Заманының заңғар тұлғасы

Ауданнан шалғайда ораналасқан Іңкәрдария ауылында «Ахмет Байтұр­сын­ұлы – қазақ халқының рухани көсемі» тақырыбында конференция өтті. Танымдық іс-шара ауылдық кі­тапхананың ұйымдастыруымен жү­зе­ге асты.

Іс-шара барысында ұлт ұстазы Ахмет Байтұр­сынұлының туғанына 150 жыл толуына орай жи­налған көпшілікке құнды деректер таныстырылды. Кітапхана оқырманы Айгерім Сүйінбаева және мектеп оқушылары қоғам қайраткерінің шығармаларына, аудармаларына, публицистикалық еңбектеріне тоқ­талды. Сонымен бірге оқырмандар «Дәуірдің жарық жұлдызы» ат­ты кітап көрмесін тамашалады.

– Ұлт ұстазы Ахмет Байтұрсынұлы қазақ әліпбинің негізін қалады. Әрбір қазақ баласын оқытуға, білім алуына көңіл бөлді. Саяси реформалардың жарыққа шығуына себепкер болып, ұлтты сақтап қалуға күш салды. Міне, осындай дара есімді кітапхана ұжымы кеңінен дәріптеуде. Заманының заңғар тұлғасы Ахмет Байтұрсынұлының еңбектерін өскелең ұрпақ білуі тиіс. Оның шығармалары жастарды жарқын болашаққа бастайды, – дейді А.Сүйінбаева.

Балтабай ОРДАБЕКОВ