15 ақпанда қандай тарихи күндер бар?

15 ақпан тарихи ұлы тұлғалардың дүниеге ке­луімен ерекшеленеді. Дәл осы күні итальяндық ұлы суретші, ғалым, «Әмбебап адам» атанған Леонардо да Винчи, итальян философы, математик Галилео Галилей, грекиялық коммерсант, халықаралық олимпиада комитетінің алғашқы президенті Деметриус Викелас дүние есігін ашқан. Сондай-ақ қазақтың көрнекті тілші-ғалымы, «Қазақ тілінің фра­зеологиялық сөздігінің» авторы Ісмет Кеңесбаев, көрнекті актер, театр және кино режиссері Шәкен Айманов, тарихшы Ермұқан Бекмаханов 15 ақпан кү­ні туған.

Бүгін – дүниежүзілік қатерлі ісікке шалдыққан балалар күні. Бұл күн сондай-ақ «Халықаралық ота медбикесі күні» ретінде де аталады. Сонымен қатар 1989 жылы дәл осы күні КСРО әскері Ауғанстаннан шығарылды. Соның негізінде Ресейде 2011 жылдан бастап 15 ақпан Отанынан тысқары аумақта қыз­меттік борышын атқарған ресейліктерді еске алу күні ретінде аталып өтіледі.

Дәл осы күні Израильдің бірінші президенті та­ғайын­далса, Канада өзінің мемлекеттік туын бекіткен. Және үлкенге де, кішіге де ұнайтын «Күлше қыз» ертегісі желісінде түсірілген мульт­фильмнің тұсауы кесілген.

Алматыда «Қазақстан тарихы» бес томдығының құрастыру жұмыстары аяқталса, 2014 жылы мә­нерлеп сырғанаушы Денис Тен Сочи Олимпиадасында күміс жүлде алып, қазақстандықтарға сүйінші жаңалық жеткізген. Бұл күн Орталық Азия жаһангері Әмір Темірдің, неміс жазушысы, ағарту дәуірінің көр­некті өкілі Гохольд Эфраим Лессингтің қайтыс болуы­­мен де есте қалған.

Дайындаған

Аружан МҰХАНБЕТҚАЛИ