Халыққа қызмет ету – мерейлі мәртебе

14 тамыз – ҚР Мемлекеттік кірістер комитетінің құрылған күні, сала мамандарының кәсіби мере­кесі. Осы орайда аудандағы сала ардагерлерін ар­дақ­тап, қызметінде өзіндік орны бар маман Әки­ма Дайырқызымен әңгімелестік.

Әкима Досығұлова аудандық салық саласында 38 жыл қызмет еткен. Айта кетерлігі, ауданымызда осынша жыл өмірін аталған салаға арнаған жалғыз қызметкер ана болса, ол – Әкима апай. Бұл күнде бейнетінің зейнетін көріп отырған ардақты жан 2017 жылы зейнет демалысына шыққан.

– Салық қызметі ел егемен­ді­гімен қатар құрылған, – деп Әкима апай әңгімесін әріден бастады. – 1979 жылы Семей қаласын­дағы Қаржы экономикалық техникумын оқып бітіргеннен кейін ауданға келіп, жас маман ретінде жұмысқа орналастым. Алғашқы еңбек жолымды аудандық қаржы бөлімінде мемлекеттік салық инспекторы болып бастадым. 1990 жылға дейін аға салық инспекторы, есеп жөніндегі аға салық инспекторы қызметтерін атқардым, – деп өткенге көз жүгіртіп өтті.

«Елу жылда ел жаңа» деген, Әкима апай қызметіне қызу кіріскен шақтарда қазіргідей техника, банк арқылы онлайн аударма жасау деген мүлде болмаған. Тіпті кей салық түрлерін үй-үйді аралап жүріп, қолдап жинаған маман сол еңбегі мен ізденісінің арқасында білікті маман атанғанын айтады.

– Осы салада қанша жыл еңбек етіп, нанын жеп, қанша адаммен жұмыс жасадым. Соның бәрі темірдей тәртіп пен талаптың арқасында деп білемін. Біліктілік тәжірибемен келеді. Қызмет ба­бында білмеген жерімізді үйре­тіп, қаржы саласының қыр-сырын үйреткен ұстаз-бас­шы­ларым Әсер­бай Айкупешов, Мақсұт Нұртазаев, Ұлтуған Ерімбе­това, Кенжегүл Абдукаримова, Сәтемір Шәудіров, Құралай Әбілхайыровалар болса, салық саласында қызметтес болған Болат Досымов, Ерсін Орынбаев, Фердоуси Қожабергенов, Те­мірлан Қожаназаров, Мухамбедияр Абдықалықов, Бақыт Дүйсенов, Жанат Бодықовалардың есімін ерекше атап өту қажет. Біз көзін көріп, қызметтес болған бұл кісілердің біразы қазір өмірден өтіп кетті. Барлығына құрметім зор, – деп жалғады әңгімесін ардагер маман.

Еңбек жолын аталған саладан бастап, кейін 1990 жылы аудандық мемлекеттік салық инспекциясы құрылған кезден мемлекеттік кірістер басқармасында жұмыс жасаған Әкима апай жұмыстың қыр-сырын бүге-шүгесіне дейін меңгерген. Қырық жылға жуық мемлекеттік қызметті еш мінсіз, басшылық тараптың ескертуінсіз атқарған, он шақты басшымен келісті жұмыс жүргізген маманның бүгінгі жастар туралы ойын білмек болып сауал тастадық.

– Кім болса да қызметті тө­меннен бастағаны жөн дер едім. Әйтпесе қазір жастар оқу бітіре салып, «жұмсақ креслоға» күмп ете қалғысы келеді. Бұлай болмайды. Кіші қызметтен бастап көтерілген адам сол саланы жан-жақты меңгереді, әрі тәжірибе кез келген маманды биікке шығарады. Ал қазір мекемеде жүрген жастарға өзім ризамын. Барсақ, құрақ ұшып, құшақ ашып қарсы алады. Хабарласып жағдайымызды сұрап тұрады. Қарттар күні, ардагерлер күні секілді мерейлі мерекелерде естен шығарған емес. Ұжым қызметкерлері келіп құттықтайды. Бұл мен үшін үлкен мәртебе, – деді Әкима Дайырқызы.

