Қарты бар елдің құты бар

Апта ағымында «Қызылдихан» шаруа қо­жалығы мен Терең­өзек кенті клубының ұйымдас­тыруымен «Қарттарым – асыл қа­­­­­зы­нам» тақырыбында ардагерлер­мен кез­­десу кеші өткізілді. Із­гілікті іс-шара­­­­ға облыстық мәс­лихат депутаты, «Жанар-ай» ЖШС-нің директоры Бақ­дәулет Мақа­шов,­ «Қызылдихан» шаруа қо­жа­­­­лы­ғының төрағасы Алданбер­ген Құл­баев, Терең­өзек кенті ардагерлер кеңе­сі төрағасының мін­­детін атқарушы Зайдағали Жүсіп­­бай­ұлы, ардагерлер мен кеш қо­нақ­­тары қа­тысты.

Талай жыл түрлі салада еңбек еткен ар­дагерлерді құрметке бөлеген іс-шараны ауыл шаруашылығы саласының майталманы Алданберген Құлбаев ашып, жиналған көпшілікке құрмет көрсетті.

– 1 қазан – халықаралық қарттар күні мерекесі респуб­лика көлемінде кеңінен аталып өтілді. Біздің шаруашылық қазыналы қарттарды ұлықтау іс-шарасын өткізуді Сыр салысын толықтай жинап алғаннан кейін жоспарлаған болатын­быз. Егін-жай­дағы қызу тірлік саябырсып, қамбамыз ас­тыққа толды. Диқандарымыз межелі жос­парды орындап, мерейімізді тасытты. Жыл сайынғы дәстүр бойынша қарт­тарымызға ілтипат көрсетіп, сый-сияпат ұсынатын боламыз. Қариялардың өнегелі ғұмырына қа­шан да құрметпен қараймыз. Олардың жо­ғары дәрежеге көтеруді парыз санаймыз. Алдағы уақытта ардагерлерді киелі Түркіс­тан қаласына саяхатқа, шипажайға дема­луға жіберетін боламыз, – деді шаруашылық төрағасы.

Өз кезегінде облыстық мәслихат депу­таты Бақдәулет Мақашов ардагерлерді ме­рейлі мерекемен, ауыл еңбек­керлерін егін маусымын табысты аяқталуымен құттық­та­ды.

– Ауыл шаруашылығы саласында ширек ғасырдан астам уақытта жемісті жұмыс жасап келеміз. Тынымсыз тірліктің бел ор­тасынан табылып, талай тауқыметті бас­тан өткердіңіздер. Қиындыққа мойы­май, бейнетке жасымай отбасын асырау үшін қажырлы қайрат көрсеттіңіздер. Қа­рияларға барынша қолдау көрсетіп, ден­сау­лығын жақсартуға демеушілік етеміз. Осы кезге дейін жүзеге асырылып келе жатқан жобаларды әрі қарай жалғастырып, тың бастамаларға иек артамыз. Алдағы уа­қытта бұқаралық спортты жанына серік еткен тұрғындар үшін жаңа ғимарат салуды жос­парлап отырмыз, – деді Б.Мақашов.

Мерекелік кеште 80 жасқа толған қа­зыналы қаттар марапат биігінен көрінді. Атап айтар болсақ, еңбек ардагерлері Жолдас Байкенжеев, Мәрия Бәйімбетова, Раушан Есжүрекова, Зияш Үсенова көпшіліктың ыстық ықыласына бөленді. Мерейтой ие­леріне арнап аудан өнерпаздары өнер көрсетті. Сонымен бірге, Тереңөзек кенті ардагерлер кеңесі төрағасының міндетін атқарушы Зайдағали Жүсіпбайұлы бастаған сала ардагерлері жиналған қауымға жылы лебізін жеткізді.

Айта кетейік, биыл «Қызылдихан» шаруа қожалығының диқандары 700 гектар егіс алқабына күріш екті. Шаруашылық орташа есеппен 78,2 тоннадан өнім алды. Биылғы жылдың озат бригадирі Кенже Айтбаев, озат комбайнері Ерлан Жолшыбек, озат жаткисі Алмас Кеңесов, озат күрішші Әбусәлім Үсенбай, озат сушы Бауыржан Қоқымбаев, озат тасымалдаушы Серікбол Бекішев, озат көкөніс өсіруші Қаншайым Жөлекенова, озат бақша өсіруші Жәнібек Кеукенов, озат картоп өсіруші Нұрхан Молдабаев болды.

Балтабай ОРДАБЕКОВ