Қасиетті өнерді төрге оздырған

Өнер десе ішкен асын жерге қоятын Толғанай Қашақова – жас та болса өз саласының үздігі атанған жан. Оның өнерге деген махаббаты бала кезінен қалыптасты. Отбасында дом­быраның үнін естіп өскен қаршадай қыз болашақта өнер иесі болатынына күмәнданбады.

Толғанай Мұратқызы – Қалжан ах­ун ауы­лының тумасы. Ардақты әке­сі шар­уа­шылықта еңбек ет­се, анасы төрт бірдей қыздың тәрбиесімен, отба­сындағы шаруа­­мен айналысты. Мектеп табал­дырығын ат­таған сәттен бас­тап, музыкаға жаны жақын болған жас балғынды мұғалімі Алтынай Иманқұлова тәрбиеледі, өнерге бау­­лыды. Алғаш мектеп сахнасында ән салған жас өнерпаз «Әнші балапан» әнін шырқап, көрермендер көз­айымына ай­налғаны есін­де. Ән айтумен қатар, би өнерін де мең­геріп, мектепішілік іс-шара­ларға, бай­қауларға қатысқаны да күні ке­ше өткендей.

Бала кезінен құлағына домбыранын үнін сіңірген асқар таудай әкесі Мұрат аға күй тартқанды ұнатады екен. Әрине, әуесқой домбырашы ретінде ән де айтып, кішкентай қызының бойына өнерге деген сүйіспеншілікті сіңіріп өсірді.

– «Әу» демейтін қазақ жоқ. Құ­ла­ғыма келген әуенді ешқандай нотасыз домбырамен әуендетемін. Атақты күй­лерді де арнайы үй­ренбесем де тартып беремін. Домбыраға қосылып кейде ән айтамын. Кішкентай қызым Толғанай өнерге жа­қын болды. Үлкен әп­келері Жанат, Жанар, Жанерке мұғалімдікті, медбикелікті және мұ­най саласын таңдады. Олардан жұбайым Гүлнәр екеуміз жеті жиен немере сүйіп отырмыз. Қазір Толғанайдың жетістігіне қуанып отырмыз. Сүйікті ісімен айналысып, мәдениет саласында абыройлы қызмет етеді. Ата-анаға бұдан асқан бақыт жоқ шығар, сірә, – дейді өнер ие­сінің әкесі Мұрат Қашақов.

Толғанай мектептен негізгі білімін алып, Қызылордадағы М.Мә­метова атын­дағы педагоги­ка­лық колледжге оқуға тү­седі. Колледжде баяннан сабақ берген ұстазы Тұрмағанбет Ізбасаровта 4 жыл бо­йы оқып, кәсіби маман атанады. Арнаулы оқу орнын тәмамдаған болашақ мәдени ұйымдастырушы жоғарғы оқу орнына түсу үшін бағын сынайды. Мамандығына деген ыстық ықыласының және біліктілігінің арқасында Шымкенттегі Оңтүс­тік Қазақ­стан мемлекеттік педагоги­калық инс­ти­тутының музыкалық білім маманы бойынша грант иесі атанды. Болашақ мәдениет маманы оқу орнын ойдағыдай аяқтап, ал­ғашқы еңбек жолын да бастап кетеді.

– Киелі мекен Қалжан ахунда туып-өсіп, болашақта мәдени ұйымдастырушы маманы атану арманым орындалып, жоғар­ғы оқу орнын бітірдім. Алғашқы ең­бек жолым­ды А.Тоқмағамбетов атын­дағы қа­ла­­лық мәдениет үйін­де бастадым. Төрт жыл бойы мә­де­ниет майталмандарымен қа­тар жүріп, мамандығымның қыр-сы­­рын мең­гердім. Әсіресе ақын, сце­на­рист, режиссер, ҚР мәде­ниет қайраткері Оң­талап Нұрмаха­новтан үйренгенім көп. Қалалық мәдениет үйінің директоры Эльмира Қанатбаеваға да айтар алғысым шек­сіз. Ұстазым ретінде өнер жанашыр­ларын құрметтеймін. 2017 жыл­дан бері ауданға ауы­­сып келдім. Мені әріптестерім жы­лы қарсы алды. Мәдени іс-ша­ра­ларды жоғары деңгейде ұйым­дастыруға, сценарий жазуға ау­дандық мәдениет үйінің дирек­торы Нұрхан Көшербаевтың ең­бегі зор. Жас мамандарға үнемі қамқорлық танытып, алға жетелеп жүреді. Кемшіліктерді де айтып, оны түзетуге көмектеседі. Өнер­ді шын талантты адам бағын­дырады. Бі­рақ көп еңбек пен шы­ғармашылық із­деніс те қажет. Бі­рін-бірі толықтырып отыратын осындай қасиеттерсіз өнер ие­сі ата­ну мүмкін емес, – дейді Сырдария аудандық мәдениет үйінің көркемдік жетекшісі Толғанай Мұ­ратқызы.

Кәсіби мамандардан тәжірибе жинап, туған ауылға қызметке кел­ген мә­де­ни ұйымдастырушы бү­гінде аудан кө­лемінде өтетін мәдени іс-шаралардың жоғары дең­гейде өтуіне атсалысады. Ол кә­сіби біліктілігінің арқасында мәде­­ниет үйі жанындағы жас­тар теат­рында өнер көрсетіп келеді. Мәселен, театр ұжымы сахна­лаған С.Раевтың «О, қыз­дар» дра­масында Жарқынайдың рө­лін сәтті сомдап шықты. Ал дра­ма­тург Қ.Мұха­мед­жановтың «Бөлтірік бө­рік астында» комедиясында Жәми­ла­ның образын сомдаған Тол­ғанайға өнерсүйер қа­уым жоғары баға берді.

Күн сайын сүйікті маманды­ғымен қа­уы­шатын өнер иесі – өткен жылы сәтті шық­қан «Жұл­дыз лайк» жобасының ұйым­дастырушысы. Телевизиялық шоу биыл­ да ұйымдастырылып, сәл өзге­ріс енетінін айтады.

– Өткен жылы жаңа жоба сәтті өтті. Жұп ретінде 1 кәсіби әнші мен 1 өзге маман иесі таңдалса, биыл екі өнерпаз да кәсіби әнші болады деп күтілуде. Өнерлі жұптар арасында өтетін байқауды жоғары деңгейде ұйымдастыруға кірісіп кеттік. Жалпы, аудан бойынша атаулы даталар мен мерекелік іс-шаралардың көңілден шы­ға­тындай етіп өтуіне күшімізді саламыз, – дейді Т.Қашақова.

Аудан өнерпаздары­мен қатар жүріп, мә­дениет саласының дамуына үлес қо­сып келе жатқан білікті маман өткен жыл­дың қо­рытындысымен ауданда «Үздік мә­дениет қызметкері» атанды. Мұнан басқа саладағы жетістіктері үшін облыс әкімінің, аудан әкімінің «Алғыс хатымен» марапатталды. Бұл жетістіктер мәдени ұйымдас­тырушының алдағы қыз­­ме­тіне тың серпін береді деген сенімдеміз.

Бибісара ЖАНӘЛІ