2022 жылды Мемлекет басшысы «Балалар жылы» деп жариялап, балғындарға баса назар аударуды тапсырды. Осы ретте аудандық га­зет редакциясы аудан көлеміндегі бөбекжай мен балабақшалар туралы ақпаратты оқырман қауым­ға ұсынуды бастап кетті. Мақсат – тәрбиені тал бесіктен беретін орталық жұмысына қолдау көрсетіп, өнерлі балғындарды халыққа таныту. Бүгінгі сөз Нағи Ілиясов ауылында орналасқан «Балдырған» бөбекжай балабақшасы туралы бол­мақ.

«Бақыт деген – сенің бала күндерің...» Ақиық ақын Мұқағали Мақатаевтың жырына арқау бол­ған бақытты балалар бойында еселеп жүрген аталған балабақша 2005 жылдан бастап жұмыс жасап келеді. Бақытты балалық шақ... Ата-анасы қасында, дені сау әрбір бала бақытты. Ойында жаман мен жақсы деген алалау жоқ, арам пиғылы жоқ періште көңіл сәбилерді бақыт дейтін күрделі ұғыммен байланыстыратынымыз да содан шығар. Осыдан он жеті жыл бұрын тәрбиеленушілеріне айқара есік ашқан орталық әр жыл сайын жөн­деуден өтіп, ел болашақтарына тиімді жағдай жа­сауға барын салып келеді.

Балабақшадағы тәрбие – өмірлік тәрбиенің бас­тамасы. Білім беру міндеттерінің бастысы – ба­лаларды шынайы әлем жағдайындағы өмірге дайындау. Осы бағытта «Балдырған» бөбекжай балабақшасында білікті мамандар қызмет етуде. Бүгінгі күні балабақшада төрт топ бар, онда барлығы 90 бала тәрбиеленуде. Оның ішінде кіші «Балапан» және «Бүлдіршін» топтарында 20 баладан болса, ортаңғы «Балақай» тобында 25 және ересек «Ботақан» тобында 25 бала білікті тәрбиешілерден тәлім алуда. Аталған орталық бөбекжай балабақша болғандықтан, мұнда кіші және орта, ересек балалар арнайы топтас­тырыл­ған.

«Балдырған» бөбекжай балабақшасын 2016 жылдан бастап Мирамкүл Мыңжасарова басқарып келеді. Білікті басшы әр баланы ел болашағы деп білетінін айтады.

– Балғындардың болашаққа деген алғашқы қадамдары, негізі балабақша қабырғасында қа­ла­нады. Жантану іліміне сүйенсек, адамның ойы, мінез-құлқы, әдеттерінің басым бөлігі оның кіш­кентай кезінде қалыптасады екен. Тіпті бұл көр­сеткіш 80 пайызды құрайды. Осы ретте, бала өміріндегі алғашқы орта – балабақша. Біз ел болашағын дайындап жатырмыз. Мұны тәрбие­шілер мен қызметкерлерге әрдайым ескертіп оты­­рамын. Еліміздің жарқын болашағы – бүгінгі балалардың қолында. Балабақша ұжымы ауы­лымыздағы өткен сайыстарға қатысып, жүлделі орындар алуда. Алдағы уақытта да тәрбиелі, жан-жақты балалардың қанатын қатайту жолында күш-жігерімізді аямаймыз, – дейді Ми­рамкүл Әнуарбекқызы.

Бүгінгі таңда балабақшада барлығы 31 қыз­меткер жұмыспен қамтылған болса, олардың 15-і педагог, қалғаны – техникалық қызметкерлер. Балаларды ән айтып, би билеуге, сурет салып, әріп үйретуде аянбай тер төгіп жүрген ұстаздардың барлығы жоғары білімді. Оның ішінде қазіргі білім беру жүйесіне сәйкес, 3 тәр­биеші педагог-модератор санатына өтсе, 1 тәр­биеші педагог-сарапшы санатында. Бұл да өз кезегінде балабақша ұстаздарының біліктілігінен хабар береді. Яғни балабақша ұстаздары өз бі­ліктіліктерін ұдайы жетілдіріп отырады. Сө­зі­мізге дәлелді Педагогикалық шеберлік орталы­ғының ұйымдастыруымен өткен «Мектепке де­йінгі ұйым педагогтерінің біліктілігін арттыру білім беру бағдарламасы» бойынша 235 акаде­миялық сағат оқу курсын 3 тәрбиеші оқып, арнайы сертификатын алғанынан аңғара аламыз. Сондай-ақ Педагогикалық шеберлік ор­та­лығының «Инклюзивті білім беру жүйесінде психологиялық-педагогикалық қолдау көрсету» курсын балабақша психологы, логопед маманы және тәрбиешілер оқып, біліктілігін арттырған. Балабақша ұстаздарының ҚР Білім және ғылым министрлігі «Өрлеу» біліктілік арттыру ұлттық орталығының арнайы курстарын оқып, арнайы сертификаттар алғанын да айта кеткеніміз жөн. Білім алуға, білімді жетілдіруге ешқашан кеш емес. «Бүгінгі білім ертең қызмет етпеуі мүмкін. Сондықтан ұдайы даму үстінде болуымыз қажет» деп білетін білікті мамандар әркез тәжірибе алмасып, біліктіліктерін арттырып отырады.