Мемлекет үшін маңызды салада қажырлы еңбек етіп, аудан бюджетінің кірісін толықтыруға зор үлес қосқан, кейінгі буынға үлгі бола білген өз ісінің маманы Әкима Досығұлованың ерен еңбегі ескерусіз қалмаған. Лауазымды қызмет атқарып, кадр­ларды дайындауда, ұжым жұ­мы­сының алға басуында еткен еңбегі еленіп, бірнеше мәрте Қазақ­стан Республикасы Қаржы министрлігі Мемлекеттік кірістер комитетінің, Қызылорда облысы бойынша Мемлекеттік кірістер департаментінің, Сырдария ауданы бойынша Мемлекеттік кірістер басқармасының, облыс, аудан әкімдерінің Құрмет грамотасымен, алғыс хаттарымен, төсбелгімен марапатталған.

Бір құшақ «Алғыс хат» пен «Құрмет грамотасын» алдымызға жайып салған Әкима апай:

– Бұл қағаздар – еңбектің елен­генінің көрінісі. Бірақ қағазбен мақтануға болмайды, іспен көрсету керек. Ұжымдағы жастарға осыны ұдайы ескертіп отыратынмын, – деді. Түсінген адамға бұл сөздің астарында терең тәрбие жатыр.

Әкима апай өз саласында білікті, абыройлы маман болса, отбасында ардақты ана, аяулы жар. Жолдасы Бақытбек аға екеуі төрт бала тәрбиелеп, өсірген. Бұл күнде қыздары тұрмыста, балаларының барлығы жоғарғы оқу орнында оқыған, бір-бір сала маманы. Жазғы демалыста Алматыдан ата-әжесіне қыдырып келген немересі Аружан – әжесінің қолғанаты.

Ардагер ана «еңбек еттім, же­місін көрудемін» деп қол қусы­рып қарап отырудан аулақ. Қазіргі таң­да жеке кәсіппен айналысуда. Жай кәсіп емес, үлкен, берекелі бизнес­ке айналдырып, аудандағы жұ­мыссыздық мәселе­сін шешуге өз тарапынан ат салысқысы келеді.

Әкима Досығұловамен жүргіз­ген әңгімеміз ерекше әсер сыйлады. Өз саласының ғана емес, еңбек жолын жаңадан бастаған жас мамандарға үлгі, тәрбие боларлық бір сағаттық кездесуден түйгеніміз көп болды. Қоштасарға таяғанда «Қуыс үйден құр шықпа» деп дәмін ұсынған Әкима апай ақ батасын беріп шығарып салды.

Үйден шыға бере есік алдында кең әрі жайқалған бау-бақшаға көзіміз түсті.

– Бұл – менің сүйікті хоббиім, – деп апай өз қолымен баптап өсірген бақшаны таныстырды. Бау­да жергілікті жерде кез келген топыраққа өсе бермейтін, күтімі қиын құлпынай, таңқурай, қарақат сынды жидектер мен қызанақ, қияр, т.б. түрлі өнімдер бар екен. Әкима апайдың біз жақта шыға бермейтін бақша өнімдерін биыл да мол алуынан қай істе де шебер, жауапты кісі екенін анық аңғардық.

Сондай-ақ, әріптестерін кәсіби мерекемен құттықтауды да естен шығармады.

– Осыдан отыз жыл бұрын Тәу­­­­­­­ел­­­­сіздігімізбен қатар ең басты құрылым­­­дарымыздың бірі – салық қызметі құрылды. Егемен­ді­гіміздің алғашқы күнінен бас­тап мемлекетті толық қалыптастыру жолында тынымсыз еңбек еткен әріптестерімді кәсіби мерекесімен құттық­таймын. Сол қатарда болу мен үшін зор мақтаныш, үлкен мәртебе. Бұл қызметтің алға қойған міндет­тері ауқымды әрі айқын. Еңбегі өлшеусіз сала мамандарын мерей­лі мерекемен құттықтай отырып, ел болашағы жолында аянбай еңбек етуден танбаңдар дегім келеді. Жұмыстарыңа жаңа серпін, тек сәттілік тілеймін, – деді сала ардагері.