынша 45 сыр­дариялық үй алуға өтініш берген. Ауданда тұрғын үй құрылыстары жүр­гізілгенде аталған санаттар бойынша тиісті кезектілікпен тұрғын үй беріледі.

Айта кету керек, аудан орталығын абаттандыру бойынша биыл бір жо­ба қаржыландырылып отыр. Те­рең­өзек кентіндегі А.Әлиакбаров кө­ше­сіндегі тұрғын үйлер аулаларын абат­тандыруға 111 млн теңге қаржы қа­ралып, бұл жердегі 12 тұрғын үйдің ішкі абаттандыру жұмыстарын жақын арада бастау жоспарда бар. Мұның тұрғындар үшін маңызы зор.

– Бүгінде тереңөзектік тұрғын­дар көгілдір отынның игілігін кө­ріп отыр. Өткен жылы берілген табиғи газдың халыққа септігі тиді. Осы тұста жобаға енбей қал­ған жаңа аймақ және жаңадан салынған тұрғын үйлер­ге газ құ­бырларын жеткізу жұмыс­тары қол­ға алынған еді. Соның нәти­же­сін айтып өтсеңіз?

– Әрине, табиғи газдың тұрғын­дар­ға қолайлы болғаны анық. Бүгінде Тереңөзек кенті бойынша 2162 үйдің 1476 жеке тұрғын үй, 40 көпқабатты тұрғын үй ішіндегі 185 пәтер, 13 әлеуметтік нысан, 48 кәсіпкерлік нысан мен 21 мекеме көгілдір отынға қосылып, барлығы 75 пайызды құрап отыр. Ал жобаға енбей қалған тұрғын үйлерге қатысты «Жұмыспен қамту жол картасы» аясында «Тереңөзек кентінде орамішілік газ тарату (ақ дақтар) желілерінің құрылысы» жо­ба­сына республикалық бюджеттен 2021-2022 жылдарға 143,8 млн тең­ге қаражат бөлінді. Бұл жұмыс­тар осы жылы аяқталып, жыл қоры­тын­дысымен кент тұрғындары толы­ғымен табиғи газбен қамтылады.

Аудан орталығы газбен қамтылған соң елді мекендерді газдандыруға жұ­мыс жасалуда. Қазіргі таңда ау­данға қарасты Қалжан ахун, С.Сей­фуллин, А.Тоқмағамбетов және Ша­ған ауылдарының жобалық-сме­талық құжаттары әзірленіп, мемлекеттік са­рап­тамадан өткізілуде. Соның нәти­жесімен қажетті 2,8 млрд теңге қаржы бөлінсе, аталған ауылдарға да табиғи газ жеткізіледі. Осы жұмыстарды ке­зең-кезеңімен сапалы жүзеге асыруды қамтамасыз ететін боламыз.

– Соңғы жылдары тұрғын­дар тарапынан электрмен жаб­дық­тауға қатысты мәселелер көп кө­те­рілуде. Электр желі­ле­рінің то­зуы салдарынан желді, жаң­быр­лы күндері жарықтың бол­май қалу сәттері де жиілеп кетті. Осы ба­ғыттағы атқарылып жат­қан жұ­мыстарды да тарқатып өт­се­ңіз?

– Иә, электрмен жабдықтауға қа­тысты тұрғындардың талап-тілек­тері жеткілікті. Осыны ескеріп бірінші кезекте әуе желісін жаңартуды қажет ететін Айдарлы, Жетікөл, Аманкелді, Қоғалыкөл ауылдарына жобалық-сметалық құжаттар әзірленді. Құ­жат­­тарды сараптамадан өткізуге ау­дандық бюджеттен 22,1 млн теңге қаржы бөлінді. Осыған орай биыл аталған ауылдардың электр желілері толығымен жаңартылып, мәселе туындамайтын болады. Сонымен бірге ау­дандағы үлкен ауыл – Шағанда да бұл мәселе кезек күттірмейді. Сондықтан «Шаған елді мекенінің электр желілерін дамыту» жобасын әзірлеу жұмыстары жүргізілуде. Бұл жобаға қолдау көрсетілсе, Шаған ауылының да әуе желілері то­лығымен жа­ңаратын болады.

Жалпы аудан әкімінің қолдауымен салаға қатысты барлық жұмыстар жоспарлы ұйымдас­тырылып, олар­дың сапалы орындалуы тұрақты ба­қылауда болады.

– Маңызды сұхбат бергеніңіз үшін рахмет!

Сұхбаттасқан
Ердос БЕРКІНБАЕВ