Ұстаз мерейі шәкіртінің қандай да бір же­тістігімен өлшенеді. Тәрбиешілердің еңбегі еле­ніп, балғындар түрлі сайыстарда жетістіктерге жетіп жүр. Атап айтар болсақ, 2021 жылы «Ата Заңым – айбарым» аудандық мектепке дейінгі мекемелер арасында өткен ән айту сайысынан Раяна Жалғасбай есімді бүлдіршін жүлделі 3-орынды жеңіп алып, ата-анасы мен ұстаздарының үмітін ақтаған.

Балабақша түрлі іс-шараларда белсенділік та­ныт­қанымен қоса, әртүрлі жобаларды да ұйым­дастырып отырады. Солардың бірі – «Елімнің бақытын тербеткен Тәуелсіздік» тақырыбындағы аймақтық семинар. Семинарда әр топ өзінің күн­делікті жоспары бойынша ашық оқу қызметін көр­сетіп, тәжірибе алмасқан. Сондай-ақ наурыз мерекесіне орай мекемелер арасында өткен театр­ландырылған қойылым қою сайысынан ауыз­біршіліктің жарқын үлгісін көрсеткен ұжым бесікке салу рәсімін көрсетіп, бірінші орынды же­ңіп алған.

Жоғарыда атап өткеніміздей, балабақшада балаларға жайлы жағдай жасалған. Қолы ашық ел ағалары да орталыққа ұдайы көңіл бөліп келеді. 2014 жылы жергілікті басшылық пен «Абзал және К» ЖШС қолдауымен бөбекжай балабақша күрделі жөндеуден өткенін айта кеткеніміз жөн. Нәтижесінде орталық балаларға қажетті қосымша құралдармен толықтырылып, заманауи талапқа сай жаб­дықталған. Ал 2021 жылы «Мағжан жә­не К» ЖШС демеушілік жасап, балабақшаға 90 орын­­дық, 25 үстел, 4 топқа жылжымалы тақта, 40 балаға арнайы сөре, 2 теледидар алып берген. Бұл ретте ел ағаларына балабақша ұжымы мен ата-аналар шексіз ризашылығын білдіріп, ал­ғыстарын айтады.

Балабақша бүгінгі қоғамда ата-ана үшін де үлкен көмек. Жұмысбасты, көпбалалы ата-аналар ба­лаларының болашағын аталған балабақшаға сеніп тапсырған. Солардың бірі – Жанар Серік­бай­қызы.

– Қызым Сәния осы балабақшада тәрбие­ле­нуде. Бауыр етің балаңды қазіргі кезде бі­реуге сеніп тапсыру қиын. Осы ретте өз жұ­мыс­­тарын жоғары дәрежеде атқарып, адал ең­бек етіп жүрген жандарға табыс тілейміз. Бөбек­жай балабақшаның басшысы әрдайым қайы­рым­дылық шараларын өткізіп отырады. Аз қам­тамасыз етілген отбасыларға жағдай жасап, қолынан келгенше жыл сайын бірнеше баланы тегін қабылдайды. Көпбалалы, тұрмысы төмен отбасыларға да азық-түлік, киім-кешек үлестіреді. «Қайырымдылық қылсаң, қайырын өзің көресің» дейді ғой. Ел болашағы, ел ертеңдерінің түзу тәрбиесі үшін еңбек етіп отырған жандарға ал­ғысымыз шексіз, – дейді ауыл тұрғыны.

Балабақша барлық тәрбие мен білімнің ең алғашқы баспалдағы іспеттес. Түзу тәрбие, саналы білім, күнделікті жайлы орта, шынайы көңіл, алаңсыз күліп-ойнап балалық шақтың шынайы бақытын сезіну. Бұның бәрі «Балдырған» балабақшасының тәрбиеленушілері үшін күнде­лікті тіршілік. Баланың шексіз қуанышы мен рия­сыз күлкісі ұстаздарға да шабыт сыйлайды. Расында да, балабақша – бақыт мекені.