Кітап оқып жеңімпаз болды

Аудан әкімінің қолдауымен өткізіліп жатқан «Кітап оқы да, тұлға бол» кітап оқушылар сайысының алғашқы кезеңі Қалжан ахун ауылында да өз мәресіне жетті.

№126 орта мектептің оқушылары кітап десе ішкен асын жерге қоятын талапты балалар екен. Қатысушылардың ерекше ықыласы мен «сен тұр, мен атайын» деген жастық жалындары бізді шын қуантты. Көп уақытын әлеуметтік желіде өткізіп, ұялы телефонға жиі телміретін жасөспірімдерді шексіз қазына кітап оқуға баулыған іс шара жоғарғы деңгейде ұйым­дастырылды.

Жобаға қатысушыларға қойылған талап ортақ болды. Яғни оқушылар «Жабайы ал­ма» мен «Ұшқан ұяны» оқып, түсініп, ішкі сезім­дерін эссе қылып қағаз бетіне түсірді. Сонымен қоса қазылар алқасының тарапынан қойылған сұрақтарға ұтымды әрі мүдірмей жауап беру жағы да ескерілді.

Сайыс болған соң жүйріктен жүйрік озары хақ. Нәтижесінде бағы мен бабы қатар жан­ған оқушылар марапатқа, жүлдеге ие болды. Екі ай бойғы еңбектің нәтижесінде «Жаба­йы алма» повесі бойынша 6 сынып оқушысы Ду­ман Әнеш бас жүлдені жеңіп алды. 5 сынып оқушысы Аяна Базарбай І орынды иелен­се, ІІ орын 6 сынып оқушысы Бағжан Шай­мұ­ратқызына бұйырды. Жүлделі ІІІ орынды 7 сы­нып оқушысы Сәбинұр Бақытбекқызы ен­шіледі.

Ал «Ұшқан ұя» повесін оқу бойынша бас жүлдені Асылжан Қоныс иеленсе, І орынды Нұршат Кенжебекова, ІІ орынды Біржан Сейтасанов жеңіп алды. Және ІІІ орынға Шәкәрім Камалиев тұрақтады.

Қалжан ахун ауылы округінің әкімі Ғалым­жан Әкбаров, мектеп директоры Мұрат Төлеген­ұлы қадірлі қонақтарға алғыстарын білдіріп, жас жеткіншектерді кітаппен достасуға, кітап оқуға шақырды. Айта кетейік, игілікті іс-шараға «Нұрбек» шаруа қожалығының төрағасы Алдан­берген Құлбаев демеушілік жасап, жеңім­паздарға бағалы сыйлықтар ұсынды.

Аружан МҰХАНБЕТҚАЛИ