Жаңа жыл қарсаңында ҚР Тәуелсіздігінің 30 жылдығына орай Қызылорда облысының жә­не Сырдария ауданының Құрметті азаматы Алмагүл Божанованың қоғамдық музейі мен кітапханасының ашылу салтанаты өтті.
Ізгілікті іс-шараға аудан әкімі Мұрат Ергеш­баев, аудандық мәслихат хатшысы Ержан Әжі­кенов, Қазақстанның Еңбек Ері Абзал Ералиев, «Nur Otan» партиясы аудандық филиалы төрағасының бірінші орынбасары Е.Жақып, аудандық ардагерлер ке­ңесінің төрағасы Мұса Келдібаев бастаған ардагерлер мен зиялы қауым өкілдері қатысты.

Руханият пен ұлттық құндылықтың орта­лығына айналатын қоғамдық кітапхана мен музейдің ашылу салтанатында аудан басшысы М.Ергешбаев қоғам қайраткерін құттықтады.

– Мемлекеттік қызмет саласында абырой­лы еңбек еткен Алмагүл Божанқызының өне­гелі өмірі ел есінде сақталатыны оның өл­шеу­сіз еңбегінде деп айтуға толық негіз бар. Ол кісі еңбек жолындағы бірге қызмет атқар­ған замандас­тарын, Сыр елінің белгілі тұл­ғалары, қоғамдық-саяси ахуал, жалпы өмір туралы толғаныстарын қағаз бетіне түсі­ріп, осы кез­ге дейін бірнеше кітап жазды. «Ердің ба­ғын жандандырған – Ер Балдырған», «Сыр елім – Жерұйығым», «Сенім жүгі», «Аңыз, абыз адам», «Құдірет пен қасиет», «Кө­пір», «Сырым мен шыным», «Ғасыр үні», «Ел ар­дақ­тылары» ат­ты кітаптары Сыр өңірі руха­­ния­тына қосқан үлесі екені айқын. Тарихи таныммен ұрпақтар сабақтастығы дамиды, ұлт­тық сана қалыптасады. Үлкенге көрсетілген құр­мет келешегіміздің баянды болуына жол аша­ды. Есімі мен өнегелі істері Сыр елімен бірге жасап келе жатқан қайраткер тұлғаның тарих­қа толы музейі құтты болсын, – деді аудан басшысы.

Өз кезегінде Қазақстанның Еңбек Ері Абзал Ералиев ардақты жанға жүрекжарды ле­бі­зін білдірді. Сонымен бірге, еңбек ардагері Қамар Рүстемов естеліктерімен бөлісті. «Мәді Қажы» ЖШС-нің төрағасы Сейткамал Сұлтанов құрмет көрсетіп, шапан жапты.

Салтанатты іс-шарада құрмет иесі музей мен кітапхананың аудан халқына тағылымы мол болар деген сенім білдірді.

– Биыл ел Тәуелсіздігінің 30 жылдығы мере­кесі аясында құндылыққа толы жәдігерлер мен ақыл кені саналатын кітаптарымды жинақ­тап, қоғамдық музей ашуға ұйғарым жасадым. Мемлекеттік қызметте жүріп, алдыңғы буын аға-апаларымыздың тәлімін алдық. Мол тә­жірибе жинақтадық. Дәл қазіргі уақытта артымнан ерген жас ұрпаққа жол бастаушы болатын құнды дүниелерімді ұғындыру – негізгі парызым. Сыр топырығынан түлеп ұшқан әрбір азаматқа тілекшімін. Біз осыдан 10 жыл бұрын «Ұрпақтан-ұрпаққа» қоғамдық бірлестігін құ­р­­­ып, соның негізінде ел аза­маттарының есімін жаңғыртып, жас ұрпақ­қа тәлім-тәрбие берудеміз, – деген Алмагүл Божанова музей мен кітапхана жұмысын ұйымдастыруға атса­лысқан аудандық мәдениет және тілдерді дамыту бөліміне, оған қарасты аудандық кітап­хана мен аудандық тарихи-өлкетану музейінің қызметкерлеріне ризашылығын жеткізді.

Мұнан соң құрметті меймандар лента қиып, қоғамдық музей мен 2000-нан аса кітаптан тұратын кітапханамен танысты. Іс-шара барысында қоғам қайраткері А.Божановаға құрмет көрсетілді.